ഡൽഹിയുടെ തകർച്ചയ്ക്ക് കാരണം ആ മണ്ടൻ തീരുമാനം; കരുൺ നായരുടെ റോൾ പതനം എളുപ്പമാക്കി, താരത്തിനെതിരെ വിമർശനം

Edited byഅനുഷ ഗംഗാധരൻ | Samayam Malayalam | Updated: 6 May 2025, 1:55 pm

ഐപിഎൽ 2025 സീസണിൽ ഡൽഹി ക്യാപിറ്റൽസ് ഏറ്റവും മോശം പ്രകടനം നടത്തിയത് ഇന്നലെയാണ്. സൺറൈസേഴ്‌സ് ഹൈദരാബാദ് - ഡൽഹി ക്യാപിറ്റൽസ് മത്സരം മഴയെ തുടർന്ന് റദ്ദ് ചെയ്യുകയായിരുന്നു. എന്നാൽ ആദ്യം ബാറ്റിങ്ങിന് ഇറങ്ങിയ ഡൽഹിയുടെ 5 വിക്കറ്റുകൾ അനായാസം വീഴ്ത്താൻ ഹൈദരാബാദിന് സാധിച്ചു. ഡൽഹിയുടെ പവർ പ്ലേയിൽ തന്നെ അഞ്ച് വിക്കറ്റുകൾ നഷ്ടമായത് ടീമിന് തിരിച്ചടിയായി.
MI vs GT; എറിഞ്ഞിടാൻ ആളുണ്ടെങ്കിലും ഗുജറാത്തിനെ മുംബൈ ഭയക്കണം; മുംബൈ ഇന്ത്യൻസ് - ഗുജറാത്ത് ടൈറ്റൻസ് മത്സരത്തിൽ ടീമുകൾ ശ്രദ്ധിക്കേണ്ടത് ഇതൊക്കെ
ഡൽഹിയെ സംബന്ധിച്ചിടത്തോളം അത്യന്തം നിർണായകമായ മത്സരമാണ് ഇത്. അതുകൊണ്ടുതന്നെ ചില മാറ്റങ്ങളോടെയാണ് ഡൽഹി ഈ മത്സരത്തിന് ഇറങ്ങിയത്. അതിൽ തന്നെ ഏവരെയും അത്ഭുതപ്പെടുത്തിയത് കരുൺ നായരെ ഓപ്പണിങ്ങിൽ ഇറക്കിയതാണ്. നേരിട്ട ആദ്യ പന്തിൽ തന്നെ ഔട്ട് ആയി കരുൺ നായർ പവലിയനിലേക്ക് മടങ്ങി. ഇതോടെ ഡൽഹിയുടെ തീരുമാനത്തെ വിമർശിച്ച് നിരവധി പേർ രംഗത്തെത്തി.

ഇപ്പോഴിതാ നിർണായക മത്സരത്തിൽ കരുണ് നായർക്ക് ഓപ്പണറായി സ്ഥാനക്കയറ്റം നൽകാൻ ഡൽഹി ക്യാപിറ്റൽസ് തീരുമാനിച്ചതിൽ മുൻ ഓസ്‌ട്രേലിയൻ ഓൾറൗണ്ടർ ഷെയ്ൻ വാട്‌സൺ പ്രതികരിച്ച് രംഗത്തിയിരിക്കുകയാണ്. ആദ്യം ബാറ്റ് ചെയ്ത ഡൽഹി ക്യാപിറ്റൽസ് നിശ്ചിത 20 ഓവറിൽ 7 വിക്കറ്റ് നഷ്ടത്തിൽ 133 റൺസ് മാത്രമേ നേടിയുള്ളൂ. അഭിഷേക് പോറലിന് മുമ്പ് കരുണ് നായരെ സ്ഥാനക്കയറ്റം നൽകാൻ തീരുമാനിച്ചത് പൂർണ്ണമായും തിരിച്ചടിയായി, മാത്രവുമല്ല വലംകൈയ്യൻ ബാറ്റ്‌സ്മാൻ അഭിഷേക് പോറലിന് മുന്നേ ഔട്ടായി. ഒരു ഘട്ടത്തിൽ ഡൽഹി 29/5 എന്ന നിലയിൽ തകർന്നു.

