രാജസ്ഥാ‌ൻ റോയൽസ് നടത്തിയ ആ പരീക്ഷണം വൻ ഫ്ലോപ്പായി; കട്ട കലിപ്പിൽ ആരാധകർ രംഗത്ത്, സഞ്ജുവിന്റെ ടീമിനെതിരെ വിമർശനം

Curated byഗോകുൽ എസ് | Samayam Malayalam | Updated: 27 Mar 2025, 12:15 am

Samayam Malayalamരാജസ്ഥാൻ റോയൽസ്

ഇന്ത്യൻ പ്രീമിയർ ലീഗിലെ ( IPL 2025 ) രണ്ടാമത്തെ കളിയിലും പരാജയം രുചിച്ചിരിക്കുകയാണ് രാജസ്ഥാ‌‌ൻ റോയൽസ് ( Rajasthan Royals ). ബുധനാഴ്ച കൊൽക്കത്ത നൈറ്റ് റൈഡേഴ്സിന് എതിരെ നടന്ന മത്സരത്തിൽ എട്ട് വിക്കറ്റിന്റെ തോൽവിയാണ് സഞ്ജുവിന്റെ ടീം ഏറ്റുവാങ്ങിയത്. മത്സരത്തിൽ ആദ്യം ബാറ്റ് ചെയ്ത രാജസ്ഥാ‌ൻ റോയൽസ് 151/9 എന്ന‌ സ്കോർ നേടിയപ്പോൾ, കൊൽക്കത്ത നൈറ്റ് റൈഡേഴ്സ് 15 പന്തുകൾ ബാക്കി നിൽക്കെ വിജയത്തിലേക്ക് എത്തി. 61 പന്തിൽ 97 റൺസുമായി പുറത്താകാതെ നിന്ന ക്വിന്റൺ ഡി കോക്കാണ് കെകെആറിന്റെ വിജയശില്പി. അദ്ദേഹമാണ് കളിയിലെ കേമനും.അതേ സമയം പരാജയം നേരിട്ട കളിയിൽ രാജസ്ഥാ‌ൻ റോയൽസ് നടത്തിയ ഒരു അനാവശ്യ പരീക്ഷണം വൻ ഫ്ലോപ്പായി. ടീമിന്റെ ഈ നീക്കത്തിൽ ആരാധകരടക്കം നെറ്റി ചുളിപ്പിക്കുകയും ചെയ്തു. മത്സരത്തിൽ ആദ്യം ബാറ്റ് ചെയ്ത രാജസ്ഥാൻ റോയൽസ് 69/3 എന്ന സ്കോറിലേക്ക് വീണ സമയം അഞ്ചാം നമ്പരിൽ ശ്രീലങ്കൻ താരം വനിന്ദു ഹസരംഗയെ ബാറ്റിങ്ങിന് ഇറക്കിയതാണ് ആരാധകരെ ചൊടിപ്പിച്ചത്.

പ്രോപ്പർ ബാറ്റർമാരായ ധ്രുവ് ജൂറലും, ഷിംറോൺ ഹെറ്റ്മെയറും ഡഗ്ഗൗട്ടിൽ ഇരിക്കുമ്പോളായിരുന്നു ഹസരംഗയെ ഇറക്കാനുള്ള രാജസ്ഥാൻ റോയൽസിന്റെ സർപ്രൈസ് തീരുമാനം. എന്നാൽ ഇത് വൻ പരാജയമാവുകയും ചെയ്തു. നാല് പന്തിൽ നാല് റൺസെടുത്ത താരം അധിക നേരം ക്രീസിൽ പിടിച്ചുനിന്നില്ല. സ്പെഷ്യലിസ്റ്റ് ബാറ്റർമാർ പുറത്തിരിക്കുമ്പോൾ ഹസരംഗയെ അഞ്ചാം നമ്പരിൽ പരീക്ഷിക്കാനുള്ള റോയൽസിന്റെ നീക്കം സ്വന്തം ആരാധകരെ പോലും കലിപ്പിലാക്കി എന്നതാണ് ശ്രദ്ധേയം.

