ബുംറയെ അടിച്ചോടിച്ച കരുൺ നായർ കുറിച്ചത് ഒരോവറിലെ മൂന്നാമത്തെ ഉയർന്ന സ്കോർ; ഉടക്കി ബുംറ, എല്ലാം ആസ്വദിച്ച് രോഹിത്

Edited byലിജിൻ കടുക്കാരം | Samayam Malayalam | Updated: 14 Apr 2025, 3:08 pm

ന്യൂഡൽഹി: എല്ലാ മത്സരങ്ങളിലും ജയിച്ച് മുന്നേറുകയായിരുന്ന ഡൽഹി ക്യാപിറ്റൽസ് ഒടുവിൽ വീണു. അതും അത്രയൊന്നും ഫോമിലല്ലാത്ത മുംബൈ ഇന്ത്യൻസിനോട്. ടി20 മത്സരങ്ങളുടെ ആവേശം നിറഞ്ഞുനിന്ന മത്സരത്തിൽ 12 റൺസിനായിരുന്നു മുംബൈയുടെ ജയം. കളി തോറ്റെങ്കിലും മടങ്ങിവരവിൽ തകർത്തടിച്ച കരുൺ നായരുടെ പ്രകടനമാണ് ഡൽഹിയ്ക്ക് സന്തോഷമേകുന്നത്. മുംബൈയുടെ സൂപ്പർതാരം ജസ്പ്രിത് ബുംറയ്ക്കെതിരെ തകർപ്പൻ ബാറ്റിങ്ങായിരുന്നു കരുൺ പുറത്തെടുത്തത്. ഇതിനുപിന്നാലെ കളത്തിൽ ബുംറ കരുണിനോട് ഉടക്കുകയും ചെയ്തു. മുംബൈ ഉയർത്തിയ 206 എന്ന വിജയലക്ഷ്യം പിന്തുടരുകയായിരുന്ന ഡൽഹി ഡല്‍ഹി ക്യാപിറ്റല്‍സിൻ്റെ ഇംപാക്ട് പ്ലെയറായാണ് കരുൺ നായർ കളത്തിലെത്തിയത്. 40 പന്തുകളിൽ നിന്ന് 89 റണ്‍സ് നേടുകയും ചെയ്തു. അഞ്ച് സിക്‌സും 12 ബൗണ്ടറിയും അടങ്ങുന്നതായിരുന്നു കരുണിൻ്റെ ഇന്നിങ്‌സ്. മൂന്നുവര്‍ഷങ്ങള്‍ക്കുശേഷം ഐപിഎല്ലിൽ ഇറങ്ങിയ കരുൺ ലീഗിലെ ഒരു മത്സരത്തിൽ നേടുന്ന ഏറ്റവും ഉയര്‍ന്ന സ്‌കോറാണിത്. 2016ല്‍ സണ്‍റൈസേഴ്‌സ് ഹൈദരാബാദിനെതിരേ നേടിയ 83 റൺസാണ് താരം ഇന്നലെ മറികടന്നത്.
തോൽവിക്ക്‌ ശേഷം അക്കാര്യം തുറന്ന് പറ‌ഞ്ഞ് സഞ്ജു സാംസൺ, രാജസ്ഥാൻ റോയൽസ് ക്യാപ്റ്റൻ മനസ്‌ തുറന്നത് ഇങ്ങനെ
ബുംറയെറിഞ്ഞ ആറാം ഓവറില്‍ 18 റണ്‍സാണ് കരുണ്‍ നേടിയത് രണ്ട് സിക്‌സും ഒരു ഫോറും ഉള്‍പ്പെടെയായിരുന്നു ഇത്. ഐപിഎലില്‍ ഒരു ഓവറില്‍ ഏതെങ്കിലും താരത്തിനെതിരെ ബുംറ വഴങ്ങുന്ന ഏറ്റവും ഉയര്‍ന്ന മൂന്നാമത്തെ സ്‌കോറാണിത്. 2022ൽ പാറ്റ് കമ്മിൻസ് - 26, 2018ൽ ബ്രാവോ - 20 റൺസും ബുംറയ്ക്കെതിരെ നേടിയിരുന്നു.

