മുംബെെക്കും ആര്‍സിബിക്കും പണി കിട്ടുമോ? ഒന്നും രണ്ടും സ്ഥാനങ്ങളാണ് ലക്ഷ്യം; സാധ്യതകള്‍ ഇങ്ങനെ

Authored by: സൈഫുദ്ധീൻ ടി എം|Samayam Malayalam•26 May 2025, 11:55 am

2025 ഐപിഎല്‍ സീസണിലെ (IPL 2025) ലീഗ് ഘട്ടം നാടകീയമായ അന്ത്യത്തിലേക്ക് കടക്കുകയാണ്. റോയല്‍ ചലഞ്ചേഴ്സ് ബെംഗളുരു, മുംബൈ ഇന്ത്യന്‍സ്, ഗുജറാത്ത് ടൈറ്റന്‍സ്, പഞ്ചാബ് കിങ്സ് എന്നീ ടീമുകളാണ് പ്ലേ ഓഫിലെത്തിയിരിക്കുന്നത്. എന്നാല്‍ രണ്ട് മത്സരങ്ങള്‍ മാത്രം ബാക്കിയുള്ളപ്പോളും ആദ്യ രണ്ട് സ്ഥാനങ്ങളില്‍ ഫിനിഷ് ചെയ്യുന്ന ടീമുകള്‍ ഏതൊക്കെയാണെന്ന കാര്യത്തില്‍ ഉറപ്പായിട്ടില്ല. ഒന്നാം സ്ഥാനത്തും രണ്ടാം സ്ഥാനത്തും ഫിനിഷ് ചെയ്യുന്ന ടീമുകള്‍ക്ക് നേരിട്ട് ക്വാളിഫയര്‍ കളിക്കാനാകും. ഈ മത്സരത്തില്‍ തോറ്റാലും ഫൈനലിലേക്ക് കടക്കാന്‍ രണ്ടാം ക്വാളിഫയര്‍ മത്സരത്തിലും കളിക്കാന്‍ അവസരം ലഭിക്കും. എന്നാല്‍ മൂന്നോ നാലോ സ്ഥാനത്താണ് ഫിനിഷ് ചെയ്യുന്നതെങ്കില്‍ എലിമിനേറ്ററില്‍ ഏറ്റുമുട്ടേണ്ടതായി വരും. അതുകൊണ്ട് തന്നെ ആദ്യ രണ്ട് സ്ഥാനങ്ങള്‍ തന്നെയാണ് പ്ലേ ഓഫിലെത്തിയ നാല് ടീമുകളുടെയും ലക്ഷ്യം.

ബാറ്റിങ്ങിലെ വെടിക്കെട്ട് റെക്കോഡ് സ്വന്തമാക്കി അഭിഷേക് ശർമ, ഐപിഎല്ലിൽ ഇതാദ്യം; ആക്രമണ ബാറ്റിങ്ങ് സമ്മാനിച്ച നേട്ടം ഇങ്ങനെ
ആര്‍സിബിയെ സണ്‍റൈസേഴ്സ് ഹൈദരാബാദും പഞ്ചാബ് കിങ്സിനെ ഡല്‍ഹി ക്യാപിറ്റല്‍സും ഗുജറാത്തിനെ ചെന്നെെ സൂപ്പര്‍ കിങ്സും പരാജയപ്പെടുത്തിയോടെ ഐപിഎല്‍ ലീഗ് ഘട്ടത്തിന്‍റെ അവസാനം ആവേശകരമായി മാറിയിരിക്കുകയാണ്. ഓരോ ടീമുകളുടെയും ആദ്യ രണ്ട് സ്ഥാനങ്ങളില്‍ എത്താനുള്ള സാധ്യതകളാണ് ഇവിടെ വിലയിരുത്തുന്നത്.

