ഷാജി കൈലാസിന്റെ ആക്ഷന്‍ ത്രില്ലറില്‍ നായകനായി ജോജു ജോര്‍ജ്; 'വരവ്' ചിത്രീകരണം മൂന്നാറില്‍ ആരംഭിച്ചു

മലയോര മേഖലയുടെ പശ്ചാത്തലത്തില്‍ ജോജു ജോര്‍ജിനെ നായകനാക്കി സംവിധായകന്‍ ഷാജി കൈലാസ് സംവിധാനംചെയ്യുന്ന 'വരവ്' എന്ന ചിത്രത്തിന്റെ ചിത്രീകരണം ചൊവ്വാഴ്ച്ച മൂന്നാറില്‍ ആരംഭിച്ചു. ഓള്‍ഗാ പ്രൊഡക്ഷന്‍സിന്റെ ബാനറില്‍ നൈസി റെജിയാണ് ചിത്രം നിര്‍മിക്കുന്നത്. ജോമി ജോസഫ് കോ- പ്രൊഡ്യൂസറാണ്.

വലിയ മുതല്‍മുടക്കിലും വന്‍താരനിരയുടെ അകമ്പടിയോടെയുമെത്തുന്ന ചിത്രം പൂര്‍ണ്ണമായും ആക്ഷന്‍ ത്രില്ലര്‍ ജോണറിലാണ് അവതരിപ്പിക്കുന്നത്. ആക്ഷന് വലിയ പ്രാധാന്യമാണ് ചിത്രത്തിനു നല്‍കിയിരിക്കുന്നത്. അരഡസനോളം വരുന്ന ആക്ഷന്‍ രംഗങ്ങള്‍ ദക്ഷിണേന്ത്യയിലെ ഏറ്റവും മികച്ച ആക്ഷന്‍ കോറിയോഗ്രാഫേഴ്‌സുകളായ കലൈകിംഗ്സ്റ്റണ്‍, ഫീനിക്‌സ് പ്രഭു, സ്റ്റണ്ട് സില്‍വ, കനല്‍ക്കണ്ണന്‍ എന്നിവര്‍ ഒരുക്കുന്നു.

ഹൈറേഞ്ചില്‍ ആളും അര്‍ഥവും സമ്പത്തും കഠിനാദ്ധ്വാനത്തിലൂടെ ആവശ്യത്തിലധികം നേടിയ പോളി എന്ന പോളച്ചന്റെ, ജീവിത പോരാട്ടത്തിന്റെ കഥ പറയുകയാണ് 'വരവ്' എന്ന ചിത്രത്തിലൂടെ. പോളച്ചന് ഒരു നിര്‍ണ്ണായകഘട്ടത്തില്‍ വീണ്ടും ഒരു വരവിനിറങ്ങേണ്ടി വരുന്നു. ഈ വരവില്‍ കാലം കാത്തുവച്ച ചില പ്രതികാരങ്ങളുടെ വ്യക്തമായ കണക്കു തീര്‍ക്കലുമൊക്കെയുണ്ട്. ഈ വരവാണ് ചിത്രത്തില്‍ ആഘോഷിക്കപ്പെടുന്നത്.

മുരളി ഗോപി, അര്‍ജുന്‍ അശോകന്‍, സുകന്യ, ബാബുരാജ്, വിന്‍സി അലോഷ്യസ്, സാനിയ ഇയ്യപ്പന്‍, അശ്വിന്‍ കുമാര്‍, അഭിമന്യു ഷമ്മി തിലകന്‍, ബിജു പപ്പന്‍, ബോബി കുര്യന്‍, അസീസ് നെടുമങ്ങാട്, ശ്രീജിത്ത് രവി, ദീപക് പറമ്പോള്‍, കോട്ടയം രമേഷ്, ബാലാജി ശര്‍മ, ചാലി പാലാ, രാധികാ രാധാകൃഷ്ണന്‍ എന്നിവരും പ്രധാന വേഷങ്ങളിലെത്തുന്നു. ഷാജി കൈലാസിന്റെ മികച്ച വിജയങ്ങള്‍ നേടിയ 'ചിന്താമണി കൊലക്കേസ്', 'റെഡ് ചില്ലീസ്', 'ദ്രോണ' എന്നീ ചിത്രങ്ങള്‍ക്കു തിരക്കഥ ഒരുക്കിയ എ.കെ. സാജനാണ് 'വരവ്' തിരക്കഥ രചിക്കുന്നത്. മൂന്നാര്‍ മറയൂര്‍, കാന്തല്ലൂര്‍, തേനി, ഇടുക്കി എന്നിവിടങ്ങളിലായി ചിത്രീകരണം പൂര്‍ത്തിയാകും.

ഛായാഗ്രഹണം: എസ്. ശരവണന്‍, എഡിറ്റിങ്: ഷമീര്‍ മുഹമ്മദ്, കലാസംവിധാനം: സാബു റാം, മേക്കപ്പ്: സജി കാട്ടാക്കട, കോസ്റ്റ്യും ഡിസൈന്‍: സമീറാ സനീഷ്, സ്റ്റില്‍സ്: ഹരി തിരുമല, ചീഫ് അസസിയേറ്റ് ഡയറക്ടര്‍: സ്യമന്തക് പ്രദീപ്, പ്രൊഡക്ഷന്‍ മാനേജേഴ്‌സ്: ശിവന്‍ പൂജപ്പുര, അനില്‍ അന്‍ഷാദ്, പ്രൊഡക്ഷന്‍ എക്‌സിക്യൂട്ടീവ്: പ്രതാപന്‍ കല്ലിയൂര്‍, പ്രൊഡക്ഷന്‍ കണ്‍ട്രോളര്‍: വിനോദ് മംഗലത്ത്, പിആര്‍ഒ: വാഴൂര്‍ ജോസ്.

Content Highlights: Joju George stars successful Shaji Kailas` high-octane enactment thriller `Varavu`