'ഞാൻ എപ്പോഴും മഞ്ഞ ജേഴ്‌സിയിലായിരിക്കും, അടുത്ത 15 - 20 വർഷത്തേക്ക് ഞങ്ങൾ ഒരുമിച്ചായിരിക്കും'; ആരാധകരെ ആവേശത്തിലാക്കി തല ധോണി

Authored by: അനുഷ ഗംഗാധരൻ|Samayam Malayalam•7 Aug 2025, 1:53 pm

ഇന്ത്യൻ ക്രിക്കറ്റ് ഇതിഹാസം എംഎസ് ധോണി യും ചെന്നൈ സൂപ്പർ കിങ്‌സുമായുള്ള ( സിഎസ്കെ ) ബന്ധം എന്നും ആരാധകർ ആഘോഷമാക്കുന്ന ഒന്നാണ്. തല (എംഎസ് ധോണി) ഇല്ലാത്തൊരു സീസൺ ഇന്നും ആരാധകർക്ക് ചിന്തിക്കാൻ പോലും കഴിയില്ല. ഇന്ത്യൻ ക്രിക്കറ്റിൽ നിന്ന് വിരമിച്ച് വർഷങ്ങൾ പിന്നിട്ടിട്ടും താരം സിഎസ്കെയ്ക്കായി മാത്രം ജേഴ്‌സി അണിയുന്നത് ക്രിക്കറ്റ് ലോകത്ത് ഇപ്പോഴും ചർച്ചയാകുന്നു ഒന്നാണ്. കഴിഞ്ഞ കുറച്ച് വർഷങ്ങളായി ഓരോ സീസൺ അവസാനിക്കുമ്പോഴും ഇത് എംഎസ് ധോണിയുടെ അവസാന ഐപിഎൽ സീസൺ എന്ന തരത്തിൽ അഭ്യൂഹങ്ങൾ എത്താറുണ്ട്. എപ്പോഴാണ് ഐപിഎൽ കളിക്കുന്നത് നിർത്തുക എന്ന ചോദ്യവും താരം ഒരുപാട് തവണ കേട്ടിട്ടുള്ള ഒന്നാണ്. ഇപ്പോൾ വീണ്ടും അത്തരം ഒരു ചോദ്യം താരത്തെ തേടി വന്നിരിക്കുകയാണ്.
യശസ്വി ജയ്‌സ്വാൾ മുംബൈയിൽ തുടരാൻ കാരണം രോഹിത് ശർമ; നിർണായക വെളിപ്പെടുത്തൽ നടത്തി അജിങ്ക്യ നായിക്
2025 ഐപിഎൽ സീസണിൽ അത്യന്തം ദയനീയ പ്രകടനമായിരുന്നു സിഎസ്കെ കാഴ്ചവെച്ചത്. അതുകൊണ്ടുതന്നെ ആദ്യമായി പത്താം സ്ഥാനത്തിലാണ് സിഎസ്കെ 2025 ഐപിഎൽ സീസൺ അവസാനിപ്പിച്ചത്. ഇതോടെ ധോണിയുടെ അവസാന ഐപിഎൽ സീസൺ ആണ് ഇത് എന്ന അഭ്യൂഹം വീണ്ടും ശക്തമായി പ്രചരിച്ചിരുന്നു.

എന്നാൽ അത്തരത്തിലുള്ള എല്ലാ അഭ്യൂഹങ്ങളും കാറ്റിൽപറത്തി സിഎസ്കെ ആരാധകരെ സന്തോഷത്തിലാക്കിയിരിക്കുകയാണ് അവരുടെ പ്രിയപ്പെട്ട തല. ഒരു പരിപാടിയിൽ സംസാരിക്കവെയാണ് ഐപിഎൽ വിരമിക്കൽ അഭ്യൂഹങ്ങളെ കുറിച്ചുള്ള ചോദ്യം ഉയർന്നത്. എന്നാൽ തന്റെ കരിയർ അവസാനിപ്പിക്കാൻ ഒരുപാട് സമയമുണ്ടെന്നും പക്ഷെ സി‌എസ്‌കെയുമായുള്ള ബന്ധം എന്നെന്നേക്കുമായി നിലനിൽക്കുമെന്നും ആണ് ചോദ്യത്തിനുള്ള മറുപടിയായി ധോണി പറഞ്ഞത്.

'എനിക്ക് (എംഎസ് ധോണി) തീരുമാനമെടുക്കാൻ ധാരാളം സമയമുണ്ടെന്ന് ഞാൻ എപ്പോഴും പറഞ്ഞിട്ടുണ്ട്, എന്നാൽ മഞ്ഞ ജേഴ്‌സിയിൽ തിരിച്ചുവരുന്നതിനെക്കുറിച്ചാണ് നിങ്ങൾ ചോദിക്കുന്നതെങ്കിൽ, ഞങ്ങൾ എല്ലായ്പ്പോഴും മഞ്ഞ ജേഴ്‌സിയിൽ തന്നെയായിരിക്കും, ഞാൻ കളിക്കുന്നുണ്ടോ ഇല്ലയോ എന്നത് മറ്റൊരു കാര്യമാണ്' എന്നായിരുന്നു ധോണി പറഞ്ഞത്. ധോണിയുടെ ഈ വാക്കുകളാണ് ആരാധകർ ഇപ്പോൾ ആഘോഷമാക്കുന്നത്.

'ഞാനും (എംഎസ് ധോണി) സി‌എസ്‌കെയും ഒരുമിച്ചാണ്. നിങ്ങൾക്കറിയാമോ? അടുത്ത 15 - 20 വർഷത്തേക്ക് പോലും ഞങ്ങൾ ഒരുമിച്ചായിരിക്കും' എന്നും അദ്ദേഹം കൂട്ടിച്ചേർത്തു. എംഎസ് ധോണിയുടെ ഈ വാക്കുകളാണ് ഇപ്പോൾ സോഷ്യൽ മീഡിയയിൽ വൈറലാവുന്നത്. അടുത്ത വർഷം താരം സിഎസ്കെയ്ക്കായി കളിക്കുമോ ഇല്ലയോ എന്നതിനെ കുറിച്ച് നിലവിൽ ഔദ്യോഗിക റിപ്പോർട്ട് ഒന്നും തന്നെ വന്നില്ലെങ്കിലും താരത്തിന്റെ ഈ വാക്കുകൾ ആരാധകർക്ക് നൽകുന്ന ഊർജം ചെറുതല്ല.

സിഎസ്കെയെ സംബന്ധിച്ചിടത്തോളം എംഎസ് ധോണി എന്ന് പറയുന്നത് ടീമിന്റെ മുഖമാണ്. അഞ്ച് തവണയാണ് താരം ടീമിന് കപ്പ് നേടി കൊടുത്തത്. അടുത്ത സീസണിൽ ടീമിൽ താരത്തിന്റെ റോൾ എന്തായിരിക്കും എന്ന് ഇപ്പോൾ പറയാൻ സാധിക്കില്ല എങ്കിലും സിഎസ്കെയ്ക്കൊപ്പം ധോണി എക്കാലവും ഉണ്ടാകും എന്നതിന്റെ തെളിവുകൂടിയാണ് ഈ വെളിപ്പെടുത്തൽ.