ബൗളർമാരെ അടിച്ചു പറത്തി സഞ്ജു സാംസൺ, രാജസ്ഥാൻ റോയൽസ് നായകന്റെ ലക്ഷ്യം കിടിലൻ തിരിച്ചുവരവ്; എതിരാളികൾ പഞ്ചാബ് കിങ്സ്

Curated by: ഗോകുൽ എസ്|Samayam Malayalam•17 May 2025, 7:37 pm

രാജസ്ഥാൻ റോയൽസ് നായകൻ സഞ്ജു സാംസണ് നിരാശ മാത്രം സമ്മാനിച്ച ഐപിഎൽ സീസണാണ് ഇത്തവണത്തേത്. പരിക്ക് മൂലം സീസണിലെ ആദ്യ മൂന്ന് കളികളിൽ സ്പെഷ്യലിസ്റ്റ് ബാറ്ററായി മാത്രം കളിച്ച സഞ്ജുവിന് രാജസ്ഥാൻ റോയൽസിന്റെ അവസാന അഞ്ച് മത്സരങ്ങളും പരിക്കിനെ തുടർന്ന് നഷ്ടമായി. ഇതെല്ലാം രാജസ്ഥാന്റെ പ്രകടനങ്ങളെ ശരിക്കും പിന്നോട്ടടിച്ചു. ടീം പ്ലേ ഓഫ് കാണാതെ പുറത്തായതിന് പ്രധാന കാരണങ്ങളിലൊന്നും സഞ്ജുവിന്റെ പരിക്കാണ്. ഇപ്പോളിതാ ഐപിഎൽ ഒരിടവേളക്ക് ശേഷം പുനരാരംഭിക്കുമ്പോൾ സഞ്ജുവിന്റെ തിരിച്ചുവരവും കാണാമെന്ന സന്തോഷത്തിലാണ് ആരാധകർ. ഞായറാഴ്ച പഞ്ചാബ് കിങ്സിന് എതിരെ നടക്കാനിരിക്കുന്ന മത്സരത്തിൽ സഞ്ജു രാജസ്ഥാൻ റോയൽസ് നിരയിലുണ്ടാകുമെന്നാണ് വിവരം.

തിരിച്ചുവരവ് മത്സരത്തിന് മുന്നോടിയായി തകൃതിയായി പരിശീലനം നടത്തുകയാണ് ഇപ്പോൾ സഞ്ജു. ജയ്പൂരിൽ ടീമിനൊപ്പം പരിശീലനം നടത്തുന്ന രാജസ്ഥാൻ റോയൽസ് നായകൻ മികച്ച ഫോമിൽ കളിക്കുന്നുണ്ടെന്നാണ് വിവരം. സഞ്ജു ബാറ്റിങ് പരിശീലനം നടത്തുന്നതിന്റെ വീഡിയോ രാജസ്ഥാൻ റോയൽസ് സമൂഹ മാധ്യമങ്ങളിൽ പങ്കുവെച്ചിരുന്നു. മികച്ച ഫോമിലാണ് സഞ്ജുവെന്ന് ഈ ക്ലിപ്പുകളിൽ നിന്ന് വ്യക്തം. റോയൽസിന്റെ പരിശീലന സെഷനിൽ അനായാസം താരം സിക്സറുകൾ പറത്തുന്നത് കാണാം. തിരിച്ചുവരവ് കളിയിലും ഇത്തരത്തിൽ സഞ്ജുവിൽ നിന്ന് മികച്ച പ്രകടനം ആരാധകർ പ്രതീക്ഷിക്കുന്നുണ്ട്.


സഞ്ജു ഈ സീസണിൽ: നേരത്തെ ഇംഗ്ലണ്ടിന് എതിരെ നടന്ന ടി20 പരമ്പരക്കിടെ പരിക്കേറ്റ സഞ്ജുവിന് ഐപിഎൽ 2025 ന്റെ തുടക്കത്തിൽ വിക്കറ്റ് കീപ്പറാകാനുള്ള ഫിറ്റ്നസ് ക്ലിയറൻസ് ലഭിച്ചിരുന്നില്ല. ഇതുകൊണ്ടു തന്നെ സീസണിലെ ആദ്യ മൂന്ന് കളികളിൽ ഇമ്പാക്ട് താരമായാണ് സഞ്ജു കളിച്ചത്‌. സഞ്ജുവിന്റെ അഭാവത്തിൽ റിയാൻ പരാഗാണ് ടീമിനെ നയിച്ചത്. ആദ്യ മൂന്ന് കളികൾക്ക് ശേഷം ക്ലിയറൻസ് ലഭിച്ച സഞ്ജു, റോയൽസിന്റെ നാലാം മത്സരത്തിൽ ക്യാപ്റ്റനായി തിരിച്ചെത്തി.

