പത്ത് വർഷത്തെ ബന്ധം പെറിയും ബ്ലൂമും വേർപിരിയുന്നു; 6 വർഷം മുൻപ് വിവാഹ നിശ്ചയം കഴിഞ്ഞിട്ടും, വിവാഹം കഴിക്കാത്തതിന്റെ കാരണം?

Authored by: അശ്വിനി പി|Samayam Malayalam•26 Jun 2025, 3:33 pm

പത്ത് വർഷം നീണ്ട ഒരുമിച്ചുള്ള ജീവിതം അവസാനിപ്പിക്കാനൊരുങ്ങി കേറ്റി പെറിയും ഓർലാന്റോ ബ്ലൂമും. ഇരുവരും പരസ്പരം ഒരുമിച്ചെടുത്ത തീരുമാനമാണ്, പക്ഷേ മുൻ ബന്ധത്തിലെ എന്നതു പോലെ അധികം വേദനയുള്ളതല്ല എന്നാണ് യു എസ് വീക്കിലി റിപ്പോർട്ട് ചെയ്യുന്നത്. വേർപിരിഞ്ഞാലും ഇരുവരും തമ്മിലുള്ള സൗഹൃദ ബന്ധം മുന്നോട്ട് പോകും.

വലിയ തർക്കങ്ങളില്ലാതെയാണ് ഇരുവരും വേർപിരിയുന്നത്. കേറ്റിന് വിഷമമുണ്ട്, പക്ഷേ മറ്റൊരു വിവാഹ മോചന പ്രോസസിലൂടെ കടന്ന് പോകേണ്ട എന്ന സമാധാനവും ഉണ്ട്. കഴിഞ്ഞ വിവാഹ ബന്ധത്തിൽ നിന്ന് വേർപിരിയുമ്പോൾ ഒരുപാട് അനുഭവിച്ചിരുന്നു. തന്റെ ജീവിതത്തിലെ ഏറ്റവും മോശം സമയമായിരുന്നു അത് എന്നാണ് കേറ്റ് പറഞ്ഞിട്ടുള്ളത്. ഇപ്പോഴത്തെ ബന്ധം നിയമപരമായി അല്ലാത്തതുകൊണ്ട് തന്നെ വിവാഹ മോചന നടപടികൾ നേരിടേണ്ടതില്ല.

Also Read: 36 വയസ്സായി, ഇനി ഞാൻ ഒരു കാമറയ്ക്ക് മുന്നിലും ഇരുന്ന് കരയില്ല, ആർക്കും ഇനി എന്നെ ഇമോഷണലായി തകർക്കാനും കഴിയില്ല; ചെയ്യാൻ ഒരുപാട് കാര്യങ്ങളുണ്ട് എന്ന് വീണ നായർ

കേറ്റി പെറിയും ഓർലാന്റോ ബ്ലൂമും മാസങ്ങളായി വേർപിരിഞ്ഞാണ് ജീവിയ്ക്കുന്നത്. കേറ്റി നിലവിൽ തന്റെ 'ലൈഫ് ടൈംസ്' ടൂറിലാണ്, ഈ സമയത്താണ് ഇരുവരും തമ്മിലുള്ള അകലം കൂടുതൽ പ്രകടമായതെന്ന് അടുത്ത വൃത്തങ്ങൾ പറയുന്നു. വേർപിരിയൽ ഗോസിപ്പുകൾ നേരത്തെ മുതൽ വന്നിരുന്നുവെങ്കിലും ഇരുവരും തങ്ങളുടെ സ്വകാര്യത പുറത്തുവിടാൻ തയ്യാറായിരുന്നില്ല.

കേറ്റി പെറിയും ഓർലാൻഡോ ബ്ലൂമും 2019 വാലന്റൈൻസ് ഡേയിൽ വിവാഹനിശ്ചയം നടത്തിയിരുന്നു. ആറ് വർഷത്തിലേറെയായി വിവാഹനിശ്ചയം കഴിഞ്ഞിട്ടും, ഇരുവരും വിവാഹത്തിനുള്ള ഒരുക്കങ്ങൾ പൂർത്തിയാക്കിയിരുന്നില്ല. വിവാഹത്തോടുള്ള താത്പര്യം ഓർലാന്റോ ബ്ലൂമിന് ഇല്ലായിരുന്നു എന്നാണ് റിപ്പോർട്ട്.


പെറിയും ബ്ലൂമും ആദ്യം ഡേറ്റ് ചെയ്യാൻ തുടങ്ങിയത് 2016 ജനുവരിയിലാണ്, ഗോൾഡൻ ഗ്ലോബ്സ് അഫ്റ്റർപാർട്ടികളിൽ ഇരുവരെയും ഒരുമിച്ച് കണ്ടതിന് പിന്നാലെയാണ് പ്രണയ ഗോസിപ്പുകൾ പുറത്തുവന്നത്. 2017 മാർച്ചിൽ അവർ കുറച്ചുകാലം വേർപിരിഞ്ഞെങ്കിലും 2018 ഫെബ്രുവരിയിൽ വീണ്ടും ഒന്നിച്ചു. 2020 മാർച്ചിൽ, പെറി താൻ ഗർഭിണിയാണെന്ന് പ്രഖ്യാപിച്ചു, അതേ വർഷം ഓഗസ്റ്റിൽ അവരുടെ മകൾ ഡെയ്സി ജനിച്ചു. ബ്ലൂം നേരത്തെ വിവാഹിതനാണ്, മിറാൻഡ കെറിൽ ആയിരുന്നു ഭാര്യ, 14 വയസ്സുള്ള ഫ്ലിൻ എന്നൊരു മകനുമുണ്ട്.