മൂന്നുപേർ പ്ലേ ഓഫ് ഉറപ്പിച്ചു, നാലാമനാകാൻ മൂന്ന് ടീമുകൾ; മുംബൈയോ ഡൽഹിയോ ലക്‌നൗവോ? പ്ലേ ഓഫ് എൻട്രി ആർക്ക് ലഭിക്കും

Authored by: അനുഷ ഗംഗാധരൻ|Samayam Malayalam•19 May 2025, 10:16 am

ഇന്ത്യൻ പ്രീമിയർ ലീഗ് പതിനെട്ടാം പതിപ്പ് കൊട്ടിക്കലാശത്തിലേക്ക് അടുക്കാൻ ഇനി വിരലില്ലെണ്ണാവുന്ന മത്സരങ്ങൾ മാത്രമാണ് ബാക്കിയുള്ളത്. കഴിഞ്ഞ ദിവസം നടന്ന മത്സര ഫലങ്ങളോടെ 3 ടീമുകൾ പ്ലേ ഓഫ് യോഗ്യത്ത നേടിയിരിക്കുകയാണ്.
ഡൽഹി മുന്നോട്ടുവെച്ച ലക്ഷ്യം അനായാസം മറികടന്ന് ഗുജറാത്ത്; ഗില്ലും സുദർശനും തകർത്തടിച്ചതോടെ ഗുജറാത്ത് ഉറപ്പിച്ചത് പ്ലേ ഓഫ്
ഐപിഎൽ 2025 പോയിന്റ് പട്ടികയിൽ 12 മത്സരങ്ങളിൽ നിന്ന് 18 പോയിന്റുമായി ശുഭ്മാൻ ഗിൽ നയിക്കുന്ന ഗുജറാത്ത് ടൈറ്റൻസാണ് ഒന്നാം സ്ഥാനത്ത്. 17 പോയിന്റുകൾ വീതം നേടി റോയൽ ചലഞ്ചേഴ്‌സ് ബെംഗളൂരുവും പഞ്ചാബ് കിങ്‌സും യഥാക്രമം 2 , 3 സ്ഥാനങ്ങൾ സ്വന്തമാക്കി. ഇനി അറിയേണ്ടത് പ്ലേ ഓഫിലെത്തേണ്ട നാലാമൻ ആരാണ് എന്നാണ്.

പ്ലേ ഓഫിൽ എത്തിയാലും ടേബിൾ ടോപ്പിൽ നിൽക്കുന്ന ഈ മൂന്ന് ടീമുകളുടെയും ഓട്ടം അവസാനിച്ചിട്ടില്ല. ആദ്യ സ്ഥാനത്തേക്ക് എത്താനുള്ള മത്സരം ഇനിയും തുടരേണ്ടതുണ്ട്. ഈ മൂന്ന് ടീമുകൾക്കും ഇനി 2 മത്സരങ്ങൾ വീതം ബാക്കിയുണ്ട്. ഈ രണ്ടിലും ജയം സ്വന്തമാക്കി ടേബിൾ ടോപ്പിൽ എത്തി ഫൈനൽ കടമ്പ ലളിതമാക്കാനാണ് മൂവരും ഒരുപോലെ പ്രതീക്ഷിക്കുന്നത്. പ്ലേ ഓഫിലേക്ക് എത്തുന്ന ആദ്യ രണ്ടു ടീമുകൾ തമ്മിൽ നടക്കുന്ന മത്സരത്തിൽ ജയിക്കുന്ന ടീമിന് നേരെ ഫൈനലിലേക്ക് കടക്കാൻ സാധിക്കും. പിന്നീട് നടക്കുന്ന എലിമിനേറ്റർ മത്സരത്തിൽ ജയിക്കുന്ന ടീമിന് ആദ്യം നടന്ന ക്വാളിഫയർ മത്സരത്തിൽ പരാജയപ്പെട്ട ടീമിനെ നേരിടേണ്ടതുണ്ട്. ഇവരിൽ ആരാണോ ജയിക്കുന്നത് അവർ ഫൈനലിൽ എത്തും. അതുകൊണ്ടു തന്നെ ആദ്യ രണ്ട് സ്ഥാനങ്ങളിൽ എത്തുക എന്നത് ഓരോ ടീമിന്റെയും ആവശ്യമാണ്. ഇനി രണ്ട് മത്സരങ്ങൾ ബാക്കി നിൽക്കുമ്പോൾ മൂവർക്കും അതിനുള്ള അവസരം ഇപ്പോഴും ഉണ്ട്.

