ധോണിയുടെ ചെന്നൈക്ക് ആറാം തോല്‍വി; രോഹിതിന് സിക്‌സര്‍ റെക്കോഡ്, മുംബൈ മുന്നോട്ട്

Authored byനിഷാദ് അമീന്‍ | Samayam Malayalam | Updated: 21 Apr 2025, 12:19 am

ഐപിഎല്‍ 2025ല്‍ ചെന്നൈ സൂപ്പര്‍ കിങ്‌സിനെതിരെ മുംബൈ ഇന്ത്യന്‍സിന് ഒമ്പത് വിക്കറ്റിന്റെ തകര്‍പ്പന്‍ ജയം. സിഎസ്‌കെ 20 ഓവറില്‍ അഞ്ചിന് 176 റണ്‍സെടുത്തപ്പോള്‍ മുംബൈ 15.4 ഓവറില്‍ ഒരു വിക്കറ്റ് മാത്രം നഷ്ടപ്പെടുത്തി ലക്ഷ്യം മറികടന്നു.രോഹിത് ശര്‍മയും (45 പന്തില്‍ 76*), സൂര്യകുമാര്‍ യാദവും (30 പന്തില്‍ 68*) ചേര്‍ന്നാണ് മുംബൈക്ക് അനായാസ ജയമൊരുക്കിയത്. എട്ട് മല്‍സരങ്ങളില്‍ സിഎസ്‌കെയുടെ ആറാം തോല്‍വിയാണിത്. എംഎസ് ധോണിയും സംഘവും പോയിന്റ് നിലയില്‍ ഏറ്റവും പിന്നില്‍ 10ാം സ്ഥാനത്ത് തുടരുന്നു. എട്ട് മാച്ചുകളില്‍ നാല് ജയവുമായി ആറാം സ്ഥാനത്താണ് മുംബൈ.


രോഹിത് ശര്‍മ ഈ സീസണില്‍ ആദ്യമായി ഫോമിലെത്തിയ മല്‍സരം കൂടിയാണിത്.
ആറ് സിക്‌സറുകളും നാല് ഫോറുകളും പായിച്ച രോഹിത് റെക്കോഡ് നേട്ടത്തിനും അര്‍ഹനായി. ടി20യില്‍ ഒരു രാജ്യത്ത് ഏറ്റവും കൂടുതല്‍ സിക്സറുകള്‍ നേടി താരമായി മാറി. ഇന്ത്യന്‍ മണ്ണില്‍ 361 സിക്‌സറുകളാണ് രോഹിതിന്റെ പേരിലുള്ളത്. ഐപിഎല്‍, ആഭ്യന്തര ടൂര്‍ണമെന്റുകള്‍, ഇന്ത്യയില്‍ നടന്ന അന്താരാഷ്ട്ര മത്സരങ്ങള്‍ എന്നിവയുള്‍പ്പെടെ എല്ലാ ടി20 മല്‍സരങ്ങളും ഇതില്‍ ഉള്‍പ്പെടുന്നു.

സഞ്ജുവിന് ഒളിമ്പിക്‌സ് മെഡല്‍ നേടാന്‍ സുവര്‍ണാവസരം...! 2028 ഒളിമ്പിക്‌സില്‍ ടി20 ക്രിക്കറ്റും; ഉള്‍പ്പെടുത്തിയത് 128 വര്‍ഷങ്ങള്‍ക്ക് ശേഷം
വെസ്റ്റ് ഇന്‍ഡീസില്‍ 357 സിക്‌സറുകള്‍ നേടിയ ക്രിസ് ഗെയ്‌ലിനെ രോഹിത് രണ്ടാം സ്ഥാനത്തേക്ക് പിന്തള്ളി. വിരാട് കോഹ്ലി (ഇന്ത്യ 325), എംഎസ് ധോണി (ഇന്ത്യ 286), കീറോണ്‍ പൊള്ളാര്‍ഡ് (വെസ്റ്റ് ഇന്‍ഡീസ് 276), സഞ്ജു സാംസണ്‍ (ഇന്ത്യ 274), നിക്കോളാസ് പൂരന്‍ (വെസ്റ്റ് ഇന്‍ഡീസ് 271) എന്നിവരാണ് തുടര്‍ന്നുള്ള സ്ഥാനങ്ങളില്‍.

177 റണ്‍സ് വിജയലക്ഷ്യം പിന്തുടര്‍ന്ന എംഐക്ക് റയാന്‍ റിക്കല്‍റ്റണിന്റെ (24) വിക്കറ്റ് മാത്രമാണ് നഷ്ടമായത്. രോഹിതും സൂര്യകുമാര്‍ യാദവും ചേര്‍ന്ന് 26 പന്തുകള്‍ ശേഷിക്കെ ജയിച്ചുകയറി. രണ്ടാം വിക്കറ്റില്‍ ഇരുവരും 114 റണ്‍സിന്റെ അപരാജിത കൂട്ടുകെട്ടുണ്ടാക്കി.

ഹാര്‍ദിക് പാണ്ഡ്യയുടെ ബാറ്റിന്റെ പ്രശ്‌നമെന്ത്? അമ്പയര്‍ തടഞ്ഞുനിര്‍ത്തി പരിശോധിക്കാനുള്ള കാരണമിതാണ്
ഐപിഎല്ലില്‍ ചെന്നൈയ്ക്കെതിരായ എംഐയുടെ നാലാം സെഞ്ചുറി കൂട്ടുകെട്ടാണിത്. മൂന്ന് തവണയും രോഹിത് ഇതിന്റെ ഭാഗമായി. 2012ല്‍ സച്ചിന്‍ ടെണ്ടുല്‍ക്കറിനൊപ്പം 126 റണ്‍സ് (രണ്ടാം വിക്കറ്റിന്), 2015ല്‍ ലെന്‍ഡല്‍ സിമ്മണ്‍സിനൊപ്പം 119 റണ്‍സ് (രണ്ടാം വിക്കറ്റിന്) എന്നിവയാണ് രോഹിതിന്റെ മറ്റ് രണ്ട് പ്രകടനങ്ങള്‍.

ടോസ് നഷ്ടപ്പെട്ട് ബാറ്റ് ചെയ്ത സിഎസ്‌കെയ്ക്ക് വേണ്ടി രവീന്ദ്ര ജഡേജ (35 പന്തില്‍ 53*), ശിവം ദുബം (32 പന്തില്‍ 50), ആയുഷ് മാത്രെ (15 പന്തില്‍ 32), ഷെയ്ഖ് റഷീദ് (20 പന്തില്‍ 19) എന്നിവരാണ് കൂടുതല്‍ റണ്‍സ് നേടിയത്.