ഒരു ഐപിഎല്‍ മത്സരത്തിൽ ബുംറയ്‌ക്കെതിരേ ഒരിന്ത്യൻ താരം നേടുന്ന രണ്ടാമത്തെ ഏറ്റവും വലിയ സ്‌കോറും കരുൺ നായർ ഇന്നലെ സ്വന്തം പേരിൽ കുറിച്ചു. ബുംറയുടെ ഒന്‍പത് പന്തില്‍ 26 റണ്‍സാണ് കരുണ്‍ നേടിയത്. നേരത്തെ 16 പന്തില്‍ 27 റണ്‍സ് നേടിയ ശിഖര്‍ ധവാനാണ് ഈ കണക്കിൽ ഒന്നാമത്.

മത്സരത്തിനിടെ ബുംറ കരുൺ നായരുമായി വാഗ്വാദത്തിൽ ഇടപെട്ടതിനും സ്റ്റേഡിയം സാക്ഷ്യം വഹിച്ചു. കരുണിൻ്റെ ബാറ്റിൻ്റെ ചൂടറിഞ്ഞതിന് പിന്നാലെയാണ് ബുംറ താരത്തിനെതിരെ തിരിഞ്ഞത്. ബുംറയുടെ ഓവറിൽ രണ്ടാം റണ്ണിനുള്ള ഓട്ടത്തിനിടെ കരുൺ അറിയാതെ താരത്തിഴൻ്റെ ദേഹത്ത് ഉരസിയിരുന്നു. എന്നാൽ ബുംറയ്ക്ക് അത് അത്ര രസിച്ചില്ല. ഉടൻതന്നെ കരുണിനോട് കയർത്തുകൊണ്ട് താരത്തിൻ്റെ അടുത്തേക്ക് ബുംറ എത്തി. ഇരുവരും തമ്മിൽ വാക്പോരും നടന്നു. ഇതോടെ അംപയർമാരും മുംബൈ നായകൻ ഹാർദിക് പാണ്ഡ്യയും ഇടപെട്ടു.

തങ്ങൾക്കിടയിൽ സംഭവിച്ചതെന്താണെന്ന് കരുൺ പാണ്ഡ്യയോട് വിശദീകരിക്കുകയും ഹർദ്ദിക് കരുണിൻ്റെ തോളിൽത്തട്ടി ആശ്വസിപ്പിക്കുകയും ചെയ്തു. കരുൺ - ബുംറ വാക്പോരിനിടെ മുംബൈയുടെ സീനിയർ താരം രോഹിത് ശർമ ഇതെല്ലാം ആസ്വദിച്ച് കളത്തിൽ നിൽക്കുകയായിരുന്നു. രോഹിതിൻ്റെ രസകരകമായ പ്രതികരണം സമൂഹമാധ്യമങ്ങളിൽ ഇതിനോടകം വൈറലായിട്ടുണ്ട്.

സഞ്ജുവിന് എന്തുപറ്റി! വമ്പൻ നാണക്കേട്, ആ മോശം ലിസ്റ്റിൽ രണ്ടാമത്; രാജസ്ഥാൻ റോയൽസ് ആരാധകർ നിരാശയിൽ
2022 ഐപിഎൽ സീസണില്‍ രാജസ്ഥാന്‍ റോയല്‍സിൻ്റെ ഭാഗമായിരുന്ന കരുണ്‍, കൊല്‍ക്കത്ത നൈറ്റ് റൈഡേഴ്‌സിനെതിരെയാണ് അവസാന മത്സരം കളിച്ചത്. ഏഴ് വര്‍ഷങ്ങൾക്ക് ശേഷമാണ് അദ്ദേഹം ഐപിഎലില്‍ ഒരു അര്‍ധ സെഞ്ചുറി നേടിയത്. 2018 ല്‍ പഞ്ചാബ് കിങ്‌സിലായിരുന്നപ്പോൾ അന്നത്തെ ഡല്‍ഹി ഡെയര്‍ ഡെവിള്‍സിനെതിരേ 22 പന്തില്‍ നേടിയ അര്‍ധ സെഞ്ചുറിയാണ് അവസാനത്തേത്.