പ്ലേ ഓഫ് സാധ്യത നിലനിർത്താൻ പന്തിന്റെ ലക്‌നൗവിന് ജയം അനിവാര്യം; സർപ്രൈസ് നീക്കം നടത്തുമോ ലക്‌നൗ?

ലക്‌നൗ: ഐപിഎൽ 2025 സീസണിൽ ഇന്ന് ലക്‌നൗ സൂപ്പർ ജെയിന്റ്‌സും സൺറൈസേഴ്‌സ് ഹൈദരാബാദും തമ്മിൽ ഏറ്റുമുട്ടും. ലക്‌നൗവിന്റെ ഹോം ഗ്രൗണ്ടായ ഏകന ക്രിക്കറ്റ് സ്റ്റേഡിത്തിൽ വെച്ചാണ് ഇന്ന് മത്സരം നടക്കുക. ഇതിനകം ഐപിഎൽ 2025 സീസണിൽ നിന്ന് പുറത്തായ സൺറൈസേഴ്‌സ് ഹൈദരാബാദിന് ഈ മത്സരം നിർണായകമല്ല. എന്നാൽ ലക്‌നൗവിന്റെ കാര്യം അങ്ങനെയല്ല. സീസണിൽ ബാക്കിയുള്ള മൂന്ന് മത്സരങ്ങളിൽ ഒന്നിലെങ്കിലും പരാജയപ്പെട്ടാൽ ലക്‌നൗവിന് പ്ലേ ഓഫ് സാധ്യത നഷ്ടമാകും.
മൂന്നുപേർ പ്ലേ ഓഫ് ഉറപ്പിച്ചു, നാലാമനാകാൻ മൂന്ന് ടീമുകൾ; മുംബൈയോ ഡൽഹിയോ ലക്‌നൗവോ? പ്ലേ ഓഫ് എൻട്രി ആർക്ക് ലഭിക്കും
ഈ സീസണിൽ ഇതുവരെ 11 മത്സരങ്ങളിൽ നിന്നായി 5 മത്സരങ്ങൾ ജയിച്ച് 10 പോയിന്റുമായി ഏഴാം സ്ഥാനത്താണ് ലക്‌നൗ ഉള്ളത്. ഇനി 3 മത്സരങ്ങളാണ് ലക്‌നൗവിന് ഈ സീസണിൽ ബാക്കിയുള്ളത്. ഇതിൽ മൂന്ന് മത്സരങ്ങളിൽ ജയിച്ചാൽ മാത്രം പോരാ മുംബൈ ഇന്ത്യൻസ് ഒരു മത്സരത്തിൽ തോൽക്കുക കൂടി വേണം ഒപ്പം ഡൽഹിയും ഒരു മത്സരത്തിൽ തോൽക്കണം.

ഇനി മുംബൈയും ഡൽഹിയും ഓരോ മത്സരം വീതം തോൽക്കുകയും ലക്‌നൗ മൂന്ന് മത്സരങ്ങൾ ജയിക്കുകയും ചെയ്‌താൽ ഡൽഹി പ്ലേ ഓഫിലേക്ക് എത്താതെ പുറത്താകും. അങ്ങനെ വരുമ്പോൾ മുംബൈയും ലക്‌നൗവും 16 പോയിന്റ് വീതം നേടും. ഇത്തരം ഒരു സാഹചര്യം വന്നാൽ ഇരു ടീമുകളുടെയും നെറ്റ് റൺ റേറ്റ് നോക്കിയാകും നാലാംസ്ഥാനക്കാരനെ തീരുമാകിക്കുക. ഇരുവരിലും ആർക്കാണോ നെറ്റ് റൺ റേറ്റ് കൂടുതൽ ഉള്ളത് ആ ടീം പ്ലേ ഓഫ് ഉറപ്പിക്കും. അതുകൊണ്ടുതന്നെ ഇന്ന് നടക്കുന്ന മത്സരത്തിൽ ഋഷഭ് പന്ത് നയിക്കുന്ന ലക്‌നൗവിന് ജയം അനിവാര്യമാണ്. അതിനായി പല നിർണായക മാറ്റങ്ങളും ടീമിൽ സംഭവിച്ചേക്കാം. അതേസമയം ഇന്ന് നടക്കുന്ന മത്സരങ്ങളിൽ ഇരു ടീമുകളും നേരിടുന്ന വെല്ലുവിളികൾ എന്തൊക്കെയെന്നും ടീമുകളുടെ പ്ലേയിങ് ഇലവൻ സാധ്യതയും പരിശോധിക്കാം.

ലക്‌നൗ സൂപ്പർ ജെയിന്റ്സ് നേരിടുന്ന പ്രധാന വെല്ലുവിളികൾ

ഇന്ന് നടക്കുന്ന മത്സരത്തിൽ ജയം അല്ലാതെ മറ്റൊന്നും ലക്‌നൗ ലക്‌ഷ്യം വെക്കുന്നില്ല. കാരണം ഈ മത്സരത്തിൽ പരാജയപ്പെട്ടാൽ ലക്‌നൗ ഈ സീസണിൽ നിന്ന് പുറത്താകും. തുടർച്ചയായ മൂന്ന് പരാജയങ്ങൾ ഏറ്റുവാങ്ങിയാണ് ലക്‌നൗ ഇപ്പോൾ ഹൈദരാബാദിനെ നേരിടാൻ എത്തുന്നത്.