ആ സമയത്ത് 100 റൺസ് പോലും കഠിനമായി തോന്നിയെങ്കിലും ട്രിസ്റ്റൻ സ്റ്റബ്‌സ്, അശുതോഷ് ശർമ്മ തുടങ്ങിയവരുടെ നിർണായക സംഭാവനകൾ ഡൽഹിയെ ഭേദപെട്ട സ്‌കോർ നേടാൻ സഹായിച്ചു. ഡൽഹി വീണ്ടും തോൽവിയിലേക്ക് നീങ്ങുമ്പോൾ മഴ അവരെ രക്ഷപ്പെടുത്തി. ഡൽഹിയുടെ ഇന്നിങ്സിന് ശേഷം കളി നിർത്തിവയ്ക്കുകയും ഒടുവിൽ മത്സരം ഉപേക്ഷിക്കുകയും ചെയ്തു.

കരുൺ നായർ ഓപ്പണറായി ബാറ്റ് ചെയ്യുന്നതിൽ പരാജയപ്പെട്ടതോടെ, ഷെയ്ൻ വാട്‌സൺ ഡൽഹി ക്യാപിറ്റൽസ് ടീം മാനേജ്‌മെന്റിന്റെ തന്ത്രങ്ങളെ വിമർശിച്ചു. കരുൺ നായർക്ക് ഓപ്പണറായി സ്ഥാനക്കയറ്റം നൽകിയതിനെ വിമർശിച്ചാണ് ഓസ്‌ട്രേലിയൻ താരം രംഗത്തെത്തിയത്. ഈ സീസണിൽ ഡൽഹി ആസ്ഥാനമായുള്ള ടീമിന്റെ ആറാമത്തെ ഓപ്പണിങ് മത്സരമായിരുന്നു ഇത്.

"ഒരു കാരണവുമില്ലാതെ ഓപ്പണിംഗ് കോമ്പിനേഷൻ മാറ്റിയത് ആവശ്യമില്ലായിരുന്നു. ഞാൻ ശരിക്കും അത്ഭുതപ്പെട്ടു. ഫാഫ് ഡു പ്ലെസിസിനൊപ്പം ഓപ്പണറായി കരുൺ നായർ ഇറങ്ങിപോകുന്നത് കണ്ടപ്പോൾ ഞാൻ കസേരയിൽ നിന്ന് വീഴാൻ തുടങ്ങി. ആ നീക്കത്തിന് അർത്ഥമില്ലായിരുന്നു" എന്ന് ഷെയ്ൻ വാട്‌സൺ സ്റ്റാർ സ്‌പോർട്‌സിൽ പറഞ്ഞു.

കരുൺ നായരുടെ ബാറ്റിങ് പൊസിഷൻ അർത്ഥശൂന്യമാണെന്നും വാട്സൺ പറയുന്നു. "ഡൽഹി ക്യാപിറ്റൽസിന്റെ ക്യാമ്പിലെ ചിന്ത എന്തുതന്നെയായാലും, അത് പൂർണ്ണമായും തെറ്റാണെന്ന് ഞാൻ കരുതുന്നു. നിങ്ങൾ അങ്ങനെ പൊസിഷനുകൾ വെട്ടിക്കുറയ്ക്കാനും മാറ്റാനും തുടങ്ങുമ്പോൾ, റോളുകളിൽ വ്യക്തതയില്ലെന്ന് ഇത് സൂചിപ്പിക്കുന്നു" എന്ന് അദ്ദേഹം കൂട്ടിച്ചേർത്തു.

അതേസമയം 11 കളികളിൽ നിന്ന് 13 പോയിന്റുമായി ഡൽഹി നിലവിൽ പോയിന്റ് പട്ടികയിൽ അഞ്ചാം സ്ഥാനത്താണ്. ഇനിയുള്ള 3 മത്സരങ്ങളിലും ഡൽഹി ജയിക്കുകയും ഒപ്പം ടേബിളിൽ ആദ്യ നാലിൽ ഉള്ളവർ അടുത്ത മത്സരത്തിൽ തോൽക്കുകയും ചെയ്താൽ പ്ലേ ഓഫിലെത്താൻ ഡൽഹിക്ക് സാധിക്കും.