നടിക്കെതിരെ സൈബർ അറ്റാക്ക്; സ്ത്രീയ്ക്ക് എട്ട് മാസം തടവ്; സെലിബ്രേറ്റികളെ ആക്രമിക്കുന്നത് എന്റർടൈൻമെന്റ് ആക്കരുത്, ഇത് മാതൃക

Authored by: അശ്വിനി പി|Samayam Malayalam•5 Jul 2025, 5:22 pm

ഇന്ത്യയിൽ, പ്രത്യേകിച്ചും കേരളത്തിൽ സെലിബ്രേറ്റികൾ എന്നാൽ പൊതുസ്വത്താണ് എന്ന ധാരണ പലർക്കുമുണ്ട്. പരിചിതമായ മുഖങ്ങളെ കുറിച്ച് എന്തും പറയാം എന്നത് തങ്ങളുടെ അഭിപ്രായ സ്വാതന്ത്ര്യമായിട്ടാണ് പലരും കാണുന്നത്. ഒന്നും ചെയ്യാൻ വേണ്ടിയല്ലെങ്കിലും തല്ലും കൊല്ലും എന്നൊക്കെയുള്ള കമന്റുകൾ എന്റർടൈൻമെന്റിന് വേണ്ടി ഇടുന്നതാണ്. അങ്ങനെ നടിക്കെതിരെ കമന്റിട്ട ഒരു സ്ത്രീയ്ക്ക് എട്ട് മാസം തടവ് വിധിച്ചിരിയ്ക്കുകയാണ് കോടതി. സംഭവം ഇവിടെയല്ല, കൊറിയയിൽ ആണ്

ദി ബ്രൈഡ് ഓഫ് ഹബേക് എന്ന കെ-ഡ്രാമയിലൂടെ ശ്രദ്ധേയയായ നടി ഷിൻ സേ ക്യൂങ്ങിന് 35 വയസ്സുള്ള ഒരു സ്ത്രീയിൽ നിന്ന് മാസങ്ങളായി മോശം കമന്റുകളും ഭീഷണികളും വന്നുകൊണ്ടിരിയ്ക്കുകയായിരുന്നു. ഇതിനെ തുടർന്ന് നടി മാനനഷ്ട കേസ് ഫയൽ ചെയ്തു. കേസിൽ സ്ത്രീ കുറ്റക്കാരിയാണെന്ന് കണ്ടെത്തുകയും അവർക്ക് തടവ് ശിക്ഷ വിധിക്കുകയും ചെയ്തു. സൈബർ ബുള്ളിയിംഗിന്റെയും ഓൺലൈൻ ഉപദ്രവങ്ങളുടെയും ഗൗരവം കോടതി ചൂണ്ടികാണിച്ചു.

Also Read: ജങ്കൂക്കും വിന്ററും പ്രണയത്തിൽ! AESPA ന്റെയും BTS ന്റെയും ആരാധകർ ആകെ കൺഫ്യൂഷനിൽ, ഇത് സത്യമോ?

ഗുരുതരമായ മാനസികാഘാതം ഏൽപ്പിക്കുന്ന തരത്തിൽ, ആസിഡ് ആക്രമണം ഉൾപ്പെടെയുള്ള ഭീഷണികളും അധിക്ഷേപങ്ങളും അടങ്ങിയ ഏകദേശം 450 കമന്റുകളാണ് 35 കാരിയായ കിം എന്ന സ്ത്രീ സോഷ്യൽ മീഡിയയിൽ പോസ്റ്റ് ചെയ്തുകൊണ്ടിരുന്നത്. സോൾ ഈസ്റ്റേൺ ഡിസ്ട്രിക്റ്റ് കോടതി ഭീഷണിപ്പെടുത്തൽ, അപകീർത്തിപ്പെടുത്തൽ എന്നീ കുറ്റങ്ങൾക്ക് ചുമത്തി എട്ടുമാസം തടവ് ശിക്ഷ വിധിച്ചു. ഓൺലൈൻ അതിക്രമങ്ങൾ, പ്രത്യേകിച്ച് പൊതുമുഖങ്ങൾക്കെതിരെയുള്ള കേസുകളുടെ ഗൗരവം വിധി എടുത്തു കാണിക്കുന്നു. ഭീഷണികൾ നടപ്പിലാക്കാൻ യഥാർത്ഥ ഉദ്ദേശ്യമില്ലായിരുന്നെങ്കിൽ പോലും, സന്ദേശങ്ങളുടെ സ്വഭാവം ഗുരുതരമായ കുറ്റകൃത്യമാണെന്ന് ജഡ്ജി ലീ ഹോ ഡോങ് ഊന്നിപ്പറഞ്ഞു.


നേരത്തെ മാനനഷ്ടക്കേസിന്റെ വിധിയിൽ, പ്രതിയായ കിം കുറ്റക്കാരിയണെന്ന് തെളിയിക്കപ്പെട്ടിരുന്നു. ഇതിനെത്തുടർന്ന്, പ്രോസിക്യൂട്ടർ പ്രതിക്ക് 2 വർഷം തടവ് ശിക്ഷ ആവശ്യപ്പെട്ടു. കോടതി ഇരുവിഭാഗങ്ങളെയും കേൾക്കുകയും വിധി മറ്റൊരു ദിവസത്തേക്ക് മാറ്റിവെക്കുകയും ചെയ്തിരുന്നു. ജൂൺ 2-ന്, 8 മാസത്തെ തടവ് ശിക്ഷയുടെ അന്തിമ വിധി പ്രഖ്യാപിച്ചു. ഷിൻ സേ ക്യൂങ് ങിന് ശാരീരിക ഉപദ്രവം ഏൽപ്പിക്കാൻ കിമ്മിന് യഥാർത്ഥത്തിൽ ഉദ്ദേശ്യമില്ലായിരുന്നു എന്ന വസ്തുത കണക്കിലെടുത്താണ് ശിക്ഷയിൽ ഇളവു വരുത്തിയത്. വിധിയിൽ ഷിൻ സേ ക്യൂങ് തൃപ്തയാണെന്ന് നടിയുടെ ഏജൻസി അറിയിച്ചു.