അതേസമയം പ്ലേ ഓഫിലേക്ക് കടക്കാൻ ഇനി ഒരു ടീമിന് കൂടി സാധിക്കും അത് ആര് എന്നതാണ് ഇനി അറിയേണ്ടത്. നിലവിൽ പ്ലേ ഓഫ് സാധ്യത നിലനിൽക്കുന്ന മൂന്ന് ടീമുകളാണ് ഉള്ളത്. മുംബൈ ഇന്ത്യൻസ് , ഡൽഹി ക്യാപിറ്റൽസ്, ലക്‌നൗ സൂപ്പർ ജെയ്ന്റ്സ് എന്നീ ടീമുകളാണ് ഇപ്പോഴും സാധ്യത നിലനിൽക്കുന്ന മൂന്ന് ടീമുകൾ. ഈ മൂന്ന് ടീമുകൾക്ക് എങ്ങനെ പ്ലേ ഓഫ് ഉറപ്പിക്കാം എന്ന് പരിശോധിക്കാം.

മുംബൈ ഇന്ത്യൻസിന്റെ പ്ലേ ഓഫ് സാധ്യത

ഐപിഎൽ സീസണുകളിൽ മുംബൈയുടെ ഒരു പതിവ് രീതിയാണ് സീസണിന്റെ ആദ്യ മത്സരങ്ങളിൽ തോൽക്കുകയും പിന്നീട് വലിയ മാർജിനിൽ ജയം സ്വന്തമാക്കി പ്ലേ ഓഫിലേക്ക് എത്തുന്നതും. ഈ സീസണിലും മുംബൈ അതെ രീതിയിലാണ് മുന്നോട്ട് നീങ്ങിയത്.

ആദ്യ കളിയിൽ തുടർ പരാജയങ്ങൾ ഏറ്റുവാങ്ങിയ മുംബൈ പിന്നീട് വലിയ മാർജിനിൽ ജയിച്ചു. അതിൽ തന്നെ രാജസ്ഥാൻ റോയൽസുമായി നടന്ന മത്സരത്തിൽ 100 റൺസ് വ്യത്യാസത്തിൽ ജയിച്ച മുംബൈ ഒരുഘട്ടത്തിൽ ടേബിൾ ടോപ്പിൽ എത്തിയിരുന്നു.

ഇന്നിപ്പോൾ 12 മത്സരങ്ങളിൽ നിന്ന് 7 ജയം സ്വന്തമാക്കി 14 പോയിന്റ് നേടി ഐപിഎൽ 2025 പോയിന്റ് ടേബിളിൽ നാലാം സ്ഥാനത്താണ് മുംബൈ ഉള്ളത്. ഇനി മുംബൈയ്ക്ക് ബാക്കിയുള്ളത് രണ്ട് മത്സരങ്ങളാണ്. ഈ രണ്ട് മത്സരങ്ങളിലും ജയിച്ച് 4 പോയിന്റ് കൂടി ലഭിച്ചാൽ 18 പോയിന്റ് നേടാൻ മുംബൈയ്ക്ക് സാധിക്കും.

