മഴ വില്ലനായാൽ പണികിട്ടുക മുംബൈക്കോ അതോ ഡൽഹിക്കോ? ആരാധകരെ ആശങ്കയിലാക്കി മഴ സാധ്യത

Authored by: അനുഷ ഗംഗാധരൻ|Samayam Malayalam•20 May 2025, 3:30 pm

മുംബൈ ഇന്ത്യൻസ് ആരാധകരും ഡൽഹി ക്യാപിറ്റൽസ് ആരാധകരും ചങ്കിടിപ്പോടെ കാത്തിരിക്കുന്ന മത്സരമാണ് നാളെ നടക്കുന്ന മുംബൈ ഇന്ത്യാസ് - ഡൽഹി ക്യാപിറ്റൽസ് മത്സരം. ഈ മത്സരത്തിന്റെ ഫലം പ്ലേ ഓഫ് സാധ്യതകളെ സ്വാധിനിക്കും എന്നതുകൊണ്ടുതന്നെയാണ് ഇത് ഇത്ര നിർണായകമായതിന്റെ കാരണവും.
MI vs DC; മുൻ മത്സരത്തിലെ പിഴവ് ആവർത്തിച്ചാൽ പണികിട്ടും; നിർണായക മത്സരത്തിൽ ടീമുകൾ നേരിടുന്ന പ്രധാന വെല്ലുവിളികൾ
മുംബൈ ആണ് ജയിക്കുന്നത് എങ്കിൽ മുബൈ നേരിട്ട് പ്ലേ ഓഫിൽ എത്തും. ഇനി ഡൽഹി ക്യാപിറ്റൽസ് ആണ് ജയിക്കുന്നത് എങ്കിൽ വീണ്ടും ഇരു ടീമുകൾക്കും പ്ലേ ഓഫ് സാധ്യത നിലനിൽക്കും.

എന്നാൽ ഇപ്പോൾ ആരാധകരെ നിരാശയിലാഴ്ത്തുന്ന തരത്തിലുള്ള റിപ്പോർട്ടുകളാണ് വരുന്നത്. മുംബൈയുടെ ഹോം ഗ്രൗണ്ടായ വാങ്കഡെ സ്റ്റേഡിയത്തിൽ വെച്ചാണ് മുംബൈ ഇന്ത്യൻസ് - ഡൽഹി ക്യാപിറ്റൽസ് മത്സരം നടക്കുന്നത്. എന്നാൽ മത്സരം നടക്കുന്ന സമയം മഴ വില്ലനാകാനുള്ള സാധ്യത കൂടുതലാണ്. ഇത്തരത്തിൽ മഴയെ തുടർന്ന് മത്സരം നിർത്തിവെയ്ക്കാൻ ഇടയായാൽ ഇരുവരുടെയും പ്ലേ ഓഫ് സാധ്യതകളെ അത് ബാധിക്കുകയും ചെയ്യും. കാലാവസ്ഥ റിപ്പോർട്ട് പ്രകാരം മെയ് 25 വരെ ശക്തമായ മഴയ്ക്ക് സാധ്യത ഉണ്ട് എന്നാണ് സൂചന. അതുകൊണ്ടുതന്നെ മുംബൈ ഇന്ത്യൻസ് - ഡൽഹി ക്യാപിറ്റൽസ് മത്സരം മഴയെ തുടർന്ന് റദ്ദാക്കാനുള്ള സാധ്യത കൂടുതലാണ് എന്ന റിപ്പോർട്ടുകളും എത്തിയിരിക്കുകയാണ്.

