നാണക്കേടിന്റെ ലോക റെക്കോഡുമായി രാജസ്ഥാൻ റോയൽസിന്റെ വിദേശ സൂപ്പർ താരം; ഫ്ലോപ് സീസണിൽ അതിദയനീയ റെക്കോഡ്

Curated by: ഗോകുൽ എസ്|Samayam Malayalam•21 May 2025, 1:11 pm

2025 സീസൺ ഇന്ത്യൻ പ്രീമിയർ ലീഗിൽ ( IPL 2025 ) ദയനീയ പ്രകടനമായിരുന്നു രാജസ്ഥാൻ റോയൽസിന്റേത്. പ്ലേ ഓഫ് കാണാതെ പുറത്തായ സീസണിൽ ആകെ നാല് കളികളിൽ മാത്രമാണ് അവർക്ക് വിജയിക്കാനായത്. കഴിഞ്ഞ മൂന്ന് സീസണുകളിലും മികച്ച രീതിയിൽ കളിച്ച റോയൽസ് ഇക്കുറി ആരാധകരെ പാടേ നിരാശപ്പെടുത്തി. വിദേശ താരങ്ങൾ ഉൾപ്പെടെയുള്ളാവരുടെ മോശം പ്രകടനം ഈ സീസണിൽ റോയൽസിന്റെ തിരിച്ചടിക്ക് പ്രധാന കാരണങ്ങളിൽ ഒന്നായിരുന്നു‌. ഇക്കഴിഞ്ഞ മെഗാ ലേലത്തിൽ വലിയ പ്രതീക്ഷകളോടെ രാജസ്ഥാൻ റോയൽസ് സ്വന്തമാക്കിയ വിദേശ താരങ്ങളിൽ പലരും ഇക്കുറി ഫ്ലോപ്പായി. അത്തരത്തിൽ പ്രതീക്ഷകൾക്ക് ഒത്തുയരാൻ സാധിക്കാതെ പോയ താരങ്ങളിൽ ഒരാളാണ് ഫസൽഹഖ് ഫാറൂഖി. രാജസ്ഥാൻ റോയൽസിനായി ഇത്തവണ അഞ്ച് മത്സരങ്ങൾ കളിച്ച ഈ അഫ്ഗാനിസ്താൻ പേസർ 210 റൺസ് വഴങ്ങിയെങ്കിലും ഒരു വിക്കറ്റ് പോലും നേടാനായില്ല. ഇതോടെ നാണക്കേടിന്റെ ഒരു ലോക റെക്കോഡും താരത്തിന് സ്വന്തമായി.


ഒരു ടി20 ടൂർണമെന്റിൽ ഒരു വിക്കറ്റ് പോലും വീഴ്ത്താതെ ഏറ്റവും കൂടുതൽ റൺസ് വഴങ്ങിയ ബൗളറെന്ന നാണക്കേടാണ് ഇപ്പോൾ ഈ അഫ്ഗാൻ താരത്തിന്റെ പേരിലായിരിക്കുന്നത്. വെസ്റ്റിൻഡീസ് താരം ജെറോം ടെയ്ലറിന്റെ പേരിലായിരുന്നു ഇത്രയും നാൾ ഇക്കാര്യത്തിലെ നാണക്കേട്. 2019 ലെ കരീബിയൻ പ്രീമിയർ ലീഗിൽ ജമൈക്കക്കായി വിക്കറ്റുകളൊന്നും നേടാൻ സാധിക്കാതിരുന്ന താരം 193 റൺസ് വിട്ടുകൊടുത്തിരുന്നു.

ആളിക്കത്തി വൈഭവും സഞ്ജുവും; രാജസ്ഥാന്‍ റോയല്‍സിന് വിജയത്തോടെ പടിയിറക്കം
ഇന്ത്യയുടെ ഇഷാന്ത് ശർമയാണ് ഈ ലിസ്റ്റിൽ മൂന്നാമത്. 2017 സീസൺ ഐപിഎല്ലിൽ 179 റൺസ് വഴങ്ങിയ ഇഷാന്തിന് വിക്കറ്റുകളൊന്നും നേടാൻ സാധിച്ചിരുന്നില്ല. അന്ന് പഞ്ചാബ് ഫ്രാഞ്ചൈസിയുടെ താരമായിരുന്നു അദ്ദേഹം.

അവസാന കളിക്കിടെ ആ കിടിലൻ ബാറ്റിങ് റെക്കോഡ് സ്വന്തമാക്കി സഞ്ജു സാംസൺ; രാജസ്ഥാൻ റോയൽസിൽ ഈ നേട്ടം കൈവരിക്കുന്ന ആദ്യ ബാറ്റർ
അതേ സമയം രാജസ്ഥാൻ റോയൽസിനെ സംബന്ധിച്ച് മറക്കാൻ മാത്രം ആഗ്രഹിക്കുന്ന ഐപിഎൽ സീസണാ‌ണ് 2025 ലേത്. മെഗാ ലേലം കഴിഞ്ഞപ്പോൾ തന്നെ ടീം ദുർബലമായിരുന്നു‌. സീസണിന്റെ തുടക്കം മുതൽ അവർ നിരാശപ്പെടുത്തുകയുംചെയ്തു. അനായാസം ജയിക്കാമായിരുന്ന നാലോളം മത്സരങ്ങളിലാണ് അവർ പടിക്കൽ കലമുടച്ചത്. ഈ കളികളിൽ പലതും തോൽക്കാൻ കാരണം ഫിനിഷർമാരുടെ നിരാശപ്പെടുത്തുന്ന പ്രകടനമായിരുന്നു. ഈ സീസണിലെ പിഴവുകളിൽ നിന്ന് പാഠമുൾക്കൊണ്ട് അടുത്ത സീസണിൽ റോയൽസ് ശക്തമായ തിരിച്ചുവരവ് നടത്തുമെന്ന പ്രതീക്ഷയിലാണ് ആരാധകർ.