അതേസമയം ഈ സീസണിൽ ഇതിനു മുന്നേ ഇരു ടീമുകളും ഏറ്റുമുട്ടിയപ്പോൾ ജയം ലക്‌നൗവിന് ഒപ്പമായിരുന്നു. അന്ന് ആദ്യം ബാറ്റിങ്ങിന് ഇറങ്ങിയ ഹൈദരാബാദ് 9 വിക്കറ്റ് നഷ്ടത്തിൽ 190 എന്ന മികച്ച സ്കോർ നേടിയെങ്കിലും ലക്‌നൗ നിസാരമായി ആ ലക്ഷ്യം മറികടന്നു. 23 പന്തുകൾ ബാക്കി നിൽക്കെയാണ് ലക്‌നൗ ജയം സ്വന്തമാക്കിയത്.

ഇന്നും അതെ ഫോം, അല്ലെങ്കിൽ അതിലും മികച്ച ഫോമിൽ ഹൈദരാബാദിനെ നേരിടാൻ ഇറങ്ങിയാൽ ലക്‌നൗവിന് ജയം അനായാസം സ്വന്തമാക്കാൻ സാധിച്ചേക്കും. ഹൈദരാബാദിന്റെ മുൻ നിര ബാറ്റർമാരെ വളരെ പെട്ടന്ന് പവലിയനിലേക്ക് അയക്കുക എന്നതായിരിക്കണം ലക്‌നൗവിന്റെ ബൗളർമാരുടെ പ്രധാന ലക്ഷ്യം.

സൺറൈസേഴ്‌സ് ഹൈദരാബാദ് നേരിടുന്ന പ്രധാന വെല്ലുവിളികൾ

ഈ സീസണിൽ നിന്ന് പുറത്തായ മൂന്നാമത്തെ ടീം ആണ് സൺറൈസേഴ്‌സ് ഹൈദരാബാദ്. അതുകൊണ്ടുതന്നെ ഇന്ന് നടക്കുന്ന മത്സര ഫലം ടീമിന് യാതൊരു ചലങ്ങളും നൽകുന്നില്ല. എന്നാൽ ജയിച്ചാൽ ലക്‌നൗവിന്റെ പ്ലേ ഓഫ് പ്രതീക്ഷ തകർക്കാൻ സാധിക്കും.

11 മത്സരങ്ങളിൽ നിന്ന് ആകെ മൂന്ന് ജയം മാത്രം സ്വന്തമാക്കിയ ഹൈദരാബാദ് ഇപ്പോൾ എട്ടാം സ്ഥാനത്താണ്. അതേസമയം ജയം സ്വന്തമാക്കണമെങ്കിൽ ഹൈദരാബാദിന്റെ മുൻനിര ബട്ടർമാർ പടുകൂറ്റൻ സ്കോർ നേടേണ്ടതുണ്ട്. അത് സാധിക്കുന്ന ടീം തന്നെയാണ് ഹൈദരാബാദ് എന്ന് അവർ തെളിയിച്ചിട്ടും ഉണ്ട്. ഇത് ഒരിക്കൽ കൂടി ആവർത്തിച്ചാൽ അത് ലക്‌നൗവിനെ പ്രതിസന്ധിയിലാക്കും.

എൽഎസ്ജി - എസ്ആർഎച്ച് പിച്ച് റിപ്പോർട്ട്

ലക്‌നൗവിന്റെ ഹോം ഗ്രൗണ്ടായ ഏകന ക്രിക്കറ്റ് സ്റ്റേഡിത്തിൽ വെച്ചാണ് മത്സരം നടക്കുന്നത്. ബാറ്റിങ് സൗഹൃദമായ പിച്ച് ആണ് ഇവിടെയുള്ളത്. അതേസമയം പടുകൂറ്റൻ സ്കോർ നേടാൻ പലപ്പോഴും സാധിക്കാറില്ല. 180 റൺസാണ് ഒരു ടീമിന് ഇവിടെ നിന്നും നേടാൻ സാധിക്കുന്ന ശരാശരി സ്കോർ.

ലഖ്‌നൗ സൂപ്പർ ജയൻ്റ്‌സ് സാധ്യത പ്ലേയിങ് 11: എയ്ഡൻ മർക്രം, മിച്ചൽ മാർഷ്, നിക്കോളാസ് പൂരൻ, ഡേവിഡ് മില്ലർ, ഋഷഭ് പന്ത് (വിക്കറ്റ് കീപ്പർ), ആയുഷ് ബഡോണി, അബ്ദുൾ സമദ്, ദിഗ്വേഷ് സിംഗ്, പ്രിൻസ് യാദവ്, രവി ബിഷ്‌ണോയ്, ഷാർദുൽ താക്കൂർ

സൺറൈസേഴ്സ് ഹൈദരാബാദ് സാധ്യത പ്ലേയിങ് 11: അഭിഷേക് ശർമ്മ, കമിന്ദു മെൻഡിസ്, ഹെൻറിച്ച് ക്ലാസൻ, നിതീഷ് കുമാർ റെഡ്ഡി, ഇഷാൻ കിഷൻ (വിക്കറ്റ് കീപ്പർ), അനികേത് വർമ, പാറ്റ് കമ്മിൻസ്, ഹർഷൽ പട്ടേൽ, സീഷൻ അൻസാരി, മുഹമ്മദ് ഷമി, സിമർജീത് സിംഗ്