പരിക്കിനെ കുറിച്ച് സുപ്രധാന വെളിപ്പെടുത്തൽ നടത്തി സഞ്ജു; ആ കാര്യത്തിൽ മാനസിക ബുദ്ധിമുട്ടുകൾ ഉണ്ടായി എന്നും സഞ്ജു

Authored by: അനുഷ ഗംഗാധരൻ|Samayam Malayalam•18 May 2025, 9:00 am

പരിക്ക് തുടരെ തുടരെ വില്ലനായതോടെ ഐപിഎൽ 2025 സീസണിൽ വെറും 7 മത്സരങ്ങളിൽ മാത്രം ആണ് മലയാളി വിക്കറ്റ് കീപ്പർ ബാറ്റർ സഞ്ജു സാംസൺ രാജസ്ഥാൻ റോയൽസിനായി കളിച്ചത്. ഇതിൽ തന്നെ നായക സ്ഥാനം അലങ്കരിച്ചത് നാല് മത്സരങ്ങളിലാണ്. ഒരുപക്ഷെ രാജസ്ഥാൻ റോയൽസ് ഐപിഎൽ 2025ൽ നിന്ന് അതിവേഗം പുറത്തായത് സഞ്ജുവിന്റെ അസാന്നിധ്യമാണ് എന്ന് വിലയിരുത്തുന്നവരുമുണ്ട്.
RCB vs KKR: കളി മുടങ്ങിയാൽ ആർസിബിക്ക് പണി കിട്ടുമോ; പ്ലേ ഓഫ് യോഗ്യതയെ എങ്ങനെ ബാധിക്കും?
ഇന്നിപ്പോൾ രാജസ്ഥാൻ റോയൽസിന്റെ പ്രധാന ലക്ഷ്യം ഐപിഎൽ 2025 പോയിന്റ് പട്ടികയിൽ ഏറ്റവും അവസാന സ്ഥാനത്തെത്തി സീസൺ അവസാനിപ്പിക്കരുത് എന്നാണ്. അതേസമയം ഇന്ന് 3:30ന് രാജസ്ഥാന്റെ ഹോം ഗ്രൗണ്ടിൽ പഞ്ചാബിനെ നേരിടുന്ന മത്സരത്തിൽ സഞ്ജു പരിക്കിൽ നിന്ന് മുക്തനായി മൈതാനത്ത് ഇറങ്ങുമോ എന്നതാണ് ആരാധകർക്ക് അറിയേണ്ടത്. അതിനുള്ള ഉത്തരം സഞ്ജു സാംസൺ ഇപ്പോൾ നേരിട്ടെത്തി അറിയിച്ചിരിക്കുകയാണ്.

മത്സരത്തിന് മുന്നോടിയായി കഴിഞ്ഞ ദിവസം നടന്ന വാർത്ത സമ്മേളനത്തിനിടെയാണ് സഞ്ജു ഈ കാര്യത്തിൽ വ്യക്തത വരുത്തിയത്. തനിക്ക് ഫിറ്റ്നസ് സർട്ടിഫിക്കറ്റ് ലഭിച്ചു എന്നും പഞ്ചാബിനെ നേരിടാൻ താനും റോയൽസിനൊപ്പം ഉണ്ടാകും എന്നുമാണ് സഞ്ജു വാർത്താസമ്മേളനത്തിൽ പറഞ്ഞത്. സൂപ്പർ ഓവേറിലേക്ക് വരെ കടന്ന ഡൽഹി ക്യാപിറ്റൽസ് - രാജസ്ഥാൻ റോയൽസ് മത്സരത്തിനിടെയാണ് സഞ്ജു സാംസൺ വാരിയെല്ലിന് പരിക്കേറ്റ് റിട്ടയേർഡ് ഹർട്ട് ആകുന്നത്. അതിനു ശേഷം വൈഭവ് സൂര്യവംശി എന്ന താരം എത്തി റെക്കോഡുകൾ സ്വന്തമാക്കി എങ്കിലും റോയൽസിന് തിളങ്ങാൻ സാധിച്ചില്ല. ഇപ്പോൾ സഞ്ജു തിരിച്ചെത്തുന്നതോടെ പത്താം സ്ഥാനക്കാരായി സീസൺ അവസാനിപ്പിക്കരുത് എന്ന വാശിയാണ് റോയൽസിനുള്ളത്.

