വൈഭവ് സൂര്യവംശി ഔട്ടായത് കൊണ്ട് കരഞ്ഞതല്ല; അവസാനം കാരണം വെളിപ്പെടുത്തി രാജസ്ഥാൻ റോയൽസ് ഓപ്പണർ രംഗത്ത്

Curated by: ഗോകുൽ എസ്|Samayam Malayalam•20 May 2025, 12:54 am

2025 സീസൺ ഇന്ത്യൻ പ്രീമിയർ ലീഗിൽ ( IPL 2025 ) ഏറ്റവും കൂടുതൽ വാർത്താ തലക്കെട്ടുകളിൽ ഇടം പിടിച്ച താരങ്ങളിൽ ഒരാളാണ് വൈഭവ് സൂര്യവംശി. രാജസ്ഥാൻ റോയൽസിന്റെ കൗമാര ഓപ്പണറായ സൂര്യവംശി ചുരുങ്ങിയ മത്സരങ്ങൾ കൊണ്ട് ഇന്ത്യൻ ക്രിക്കറ്റ് പ്രേമികളുടെ പ്രിയ താരങ്ങളിൽ ഒരാളായി മാറി. ഗുജറാത്ത് ടൈറ്റൻസിന് എതിരെ വെറും 35 പന്തിൽ സെഞ്ചുറി നേടിയ താരത്തിന്റെ ബാറ്റിങ് പ്രകടനം ക്രിക്കറ്റ് ലോകത്തെ ശരിക്കും ഞെട്ടിച്ചു.ക്യാപ്റ്റൻ സഞ്ജു സാംസൺ ( Sanju Samson ) പരിക്കേറ്റ് പുറത്തായ സാഹചര്യത്തിലായിരുന്നു വൈഭവ് സൂര്യവംശിയുടെ ഐപിഎൽ അരങ്ങേറ്റം സംഭവിച്ചത്. ലക്നൗ സൂപ്പർ ജയന്റ്സിന് എതിരെയായിരുന്നു താരത്തിന്റെ ആദ്യ കളി. 20 പന്തിൽ 34 റൺസെടുത്ത് മികച്ച പ്രകടനമായിരുന്നു ഈ മത്സരത്തിൽ വൈഭവ് കാഴ്ച വെച്ചത്‌‌. രണ്ട് ബൗണ്ടറികളും മൂന്ന് സിക്സറുകളും താരത്തിന്റെ ബാറ്റിൽ നിന്ന് പിറന്നു. അന്ന് ഔട്ടായി മടങ്ങുമ്പോൾ കൈ കൊണ്ട് വൈഭവ് തന്റെ കണ്ണ് തുടക്കുന്നതായി കാണപ്പെട്ടിരുന്നു.


ഔട്ടായ വിഷമത്തിൽ വൈഭവ് കരയുന്നതാണ് അതെന്ന തരത്തിലായിരുന്നു സമൂഹ മാധ്യമങ്ങളിൽ ആരാധകർ കുറിച്ചത്. എന്നാൽ ഇപ്പോളിതാ ഈ സംഭവത്തിന് പിന്നിലെ ശരിക്കുമുള്ള കാരണം വെളിപ്പെടുത്തി രംഗത്ത് എത്തിയിരിക്കുകയാണ് വൈഭവ്. ആൾക്കാർ കരയുകയാണെന്ന് തെറ്റിദ്ധരിച്ച സംഭവം സത്യത്തിൽ കണ്ണിന് ഒരു അസ്വസ്ഥത വന്നതിനാലായിരുന്നുവെന്നാണ് വൈഭവ് പറയുന്നത്. പഞ്ചാബ് കിങ്സിന് എതിരായ രാജസ്ഥാൻ റോയൽസിന്റെ മത്സര ശേഷം സംസാരിക്കുമ്പോളായിരുന്നു ആദ്യ കളിക്കിടെ നടന്ന സംഭവത്തെക്കുറിച്ച് വൈഭവ് വെളിപ്പെടുത്തിയത്.

"ഞാൻ എപ്പോളാണ് കരഞ്ഞത്? ഔട്ടായതിന് ശേഷം ഞാൻ സ്ക്രീനിലേക്ക് നോക്കിയിരുന്നു. അവിടുത്തെ തിളക്കമുള്ള വെളിച്ചം കണ്ണിലടിച്ചു. ഇതോടെ കൂടുതൽ കണ്ണിറുക്കാൻ ഞാൻ നിർബന്ധിതനായി. ആളുകൾ ഞാൻ കരയുകയാണെന്ന് കരുതി‌, പക്ഷേ അങ്ങനെയായിരുന്നില്ല. വെളിച്ചം കണ്ണിൽ അടിച്ചതിനാലായിരുന്നു അങ്ങനെ." രാജസ്ഥാൻ റോയൽസിന്റെ കൗമാര ബാറ്റർ പറഞ്ഞു.

Also Read: വൈഭവിനായി സാജുവിന്റെ വിട്ടുകൊടുക്കൽ; ഏറ്റെടുത്ത് ആരാധകർ

അതേ സമയം തന്റെ അരങ്ങേറ്റ ഐപിഎൽ സീസണിൽ തന്നെ ഒരു സെൻസേഷനാകാൻ വൈഭവ് സൂര്യവംശിക്ക് കഴിഞ്ഞു. 34, 16, 101, 0, 4, 40 എന്നിങ്ങനെയാണ് ഈ സീസണിൽ കളിച്ച ആറ് മത്സരങ്ങളിൽ വൈഭവ് സൂര്യവംശിയുടെ സമ്പാദ്യം. ആറ് കളികളിൽ 32.50 ബാറ്റിങ് ശരാശരിയിൽ 195 റൺസാണ് ഈ പതിനാലുകാരൻ നേടിയത്. 219.10 ആണ് സ്ട്രൈക്ക് റേറ്റ്. 14 ഫോറുകളും 20 സിക്സറുകളും ഈ ചുരുങ്ങിയ എണ്ണം മത്സരങ്ങളിൽ നിന്ന് വൈഭവ് സൂര്യവംശി പറത്തിക്കഴിഞ്ഞു.

Also Read: രാജസ്ഥാൻ റോയൽസിന്റെ തോൽവിയുടെ കാരണം വെളിപ്പെടുത്തി പരിശീലകൻ രാഹുൽ ദ്രാവിഡ്

അതേ സമയം വൈഭവിന്റെ ടീമായ രാജസ്ഥാൻ റോയൽസാകട്ടെ ഈ സീസണിൽ ദയനീയ ഫോമിലാണ്. 13 കളികളിൽ പത്തിലും തോറ്റ അവർ നേരത്തെ തന്നെ പ്ലേ ഓഫ് സാധ്യതകളിൽ നിന്ന് പുറത്തായിരുന്നു. നിലവിൽ ആറ് പോയിന്റ് മാത്രമുള്ള ടീം പോയിന്റ് ടേബിളിൽ ഒൻപതാം സ്ഥാനത്താണ്. സീസണിൽ ഇനി ഒരു കളി കൂടിയാണ് അവർക്ക് ബാക്കിയുള്ളത്. ചൊവ്വാഴ്ച ചെന്നൈ സൂപ്പർ കിങ്സിന് എതിരെയാണത്.