വിക്കറ്റിന് പിന്നില്‍ ഡബിള്‍ സെഞ്ചുറി; ധോണി അപൂര്‍വ നേട്ടത്തിന്റെ നെറുകയില്‍

Authored byനിഷാദ് അമീന്‍ | Samayam Malayalam | Updated: 15 Apr 2025, 12:37 am

Samayam Malayalamആയുഷ് ബദോണിയെ സ്റ്റമ്പ് ചെയ്യുന്ന ധോണി

വിക്കറ്റിന് മുന്നില്‍ മാത്രമല്ല, കീപ്പര്‍ ഗ്ലൗസ് അണിഞ്ഞ് സ്റ്റമ്പുകള്‍ക്ക് പിന്നിലും പ്രായത്തെ വെല്ലുന്ന പ്രകടനങ്ങളുമായി റെക്കോഡുകള്‍ തകര്‍ക്കുകയാണ് ഇന്ത്യന്‍ ഇതിഹാസ ക്രിക്കറ്റര്‍ മഹേന്ദ്ര സിങ് ധോണി (MS Dhoni). ഐപിഎല്‍ 2025ല്‍ ലഖ്‌നൗ സൂപ്പര്‍ ജയന്റ്‌സിനെതിരായ (എല്‍എസ്ജി) മത്സരത്തില്‍ മറ്റൊരു നാഴികക്കല്ല് താണ്ടിയിരിക്കുകയാണ് ചെന്നൈ സൂപ്പര്‍ കിങ്‌സ് (സിഎസ്‌കെ) നായകന്‍.

ഇന്നത്തെ മല്‍സരത്തില്‍ ഒരു സ്റ്റമ്പിങ്, ഒരു ക്യാച്ച്, ഒരു റണ്ണൗട്ട് എന്നിവയിലൂടെ 43 കാരന്‍ തിളങ്ങി. ഈ സീസണില്‍ ധോണിയുടെ പേരില്‍ മൂന്ന് ക്യാച്ചുകളും നാല് സ്റ്റമ്പിങുകളും ഉള്‍പ്പെടെ ഏഴ് പുറത്താക്കലുകള്‍ ഉണ്ട്. മറ്റൊരു വിക്കറ്റ് കീപ്പറും ഒന്നിലധികം സ്റ്റമ്പിങുകള്‍ നടത്തിയിട്ടില്ല. സിഎസ്‌കെ-എല്‍എസ്ജി മല്‍സരത്തില്‍ ധോണി രണ്ട് വമ്പന്‍ റെക്കോഡുകളും കുറിച്ചു.

റുതുരാജ് ഗെയ്ക്വാദിന്റെ അഭാവത്തില്‍ സിഎസ്‌കെയെ നയിക്കുന്ന ധോണി സ്റ്റമ്പുകള്‍ക്ക് പിന്നില്‍ സജീവമായിരുന്നു. ആയുഷ് ബദോണിയുടെ സ്റ്റമ്പിങും ഋഷഭ് പന്തിന്റെ ക്യാച്ചും ആണ് പ്രധാനം.

ലഖ്നൗവിലെ ഭാരത് രത്ന ശ്രീ അടല്‍ ബിഹാരി വാജ്പേയ് ഏകാന ക്രിക്കറ്റ് സ്റ്റേഡിയത്തിലാണ് ധോണിയുടെ ചരിത്രനേട്ടം. ഇന്നിങ്സിന്റെ 14-ാം ഓവറില്‍ രവീന്ദ്ര ജഡേജയുടെ പന്തില്‍ ആയുഷ് ബദോണിയെ സ്റ്റമ്പ് ചെയ്തതോടെയാണിത്. ഐപിഎല്ലില്‍ 154 ക്യാച്ചുകളും 46 സ്റ്റമ്പിങുകളും ഉള്‍പ്പെടെ ധോണിയുടെ 200-ാമത് പുറത്താക്കലായിരുന്നു ഇത്.

ആരാണ് ആയുഷ് മാത്രെ? സിഎസ്‌കെ ക്യാപ്റ്റന്‍ റുതുരാജ് ഗെയ്ക്വാദിന് പകരമെത്തുന്നത് 17 വയസ്സുകാരന്‍
ഇതില്‍ 196 എണ്ണം (150 ക്യാച്ചുകള്‍) ആണ് സ്റ്റമ്പുകള്‍ക്ക് പിന്നില്‍. 2008, 2009 സീസണുകളില്‍ ധോണി പാര്‍ഥിവ് പട്ടേലിന് കീപ്പര്‍ ഗ്ലൗസ് കൈമാറി ധോണി നാല് ക്യാച്ചുകള്‍ എടുത്തിരുന്നു. ഐപിഎല്‍ ചരിത്രത്തില്‍ വിക്കറ്റ് കീപ്പറല്ലാത്തവരില്‍ ഏറ്റവും കൂടുതല്‍ ഫീല്‍ഡിങ് പുറത്താക്കലുകള്‍ നടത്തിയ റെക്കോഡ് വിരാട് കോഹ്ലിയുടെ (116 ക്യാച്ചുകള്‍) പേരിലാണ്.

ഐപിഎല്‍ ചരിത്രത്തില്‍ 182 പുറത്താക്കലുകളില്‍ പങ്കാളിയായ ദിനേഷ് കാര്‍ത്തിക് രണ്ടാം സ്ഥാനത്തും 126 പേരെ ഔട്ടാക്കാന്‍ സഹിയിച്ച എബി ഡിവില്ലിയേഴ്സ് മൂന്നാം സ്ഥാനത്തുമാണ്.

ഹാര്‍ദിക് പാണ്ഡ്യയുടെ ബാറ്റിന്റെ പ്രശ്‌നമെന്ത്? അമ്പയര്‍ തടഞ്ഞുനിര്‍ത്തി പരിശോധിക്കാനുള്ള കാരണമിതാണ്
സിഎസ്‌കെയ്ക്കായി ധോണിയുടെ 50-ാമത്തെ സ്റ്റമ്പിങ് ഇരയും ബദോണിയാണ്. ഫ്രാഞ്ചൈസിക്ക് വേണ്ടി അഞ്ച് തവണ ഐപിഎല്‍ നേടിയ ധോണി 150 ക്യാച്ചുകള്‍ എടുത്തിട്ടുണ്ട്. ആകെയുള്ള 200 പുറത്താക്കലില്‍ നാല് എണ്ണം ഒഴികെയുള്ളതെല്ലാം കീപ്പര്‍ ഗ്ലൗസ് അണിഞ്ഞുകൊണ്ടായിരുന്നു. ടി20 ക്രിക്കറ്റില്‍ ഏതൊരു ടീമിനും വേണ്ടി ഈ നേട്ടം കൈവരിക്കുന്ന ആദ്യ കളിക്കാരനാണ് ധോണി.

സിഎസ്‌കെയ്ക്കു വേണ്ടി ധോണി നേടിയ 200 പുറത്താക്കലുകളില്‍ 176 എണ്ണം (137 ക്യാച്ചുകള്‍, 39 സ്റ്റമ്പിങ്) ഐപിഎല്ലിലാണ്. ബാക്കിയുള്ളവ ചാമ്പ്യന്‍സ് ലീഗിലും. റൈസിങ് പൂനെ സൂപ്പര്‍ജയന്റിനു വേണ്ടി 18 ക്യാച്ചുകളും ഏഴ് സ്റ്റമ്പിങുകളും ഉള്‍പ്പെടെ 25 പേരെ പുറത്താക്കുന്നതില്‍ ധോണി പങ്കാളിയായി.