മുൻ സീസണുകളിലും ഇത്തരത്തിൽ പരീക്ഷണങ്ങൾ നടത്തി രാജസ്ഥാ‌ൻ റോയൽസ് ആരാധക രോഷം പിടിച്ചുവാങ്ങിയിരുന്നു. ആർ അശ്വിനെ ബാറ്റിങ് ഓർഡറിൽ മുന്നിലേക്ക് കയറ്റിയതായിരുന്നു ഇതിലൊ‌ന്ന്. എ‌ന്നാൽ അശ്വിന് ബാറ്റിങ്ങിൽ പ്രൊമോഷൻ നൽകാനുള്ള റോയൽസ് തീരുമാനം മുൻ സീസണിൽ വിജയമായിരുന്നു. 2022-2024 സീസണുകൾക്കിടെ മൂന്ന് കളികളിൽ രാജസ്ഥാന്റെ മൂന്നാം നമ്പരിൽ കളിച്ച അശ്വിൻ 75 റൺസ് നേടി. അഞ്ചാം നമ്പരിൽ ആറ് ഇന്നിങ്സുകൾ കളിച്ച അശ്വിൻ, 145 റൺസും സ്കോർ ചെയ്തു.

Also Read: അവസാന ഓവറിന് മുൻപ് ശ്രേയസ് അയ്യർ പറഞ്ഞ കാര്യം വെളിപ്പെടുത്തി ശശാങ്ക് സിങ്; ഇത് പഞ്ചാബ് കിങ്സ് നായകന്റെ മാസ്

അശ്വിനെ പരീക്ഷിച്ചത് പോലെ ഹസരംഗയേയും ബാറ്റിങ് ഓർഡറിൽ മുന്നിലേക്ക് കയറ്റി ഇറക്കിയെങ്കിലും ആ നീക്കം ആദ്യ കളിയിൽ തന്നെ പാളി. സ്പിന്നർമാർക്ക് എതിരെ ആക്രമിച്ച് കളിക്കുക എന്ന ലക്ഷ്യത്തോടെ ക്രീസിലേക്ക് വന്ന ഹസരംഗ, വരുൺ ചക്രവർത്തിയുടെ പ‌ന്തിൽ അജിങ്ക്യ രഹാനെക്ക് ക്യാച്ച് സമ്മാനിച്ചാണ് പുറത്തായത്.

രാജസ്ഥാൻ റോയൽസ് - കൊൽക്കത്ത നൈറ്റ് റൈഡേഴ്സ് മത്സരം ഇങ്ങനെ: രാജസ്ഥാൻ റോയൽസിന്റെ രണ്ടാം ഹോം ഗ്രൗണ്ടായ ഗുവാഹത്തിയിൽ നടന്ന കളിയിൽ ആദ്യം ബാറ്റ് ചെയ്ത ആതിഥേയർ 20 ഓവറിൽ നേടിയത് 151/9. 33 റൺസ് നേടി ധ്രുവ് ജൂറൽ ടീമിന്റെ ടോപ് സ്കോററായി. കെകെആറിന് വേണ്ടി വൈഭവ് അറോറ, ഹർഷിത് റാണ, മോയിൻ അലി, വരുൺ ചക്രവർത്തി എന്നിവർ രണ്ട് വിക്കറ്റുകൾ വീതം വീഴ്ത്തി.

Also Read: രോഹിത് ശർമ രക്ഷപെട്ടു, ഐപിഎല്ലിലെ നാണം കെട്ട റെക്കോഡിൽ ഒന്നാമനായി ഗ്ലെൻ മാക്സ്‌വെൽ

152 റൺസ് വിജയലക്ഷ്യം പിന്തുടർന്ന കൊൽക്കത്ത നൈറ്റ് റൈഡേഴ്സ്, വിക്കറ്റ് കീപ്പർ ബാറ്റർ ക്വിന്റൺ ഡി കോക്കിന്റെ ചിറകിലേറി വിജയത്തിലെത്തി. 61 പന്തിൽ എട്ട് ഫോറുകളും ആറ് സിക്സറുമടക്കം 97 റൺസ് നേടി അദ്ദേഹം പുറത്താകാതെ നിന്നു.