'പാകിസ്താനില്‍ ആണെങ്കില്‍ അദ്ദേഹത്തെ പുറത്താക്കും'- വണ്ടര്‍ ബോയ് വൈഭവ് സൂര്യവന്‍ഷിയെ കുറിച്ച് മുന്‍ പാക് ക്രിക്കറ്റര്‍

Authored byനിഷാദ് അമീന്‍ | Samayam Malayalam | Updated: 23 Apr 2025, 12:29 am

ഐപിഎല്‍ അരങ്ങേറ്റത്തില്‍ തന്നെ നിരവധി റെക്കോഡുകള്‍ സ്വന്തമാക്കിയ അദ്ഭുത ബാലന്‍ വൈഭവ് സൂര്യവന്‍ഷിയെ (Vaibhav Suryavanshi) പ്രശംസിച്ച് മുന്‍ പാകിസ്താന്‍ ക്രിക്കറ്റ് താരം ബാസിത് അലി. 14 വര്‍ഷവും 23 ദിവസവും പ്രായമുള്ളപ്പോള്‍ ഐപിഎല്‍ കളിച്ച് വാര്‍ത്തകളില്‍ ഇടം നേടിയതോടെ വൈഭവിന്റെ ജനപ്രീതി അതിര്‍ത്തികള്‍ കടക്കുകയാണ്.

ഐപിഎല്ലില്‍ കളിക്കുന്ന പ്രായം കുറഞ്ഞ താരമായ വൈഭവ് അരങ്ങേറ്റത്തില്‍ തന്നെ നിരവധി റെക്കോഡുകള്‍ സ്വന്തമാക്കിയിരുന്നു. നേരിട്ട ആദ്യ പന്ത് തന്നെ സിക്‌സറിന് തൂക്കിയാണ് വൈഭവിന്റെ തുടക്കം. കന്നി ഐപിഎല്‍ മാച്ചില്‍ ഓപണറായി ഇറങ്ങി 30 റണ്‍സും നേടി. മൂന്ന് സിക്‌സറുകളും രണ്ട് ഫോറുകളും സഹിതമാണ് ഇത്രയും റണ്‍സ് നേടിയത്.

15 വയസ്സ് തികയുന്നതിന് മുമ്പ് ഐപിഎല്ലില്‍ 30+ റണ്‍സ് നേടുന്ന ആദ്യ താരമാണ്.
ടി20 ചരിത്രത്തില്‍ തന്നെ 30+ റണ്‍സ് നേടുന്ന ഏറ്റവും പ്രായം കുറഞ്ഞ കളിക്കാരനെന്ന റെക്കോഡിനും ഉടമയായി. 15 വയസ്സിന് മുമ്പ് ഐപിഎല്ലില്‍ ഒരു ഫോറും ഒരു സിക്‌സറും നേടുന്ന ആദ്യ താരമെന്ന നേട്ടവും കൈവരിച്ചു.

രാജസ്ഥാന്‍ റോയല്‍സിന് വേണ്ടിയാണ് വൈഭവ് പാഡണിയുന്നത്. ലഖ്നൗ സൂപ്പര്‍ ജയന്റ്സിനെതിരെ ആയിരുന്നു അരങ്ങേറ്റം. ഇംപാക്റ്റ് പ്ലെയറായാണ് ബാറ്റിങിനിറങ്ങിയത്. ആദ്യ പന്തില്‍ തന്നെ ഷാര്‍ദുല്‍ താക്കൂറിനെതിരെ സിക്സര്‍ നേടിയതുള്‍പ്പെടെ 14കാരന്റെ നിര്‍ഭയമായ തുടക്കം ബാസിത് അലിയുടെ പ്രശംസ പിടിച്ചുപറ്റി.

ഐപിഎല്ലില്‍ ഒത്തുകളി ആരോപണം: മറുപടിയുമായി സഞ്ജു സാംസണിന്റെ രാജസ്ഥാന്‍ റോയല്‍സ്
'14 വയസ്സുള്ള ഒരു കുട്ടി ആദ്യ പന്തില്‍ തന്നെ സിക്‌സര്‍ അടിച്ച രീതി ഏറെ സവിശേഷമാണ്. ആദ്യ പന്തില്‍ സിക്‌സ് അടിക്കാന്‍ ശ്രമിച്ച് പുറത്തായാല്‍ എന്ത് സംഭവിക്കുമായിരുന്നു? പാകിസ്താനിലാണെങ്കില്‍ അവനെ പുറത്താക്കൂ എന്ന് ആളുകള്‍ പറയും. എന്നാല്‍ യുവതാരങ്ങള്‍ക്ക് ഇങ്ങനെയാണ് ഇന്ത്യ ആത്മവിശ്വാസം നല്‍കുന്നത്. അത് പിന്നീട് ഫലം ചെയ്യും'- ബാസിത് തന്റെ യൂട്യൂബ് ചാനലില്‍ പറഞ്ഞു.

രോഹന്‍ കുന്നുമ്മലിന് കിടിലന്‍ സെഞ്ചുറി; ഒമാന്‍ പര്യടനത്തില്‍ കേരളത്തിന് വിജയത്തുടക്കം
വൈഭവിനെ 1.1 കോടി രൂപയ്ക്ക് ആണ് ആര്‍ആര്‍ ലേലത്തില്‍ പിടിച്ചത്. ബീഹാറില്‍ സാധാരണ കര്‍ഷക കുടുംബത്തില്‍ നിന്നാണ് ഉയര്‍ന്നുവന്നത്. മകന് ക്രിക്കറ്റ് സ്വപ്‌നങ്ങള്‍ പിന്തുടരാന്‍ സാമ്പത്തികമായി സഹായിക്കുന്നതിന് അദ്ദേഹത്തിന്റെ പിതാവ് സഞ്ജീവ് സൂര്യവന്‍ഷി തന്റെ കൃഷിയിടം വിറ്റു. വൈഭവിന്റെ കഠിന പരിശീലന രീതിയെയും പിന്തുണ നല്‍കുന്ന കുടുംബത്തെയും പ്രശംസിച്ച് വൈഭവിന്റെ പരിശീലകനായ മനീഷ് ഓജയാണ് മാധ്യമങ്ങളോട് ഇക്കാര്യങ്ങള്‍ വെളിപ്പെടുത്തിയത്.

ഐപിഎല്ലില്‍ ഓപണറായി ഇറങ്ങുമ്പോള്‍ ഫാസ്റ്റര്‍ ബൗളര്‍മാരെ നേരിടാന്‍ വൈഭവിന് റോയല്‍സ് പ്രത്യേക പരിശീലനം നല്‍കിയിരുന്നു. 150 കിലോമീറ്ററില്‍ കൂടുതല്‍ വേഗത്തില്‍ പന്തുകള്‍ എറിയാന്‍ കഴിയുന്ന മെഷീന്‍ ഉപയോഗിച്ചായിരുന്നു പരിശീലനം.