ഷെയ്ഖ് റഷീദ് ആരാണ്? ഇന്ത്യയുടെ അണ്ടര്‍ 19 ലോകകപ്പ് താരം ഇന്ന് കളത്തില്‍; എംഎസ് ധോണിയുടെ സിഎസ്‌കെയില്‍ ഓപണര്‍

Authored byനിഷാദ് അമീന്‍ | Samayam Malayalam | Updated: 14 Apr 2025, 9:31 pm

Samayam Malayalamഷെയ്ഖ് റഷീദ് വിരാട് കോഹ്‌ലിക്കൊപ്പം

ജിദ്ദയില്‍ നടന്ന ഐപിഎല്‍ 2025 (IPL 2025) മെഗാ താര ലേലത്തില്‍ 30 ലക്ഷം രൂപ പ്രതിഫലത്തിന് ചെന്നൈ സൂപ്പര്‍ കിങ്‌സ് സ്വന്തമാക്കിയ യുവ പ്രതിഭ ഷെയ്ഖ് റഷീദ് (Shaik Rasheed) ഇന്ന് കളത്തില്‍. എംഎസ് ധോണി (MS Dhoni) നയിക്കുന്ന സിഎസ്‌കെയ്ക്ക് വേണ്ടി 20 വയസ്സുകാരന്‍ ഐപിഎല്ലില്‍ അരങ്ങേറ്റം കുറിക്കും. 2022ല്‍ അണ്ടര്‍ 19 ലോകകപ്പ് നേടിയ ഇന്ത്യന്‍ ടീമില്‍ അംഗമായിരുന്നു റഷീദ്.ലഖ്നൗ സൂപ്പര്‍ ജയന്റ്സിനെതിരായ മല്‍സരത്തില്‍ (IPL 2025 CSK vs LSG) ആന്ധ്രാപ്രദേശുകാരനായ ഷെയ്ഖ് റഷീദിനെ സിഎസ്‌കെ പ്ലെയിങ് ഇലവനില്‍ ഉള്‍പ്പെടുത്തി. രചിന്‍ രവീന്ദ്രയ്‌ക്കൊപ്പം അദ്ദേഹം ഇന്നിങ്‌സ് ഓപണ്‍ ചെയ്യും. ന്യൂസിലന്‍ഡ് ഓപണര്‍ ഡെവണ്‍ കോണ്‍വേയ്ക്ക് പകരക്കാരനായാണ് ടീമില്‍ ഇടംനേടിയത്.


ഈ സീസണിലുടനീളം സിഎസ്‌കെയുടെ ബാറ്റിങില്‍ പ്രശ്നങ്ങള്‍ പ്രകടമാണ്. ഇതോടെയാണ് ഇന്ന് എല്‍എസ്ജിക്കെതിരെ പരീക്ഷണം നടത്താന്‍ റഷീദിനെ ഇറക്കുന്നത്. ഫോമിലുള്ള റുതുരാജ് ഗെയ്ക്‌വാദ് പരിക്കേറ്റ് പുറത്തുപോയതും കനത്ത തിരിച്ചടിയായി. റുതുരാജിന്റെ അഭാവത്തില്‍ എംഎസ് ധോണിയെ സിഎസ്‌കെയുടെ പുതിയ ക്യാപ്റ്റനായി നിയോഗിച്ചിരുന്നു.

ആരാണ് ആയുഷ് മാത്രെ? സിഎസ്‌കെ ക്യാപ്റ്റന്‍ റുതുരാജ് ഗെയ്ക്വാദിന് പകരമെത്തുന്നത് 17 വയസ്സുകാരന്‍
2022 അണ്ടര്‍ 19 ലോകകപ്പ് സെമിഫൈനലില്‍ ഓസ്ട്രേലിയക്കെതിരെ 94 റണ്‍സും ഇംഗ്ലണ്ടിനെതിരായ ഫൈനലില്‍ അര്‍ധസെഞ്ചുറിയും നേടിയതോടെ റഷീദ് ശ്രദ്ധിക്കപ്പെട്ടിരുന്നു. ഇതോടെ ആന്ധ്രാപ്രദേശിനായി ആഭ്യന്തര ടൂര്‍ണമെന്റുകളില്‍ എല്ലാ ഫോര്‍മാറ്റുകളിലും അരങ്ങേറ്റം കുറിക്കാന്‍ അവസരം ലഭിച്ചു.

ആന്ധ്രയ്ക്കായി 19 ഫസ്റ്റ് ക്ലാസ് മത്സരങ്ങള്‍ കളിച്ച അദ്ദേഹം 37.42 ശരാശരിയില്‍ 1204 റണ്‍സ് നേടിയിട്ടുണ്ട്. രഞ്ജി ട്രോഫിയില്‍ ഹൈദരാബാദിനെതിരെ 203 റണ്‍സ് നേടി. 2024-25 രഞ്ജി ട്രോഫിയില്‍ 12 മത്സരങ്ങളില്‍ നിന്ന് 627 റണ്‍സ് കരസ്ഥമാക്കി. 13 ടി20 മത്സരങ്ങളില്‍ കളിച്ച അദ്ദേഹം സെഞ്ചുറി (പുറത്താവാതെ 100 റണ്‍സ്) ഉള്‍പ്പെടെ 352 റണ്‍സും നേടിയിട്ടുണ്ട്.

ഹാര്‍ദിക് പാണ്ഡ്യയുടെ ബാറ്റിന്റെ പ്രശ്‌നമെന്ത്? അമ്പയര്‍ തടഞ്ഞുനിര്‍ത്തി പരിശോധിക്കാനുള്ള കാരണമിതാണ്
2023ലാണ് റഷീദ് ആദ്യമായി സിഎസ്‌കെയില്‍ എത്തുന്നത്. അടിസ്ഥാന വിലയായ 20 ലക്ഷം രൂപയ്ക്ക് കരാറിലെത്തിയെങ്കിലും ട്രോഫി ഉയര്‍ത്തിയ ടീമിനായി കളിക്കാന്‍ അവസരം ലഭിച്ചില്ല. 2024 ല്‍ സിഎസ്‌കെ അദ്ദേഹത്തെ നിലനിര്‍ത്തിയെങ്കിലും ബെഞ്ചില്‍ തന്നെയായിരുന്നു സ്ഥാനം. 2025ല്‍ സിഎസ്‌കെ 30 ലക്ഷം രൂപയ്ക്ക് അദ്ദേഹത്തെ സ്വന്തമാക്കുകയും ഇപ്പോള്‍ ആറ് മത്സരങ്ങള്‍ക്ക് ശേഷം ലീഗില്‍ അരങ്ങേറ്റം കുറിക്കുകയുമാണ്.

ഇന്നത്തെ മത്സരത്തില്‍ സിഎസ്‌കെ രണ്ട് വലിയ മാറ്റങ്ങള്‍ വരുത്തിയിട്ടുണ്ട്. ഷെയ്ക് റഷീദിനെ കൂടാതെ, രവിചന്ദ്രന്‍ അശ്വിന് പകരം ജാമി ഓവര്‍ട്ടണ്‍ ഇടംപിടിച്ചു. ഈ സീസണില്‍ ഉദ്ഘാടന മത്സരത്തില്‍ വിജയിച്ചെങ്കിലും ശേഷം തുടര്‍ച്ചയായി അഞ്ച് മത്സരങ്ങള്‍ തോറ്റ സിഎസ്‌കെ തിരിച്ചുവരാനുള്ള കഠിനശ്രമത്തിലാണ്.