റിയാൻ പരാഗിനെ തേഡ് അമ്പയർ ചതിച്ചു? നടന്നത് ഇങ്ങനെ; രാജസ്ഥാൻ റോയൽസിന്റെ കളിക്കിടെ നാടകീയ രംഗങ്ങൾ

Curated byഗോകുൽ എസ് | Samayam Malayalam | Updated: 10 Apr 2025, 12:08 am

Samayam Malayalamറിയാൻ പരാഗ്

ഗുജറാത്ത് ടൈറ്റൻസിന് എതിരായ കളിക്കിടെ മൂന്നാം അ‌മ്പയറുടെ വിക്കറ്റ് തീരുമാനത്തിൽ കലിപ്പിലായി രാജസ്ഥാൻ റോയൽസ് താരം റിയാൻ പരാഗ്. മൂന്നാം അമ്പയറെടുത്ത തീരുമാനത്തിൽ അതൃപ്തനായിരുന്ന പരാഗ് ഫീൽഡ് അമ്പയറോട് തർക്കിച്ചതിനും ക്രിക്കറ്റ് ലോകം സാക്ഷ്യം വഹിച്ചു. സംഭവം എന്തായാലും ക്രിക്കറ്റ് ലോകത്ത് വലിയ ചർച്ചയായിക്കഴിഞ്ഞു.218 റൺസ് വിജയലക്ഷ്യം പിന്തുടർന്ന രാജസ്ഥാൻ റോയൽസ് ഇന്നിങ്സിന്റെ ഏഴാം ഓവറിലായിരുന്നു വിവാദത്തിന് ആസ്പദമായ സംഭവം അരങ്ങേറിയത്. ഇടം കൈയ്യൻ പേസർ കുൽവന്ത് ഖെജ്രോളിയ എറിഞ്ഞ ഓവറിലെ നാലാം പന്തിൽ വിക്കറ്റ് കീപ്പർ ജോസ് ബട്ലറിന് പരാഗ് ക്യാച്ച് സമ്മാനിച്ചു. അപ്പീലിൽ അമ്പയർ ഔട്ട് വിളിക്കുകയും ചെയ്തു. എന്നാൽ അത് ഔട്ടല്ലെന്ന ഉറപ്പോടെ റിയാൻ പരാഗ് ഡി ആർ എസ്‌ ആവശ്യപ്പെട്ടു. റീപ്ലേകളിൽ പന്ത് ബാറ്റിന് അരികിൽ കൂടി പോകുമ്പോൾ സ്പൈക് ഉണ്ടെന്ന് കണ്ടതോടെ അത് ഔട്ട് തന്നെയെന്ന് മൂന്നാം അമ്പയറും വിധിയെഴുതി. എന്നാൽ ഈ തീരുമാനം റിയാൻ പരാഗിനെ ഞെട്ടിച്ചു. ബാറ്റ് നിലത്ത് കൊണ്ടപ്പോളാണ് സ്പൈക് ഉണ്ടായതെന്ന‌ വിശ്വാസത്തിലായിരുന്നു അദ്ദേഹം.

പുറത്തേക്ക് തിരിച്ചുനടക്കുന്നതിനിടെ ഇക്കാര്യം ചൂണ്ടിക്കാട്ടി റിയാൻ പരാഗ് അമ്പയർമാരോട് തർക്കിക്കുകയും ചെയ്തു. മൂന്നാം അമ്പയറുടെ തീരുമാനത്തിൽ പരാഗ് വളരെയധികം രോഷാകുലനായിരുന്നുവെന്ന് താരത്തിന്റെ മുഖഭാവത്തിൽ നിന്ന് വ്യക്തമായിരുന്നു. അതേ സമയം ഇത് ഔട്ടാണെന്നും അല്ലെന്നുമുള്ള വാദങ്ങളുമായി സമൂഹ മാധ്യമങ്ങളിൽ ക്രിക്കറ്റ് പ്രേമികൾ രംഗത്ത് എത്തിയിട്ടു‌ണ്ട്.

ബാറ്റ് ഗ്രൗണ്ടിൽ മുട്ടിയോ എന്ന് കാര്യമായ‌ സമയമെടുത്ത് പരിശോധിക്കാതിരുന്ന മൂന്നാം അമ്പയർക്ക് എതിരെ വലിയ വിമർശനങ്ങളാണ് രാജസ്ഥാൻ റോയൽസ് ആരാധകർ ഉയർത്തുന്നത്. അമ്പയർക്ക് പിഴവ് പറ്റിയെന്നും പരാഗ് ചതിക്കപ്പെട്ടു എ‌ന്നുമൊക്കെയാണ് സമൂഹ മാധ്യമങ്ങളിൽ അവർ കുറിക്കുന്നത്.

Also Read: സഞ്ജുവിനും രക്ഷിക്കാനായില്ല, രാജസ്ഥാന്‍ റോയല്‍സിന് തോല്‍വി; ഐപിഎല്‍ 2025ല്‍ ഗുജറാത്ത് ടൈറ്റന്‍സ് ഒന്നാം സ്ഥാനത്ത്

അതേ സമയം മികച്ച ഫോമിൽ ബാറ്റ് ചെയ്ത് മുന്നേറുമ്പോളായിരുന്നു റിയാൻ പരാഗിന്റെ വിക്കറ്റ് രാജസ്ഥാൻ റോയൽസിന് നഷ്ടമായത്. 14 പന്തിൽ നിന്ന് ഒരു ഫോറിന്റെയും മൂന്ന് സിക്സറുകളുടെയും സഹായത്തോടെ 26 റൺസെടുത്താണ് പരാഗ് പുറത്തായത്.

Also Read: ഡെവോൺ കോൺവെയെ റിട്ടയേഡ് ഔട്ടാക്കി ചെന്നൈ ‌സൂപ്പർ കിങ്സ്, ഐപിഎല്ലിൽ വീണ്ടും നാടകീയ രംഗങ്ങൾ; നടന്നത് ഇങ്ങനെ

മത്സരം ഇങ്ങനെ: സീസണിലെ മൂന്നാം തോൽവിയാണ് ഗുജറാത്ത് ടൈറ്റൻസിന് എതിരായ കളിയിൽ രാജസ്ഥാൻ റോയൽസ് ഏറ്റുവാങ്ങിയത്. 58 റൺസിനായിരുന്നു ശുഭ്മാൻ ഗില്ലും സംഘവും ഈ കളിയിൽ വിജയിച്ചത്. മത്സരത്തിൽ ആദ്യം ബാറ്റ് ചെയ്ത ഗുജറാത്ത് ടൈറ്റൻസ് നിശ്ചിത 20 ഓവറിൽ 217/6 എന്ന കൂറ്റൻ സ്കോർ നേടിയപ്പോൾ, രാജസ്ഥാൻ റോയൽസ് 159 റൺസിന് ഓളൗട്ടായി.