വെടിക്കെട്ട് ബാറ്റിങ്ങുമായി ഞെട്ടിച്ച് രാജസ്ഥാൻ റോയൽസിന്റെ പുതിയ വിദേശ താരം; ക്യാപ്റ്റൻ സഞ്ജുവും ത്രില്ലിൽ
ഏപ്രിൽ 16 ന് ഡെൽഹി ക്യാപിറ്റൽസിന് എതിരെ നടന്ന കളിക്കിടെ സഞ്ജുവിന് വീണ്ടും പരിക്കേറ്റു‌‌. ബാറ്റിങ്ങിനിടെ പരിക്ക് പറ്റിയ സഞ്ജു റിട്ടയേഡ് ഹർട്ടായി പുറത്തേക്ക് പോയി. ഈ പരിക്കിനെ തുടർന്ന് പിന്നീട് രാജസ്ഥാൻ റോയൽസ് കളിച്ച മത്സരങ്ങളെല്ലാം താരത്തിന് നഷ്ടമായി‌‌. സഞ്ജു പരിക്കേറ്റ് പുറത്തായ പശ്ചാത്തലത്തിൽ റിയാൻ പരാഗ് വീണ്ടും ടീമിന്റെ നായകനായി. സഞ്ജു പരിക്ക് പറ്റി പുറത്തായതിന് ശേഷം കളിച്ച അഞ്ച് മത്സരങ്ങളിൽ നാലിലും തോറ്റതോടെ രാജസ്ഥാൻ റോയൽസ് പ്ലേ ഓഫ് കാണാതെ പുറത്താവുകയും ചെയ്തു.

ഈ സീസണിൽ ഇനി നഷ്ടപ്പെടാൻ ഒന്നുമില്ലാത്ത ടീമാണ് രാജസ്ഥാൻ റോയൽസ്. നിലവിൽ ഒൻപതാം സ്ഥാനത്തുള്ള അവർ ശേഷിക്കുന്ന രണ്ട് കളികളിലും ജയം നേടി അഭിമാനത്തോടെ സീസൺ അവസാനിപ്പിക്കുകയാണ് ലക്ഷ്യമിടുന്നത്. സഞ്ജു പരിക്ക് മാറി തിരിച്ചെത്തുന്നതിലൂടെ ടീമിന്റെ നഷ്ടമായ ഊർജവും അവർക്ക് തിരികെ ലഭിക്കും‌.

അവസാനം ആ പുതിയ വിദേശ താരത്തെ കളിപ്പിക്കാൻ ഒരുങ്ങി രാജസ്ഥാൻ റോയൽസ്; കിടിലൻ ബൗളർക്ക് അടുത്ത കളിയിൽ അവസരം ലഭിച്ചേക്കും
പരിക്ക് മൂലം ഇക്കുറി അഞ്ച് മത്സരങ്ങളിൽ പുറത്തിരുന്ന രാജസ്ഥാൻ റോയൽസ് നായകൻ ആകെ ഏഴ് മത്സരങ്ങളിലാണ് കളത്തിൽ ഇറങ്ങിയത്. ഇതിൽ 37.33 ബാറ്റിങ് ശരാശരിയിൽ 224 റൺസാണ് താരത്തിന്റെ സമ്പാദ്യം. ആദ്യ കളിയിൽ സൺ റൈസേഴ്സ് ഹൈദരാബാദിന് എതിരെ നേടിയ 66 റൺസാണ് ഉയർന്ന സ്കോർ.

ഞായറാഴ്ച പഞ്ചാബ് കിങ്സിന് എതിരെ ഹോം ഗ്രൗണ്ടായ ജയ്പൂരിൽ വെച്ചാണ് രാജസ്ഥാൻ റോയൽസിന് മത്സരം. സീസണിലെ അവസാന കളിയിൽ ചെന്നൈ സൂപ്പർ കിങ്സാണ് രാജസ്ഥാന്റെ എതിരാളികൾ. മെയ് 20 ന് ഡെൽഹിയിലാണ് ഈ മത്സരം നടക്കുക.