നിലവിൽ ഐപിഎൽ 2025 സീസണിൽ ഗുജറാത്ത് ടൈറ്റൻസ്, റോയൽ ചലഞ്ചേഴ്‌സ് ബെഗളൂരു , പഞ്ചാബ് കിങ്‌സ് എന്നീ ടീമുകളാണ് പ്ലേ ഓഫ് ഉറപ്പിച്ചിരിക്കുന്നത്. ഇനി ഒരേ ഒരു ടീമിന് കൂടിയേ പ്ലേ ഓഫിലേക്ക് എത്താൻ സാധിക്കുകയുള്ളു. ആ ഒരു ടീം ആകാനുള്ള പോരാട്ടത്തിലാണ് ഡൽഹിയും മുംബൈയും. എന്നാൽ മഴ വില്ലനായാൽ കാര്യങ്ങൾ മാറി മറയും.

ഈ സീസണിൽ 12 മത്സരങ്ങളിൽ ഏഴ് ജയം സ്വന്തമാക്കി 14 പോയിന്റുമായി നാലാം സ്ഥാനത്താണ് മുംബൈ ഇന്ത്യൻസ്. 12 മത്സരങ്ങളിൽ നിന്ന് 6 ജയം സ്വന്തമാക്കി 13 പോയിന്റുമായി ഡൽഹി അഞ്ചാം സ്ഥാനത്തുണ്ട്. മഴയെ തുടർന്ന് മെയ് 21ന് മുംബൈ വാങ്കഡെ സ്റ്റേഡിയത്തിൽ വെച്ച് നടക്കുന്ന മത്സരം റദ്ദ് ചെയ്യുകയാണ് എങ്കിൽ ഇരു ടീമുകൾക്കും ഓരോ പോയിന്റ് വീതം ലഭിക്കും. മുംബൈയ്ക്ക് 15 പോയിന്റും ഡൽഹിയ്ക്ക് 14 പോയിന്റും ലഭിക്കുന്നതോടെ ഇരുവരുടെയും ഈ സീസണിലെ അവസാന മത്സരം നിർണായകമായി മാറും.

ഡൽഹി ക്യാപിറ്റൽസിന്റെ ഈ സീസണിലെ അവസാന മത്സരം മെയ് 24 ന് പഞ്ചാബ് കിങ്‌സുമായി ആണ് നടക്കുക. ഈ മത്സരത്തിൽ ഡൽഹി പരാജപെട്ടാൽ മുംബൈ ഇന്ത്യൻസ് 15 പോയിന്റുമായി പ്ലേ ഓഫ് ഉറപ്പിക്കും. ഇനി ഈ മത്സരത്തിൽ ഡൽഹി ജയിക്കുകയാണ് എങ്കിൽ പ്ലേ ഓഫ് ഉറപ്പിക്കാൻ ഡൽഹിക്ക് മുംബൈയുടെ സീസണിലെ അവസാന മത്സരത്തിന്റെ ഫലം കാത്തിരിക്കേണ്ടി വരും.

മെയ് 26 നാണ് മുംബൈയുടെ സീസണിലെ അവസാന മത്സരം നടക്കുക. ഇവിടെയും എതിരാളികൾ പഞ്ചാബ് കിങ്‌സ് തന്നെയാണ്. ഈ മത്സരത്തിൽ മുംബൈ ഇന്ത്യൻസ് പരാജപ്പെടുകയാണ് എങ്കിൽ ഡൽഹിയ്ക്ക് പ്ലേ ഓഫ് ഉറപ്പിക്കാം. എന്നാൽ മുംബൈ ജയിച്ചാൽ 17 പോയിന്റുമായി മുംബൈ പ്ലേ ഓഫ് ഉറപ്പിക്കും.

അതേസമയം മഴയെ തുടർന്ന് മുംബൈ ഇന്ത്യൻസും പഞ്ചാബ് കിങ്‌സുമായുള്ള മത്സരം റദ്ദ് ആവുകയാണ് എങ്കിൽ മുംബൈയുടെയും ഡല്ഹിയുടെയും പോയിന്റ് 16 വീതമാകും. അങ്ങനെ വന്നാൽ നെറ്റ് റൺ റേറ്റിന്റെ അടിത്തനത്തിലാകും പ്ലേ ഓഫ് ഉറപ്പിക്കുന്ന ടീമിനെ നിശ്ചയിക്കുക.