ഗുജറാത്ത് ടൈറ്റന്‍സ്

14 മത്സരങ്ങളില്‍ നിന്ന് 18 പോയിന്‍റുമായി നില്‍ക്കുന്ന ഗുജറാത്ത് ടൈറ്റന്‍സാണ് നിലവില്‍ പോയിന്‍റ് പട്ടികയില്‍ ഒന്നാമത്. 12 മത്സരങ്ങള്‍ പൂര്‍ത്തിയായ സമയത്ത് തന്നെ 18 പോയിന്‍റ് സ്വന്തമാക്കിയിരുന്ന ഗുജറാത്ത് എതിരാളികളേക്കാള്‍ ബഹുദൂരം മുന്നിലായിരുന്നു. എന്നാല്‍ തുടരെത്തുടരെ രണ്ട് തോല്‍വികള്‍ ഏറ്റുവാങ്ങിയത് അവര്‍ക്ക് തിരിച്ചടിയായി. ഇനി മത്സരങ്ങളൊന്നും ഇല്ലാത്തതിനാല്‍ ഗുജറാത്തിന് കാര്യങ്ങള്‍ എളുപ്പമല്ല. ഗുജറാത്ത് ആദ്യ രണ്ട് സ്ഥാനങ്ങളില്‍ ഇനി ഫിനിഷ് ചെയ്യണമെങ്കില്‍ പഞ്ചാബും ആര്‍സിബിയും അവസാന മത്സരങ്ങളില്‍ പരാജയപ്പെടണം.

പഞ്ചാബ് കിങ്സ്

13 മത്സരങ്ങളില്‍ നിന്ന് 17 പോയിന്‍റാണ് പഞ്ചാബിന്‍റെ സമ്പാദ്യം. മുംബെെ ഇന്ത്യന്‍സിനെതിരെ ഒരു മത്സരം അവര്‍ക്ക് ഇനി കളിക്കാനുണ്ട്. ഈ മത്സരത്തില്‍ വിജയിക്കാനായാല്‍ പഞ്ചാബിന് ആദ്യ രണ്ട് സ്ഥാനങ്ങളില്‍ ഫിനിഷ് ചെയ്യാനാകും. ആര്‍സിബി അവസാന മത്സരത്തില്‍ പരാജയപ്പെടുക കൂടി ചെയ്താല്‍ ഒരുപക്ഷേ പഞ്ചാബിന് ഒന്നാം സ്ഥാനത്ത് ഫിനിഷ് ചെയ്യാനുള്ള അവസരവുമുണ്ട്.

ആ വമ്പൻ നാണക്കേടിൽ നിന്ന് കഷ്ടിച്ച് രക്ഷപ്പെട്ട് സഞ്ജുവിന്റെ രാജസ്ഥാൻ റോയൽസ്; ജയിച്ചിട്ടും പണി വാങ്ങി ചെന്നൈ സൂപ്പർ കിങ്സ്

റോയല്‍ ചലഞ്ചേഴ്സ് ബെംഗളുരു

പഞ്ചാബിനെ പോലെ തന്നെ 13 മത്സരങ്ങളില്‍ നിന്ന് 17 പോയിന്‍റാണ് ബെംഗളുരുവും നേടിയിട്ടുള്ളത്. ലഖ്നൗ സൂപ്പര്‍ ജയന്‍റ്സിനെതിരെ ഒരു മത്സരമാണ് ബെംഗളുരുവിന് ഇനി ബാക്കിയുള്ളത്. ആദ്യ രണ്ട് സ്ഥാനങ്ങളില്‍ ഫിനിഷ് ചെയ്യാന്‍ ബെംഗളുരുവിന് ഈ മത്സരം വിജയിച്ചാല്‍ മതി. ആര്‍സിബി ഈ മത്സരത്തില്‍ വിജയിക്കുകയും പഞ്ചാബ് തോല്‍ക്കുകയും ചെയ്താല്‍ ഒന്നാം സ്ഥാനത്ത് ഫിനിഷ് ചെയ്യാനും ആര്‍സിബിക്ക് സാധിക്കും.

മുംബെെ ഇന്ത്യന്‍സ്

13 മത്സരങ്ങളില്‍ നിന്ന് 16 പോയിന്‍റ് സ്വന്തമാക്കിയ മുംബെെ ഇന്ത്യന്‍സിന് ഇനി പഞ്ചാബിനെതിരെയാണ് ഒരു മത്സരം അവശേഷിക്കുന്നത്. ഈ മത്സരം വിജയിക്കുകയാണെങ്കില്‍ അവര്‍ക്ക് 18 പോയിന്‍റ് നേടാനാകും. ആര്‍സിബി ലഖ്നൗവിനെതിരെ പരാജയപ്പെടുക കൂടി ചെയ്താല്‍ ആദ്യ രണ്ട് സ്ഥാനങ്ങളിലൊന്ന് മുംബെെക്ക് ലഭിക്കും. ഇനി ആര്‍സിബി വിജയിക്കുകയാണെങ്കില്‍ നിലവില്‍ ഗുജറാത്തിനേക്കാള്‍ നെറ്റ് റണ്‍റേറ്റുള്ളത് മുംബെെക്ക് നേട്ടമാകും.