എന്നാൽ ഉയർന്ന റൺ റേറ്റ് ഉള്ള മുംബൈയ്ക്ക് ഡെൽഹിയുമായുള്ള അടുത്ത മത്സത്തിൽ ജയിച്ചാൽ പ്ലേ ഓഫ് ഉറപ്പിക്കാൻ സാധിക്കും. പിന്നീട് മറ്റ് രണ്ട് ടീമുകളുടെ ഫലം കാത്തിരിക്കേണ്ട ആവശ്യം മുംബൈയ്ക്ക് ഇല്ല.

ഡൽഹി ക്യാപിറ്റൽസിന്റെ പ്ലേ ഓഫ് സാധ്യത

കഴിഞ്ഞ ദിവസം നടന്ന മത്സരത്തിൽ ഗുജറാത്ത് ടൈറ്റൻസിനോട് പരാജയപ്പെട്ടതോടെ അഞ്ചാം സ്ഥാനത്ത് തുടരുകയാണ് ഡൽഹി ക്യാപിറ്റൽസ്. 12 മത്സരങ്ങളിൽ നിന്ന് 13 പോയിന്റ് ആണ് ഡൽഹി ഇതുവരെ നേടിയത്. ഇനി ബാക്കിയുള്ള രണ്ട് മത്സരങ്ങൾ ജയിക്കേണ്ടത് ഡൽഹിയെ സംബന്ധിച്ച് അനിവാര്യമാണ്.

എങ്കിൽ മാത്രമേ 17 എന്ന പോയിന്റിലേക്ക് ഡൽഹി എത്തുകയുള്ളൂ. ഇതിൽ ആദ്യം മുംബൈയും ആയുള്ള മത്സരമാണ് നടക്കുക ഈ മത്സരത്തിൽ ഡൽഹിയ്ക്ക് ജയിക്കാൻ സാധിച്ചാൽ മാത്രമേ പ്ലേ ഓഫ് സാധ്യത നിലനിൽക്കുകയുള്ളൂ. മാത്രവുമല്ല മുംബൈ പഞ്ചാബ് മത്സരത്തിൽ കൂടി മുംബൈ പരാജപ്പെടുകയും ലക്‌നൗവും ഏതെങ്കിലും ഒരു മത്സരത്തിൽ പരാജയപ്പെടുകയും ചെയ്താൽ പിന്നെ ഡൽഹിയ്ക്ക് കാര്യങ്ങൾ എളുപ്പമായി.

ലക്‌നൗ സൂപ്പർ ജെയിന്റ്‌സിന്റെ പ്ലേ ഓഫ് സാധ്യത

പ്ലേ ഓഫ് സാധ്യത ഏറ്റവും കുറവുള്ള ടീം ആണ് ലക്‌നൗ. ഈ സീസണിൽ ഇനി മൂന്ന് മത്സരങ്ങൾ ബാക്കിയുണ്ട് എങ്കിലും ഈ മൂന്നിലും ജയിച്ചാൽ മാത്രം പോരാ മുംബൈയുടെയും ഡൽഹിയുടെയും മത്സരഫലങ്ങൾ കൂടി അറിയേണ്ടതുണ്ട്.

ഇതിൽ തന്നെ മുംബൈയും ഡൽഹിയും തമ്മിൽ നടക്കുന്ന മത്സരത്തിൽ മുംബൈ ജയിക്കുകയും പഞ്ചാബുമായി നടക്കുന്ന അവസാന മത്സരത്തിൽ മുംബൈ പരാജപ്പെടുകയും ചെയ്താൽ ലക്‌നൗവിന് ഒരു സാധ്യത ബാക്കി നിൽക്കും.കാരണം അങ്ങനെ വരുമ്പോൾ നെറ്റ് റൺ റേറ്റ് നോക്കിയാകും ക്വാളിഫയറെ തിരഞ്ഞെടുക്കുക. മൂന്ന് മത്സരങ്ങളിൽ ഏതെങ്കിലും ഒന്നിൽ ലക്‌നൗ പരാജപെട്ടാൽ ഈ സാധ്യതയും അസ്തമിക്കും.