'ഞാൻ ഫിറ്റ്നസ് ടെസ്റ്റിൽ പാസ്സായി, റോയൽസിന്റെ അടുത്ത മത്സരം മുതൽ ഞാനും ഉണ്ടാകും. അതെ, 'നിരാശപ്പെടുത്തൽ' എന്നത് തീർച്ചയായും ശരിയായ പദമാണെന്ന് ഞാൻ കരുതുന്നു. ഡഗൗട്ടിൽ നിന്ന് മത്സരങ്ങൾ കാണുന്നത് വളരെ ബുദ്ധിമുട്ടുള്ളതും വെല്ലുവിളി നിറഞ്ഞതുമാണ്.

നിരവധി നിർണായക മത്സരങ്ങൾ എനിക്ക് നഷ്ടമായി, അത് കാര്യങ്ങൾ കൂടുതൽ കഠിനമാക്കി. ടീം തോൽക്കുന്നത് കാണുന്നതും കളിക്കളത്തിൽ സംഭാവന നൽകാൻ കഴിയാത്തതും മാനസികമായി ബുദ്ധിമുട്ടായിരുന്നു. എന്നാൽ ഇതെല്ലാം ഒരു ക്രിക്കറ്റ് കരിയറിന്റെ ഭാഗമാണ്. ഇപ്പോൾ പോസിറ്റീവുകളിൽ ശ്രദ്ധ കേന്ദ്രീകരിക്കാൻ ശ്രമിക്കുകയാണ്,' എന്ന് മത്സരത്തിന് മുമ്പുള്ള പത്രസമ്മേളനത്തിൽ സാംസൺ പറഞ്ഞു.

അതേസമയം രാജസ്ഥാൻ റോയൽസിന്റെ ഫാസ്റ്റ് ബൗളർ ജോഫ്രാ ആർച്ചർ പരിക്കിൽ നിന്ന് മുക്തനായോ എന്ന ചോദ്യത്തിനും അദ്ദേഹം ഉത്തരം നൽകി. നിലവിൽ ഫിറ്റ്നസ് തിരിച്ചെടുക്കാൻ സാധിച്ചിട്ടില്ലെന്നും കൊൽക്കത്ത നൈറ്റ് റൈഡേഴ്‌സ് മത്സരത്തിൽ കൈ വിരലിന് പരിക്കേറ്റ തരാം ഇപ്പോഴും വിശ്രമത്തിലാണ് എന്നും സഞ്ജു സ്ഥിരീകരിച്ചു.

ജോഫ്രാ ആർച്ചറിന് പകരം ആരെയായിരിക്കും റോയൽസ് പവർ പ്ലേ ഓവറുകളിൽ പന്തെറിയാൻ വിടുക എന്നതും കണ്ടറിയേണ്ടതുണ്ട്. അതേസമയം സഞ്ജു തിരിച്ചെത്തുന്നതോടെ പതിനാലുകാരൻ വൈഭവ് സൂര്യവംശിയുടെ പ്ലേയിങ് ഇലവനിലെ സ്ഥാനം എവിടെയായിരിക്കും എന്നാണ് ആരാധകർ ഇപ്പോൾ മുന്നോട്ടു വെക്കുന്ന ചോദ്യം.

ഒരുപക്ഷെ ഓപ്പണിങ്ങിൽ യശസ്വി ജൈസ്വാളും വൈഭവ് സൂര്യവംശിയും ഇറങ്ങുകയും കഴിഞ്ഞ സീസണുകളിലേതുപോലെ സഞ്ജു വൺ ഡൗൺ ആയി ഇറങ്ങാനും സാധ്യതയുണ്ട്. അതേസമയം പോയിന്റ് പട്ടികയിൽ മൂന്നാം സ്ഥാനത്തുള്ള പഞ്ചാബ് കിങ്സിന് ഇന്ന് നടക്കുന്ന മത്സരത്തിൽ ജയം അനിവാര്യമാണ്. മറുവശത്ത് അവസാന സ്ഥാനത്ത് ഫിനിഷ് ചെയ്യാതിരിക്കാൻ റോയൽസിനും ജയം അനിവാര്യമാണ്. അതുകൊണ്ടുതന്നെ വാശിയേറിയ ഒരു മത്സരമായിരിക്കും ഇന്ന് നടക്കുക.