സച്ചിന്റെ കിടിലൻ ഐപിഎൽ റെക്കോഡ് തകർത്ത് സൂര്യകുമാർ യാദവ്; 15 വർഷം പഴക്കമുള്ള നേട്ടം ഇനി പഴങ്കഥ

Curated by: ഗോകുൽ എസ്|Samayam Malayalam•27 May 2025, 12:33 am

2025 സീസൺ ഐപിഎല്ലിൽ തങ്ങളുടെ അവസാന മത്സരത്തിൽ പരാജയപ്പെട്ടിരിക്കുകയാണ് മുംബൈ ഇന്ത്യൻസ്. തിങ്കളാഴ്ച രാത്രി നടന്ന മത്സരത്തിൽ കരുത്തരായ പഞ്ചാബ് കിങ്സിനോട് ഏഴ് വിക്കറ്റിനാണ് അവർ തോറ്റത്. മത്സരത്തിൽ ആദ്യം ബാറ്റ് ചെയ്ത മുംബൈ ഇന്ത്യൻസ് 184/7 എന്ന മികച്ച സ്കോർ നേടിയപ്പോൾ, പഞ്ചാബ് 18.3 ഓവറുകളിൽ ലക്ഷ്യം മറികടന്നു.അതേ സമയം ഈ സീസണിൽ കിടിലൻ ഫോമിലുള്ള സൂര്യകുമാർ യാദവിന്റെ മറ്റൊരു തകർപ്പൻ ഇന്നിങ്സാണ് ജയ്പൂരിൽ പഞ്ചാബിന് എതിരെ കണ്ടത്. മൂന്നാം നമ്പരിൽ ബാറ്റിങ്ങിന് ഇറങ്ങിയ താരം 39 പന്തിൽ ആറ് ഫോറുകളും രണ്ട് സിക്സറുകളുമടക്കം 57 റൺസാണ് നേടിയത്. ഈ ഇന്നിങ്സിനിടെ ഒരു പറ്റം കിടിലൻ റെക്കോഡുകളും സ്കൈ സ്വന്തമാക്കി. ഇതിഹാസ താരം സച്ചിൻ ടെണ്ടുൽക്കർ 15 വർഷങ്ങൾക്ക് മുൻപ് സ്ഥാപിച്ച ഒരു റെക്കോഡ് സൂര്യകുമാർ യാദവ് പഴങ്കഥയാക്കി എന്നതാണ് ഇതിൽ ഏറ്റവും ശ്രദ്ധേയം.


ഇന്നത്തെ കളിയിൽ അർധസെഞ്ചുറി നേടിയതോടെ 2025 സീസൺ ഐപിഎല്ലിൽ സൂര്യകുമാർ യാദവിന്റെ റൺ നേട്ടം 640 ആയി‌. 14 കളികളിൽ 71.11 ബാറ്റിങ് ശരാശരിയിലാണ് താരത്തിന്റെ ഈ പ്രകടനം. ഇതോടെ ഒരു ഐപിഎൽ സീസണിൽ ഏറ്റവും കൂടുതൽ റൺസ് നേടുന്ന മുംബൈ ഇന്ത്യൻസ് താരമെന്ന റെക്കോഡ് സച്ചിന്റെ കൈയ്യിൽ നിന്ന് സ്കൈ സ്വന്തമാക്കി. 2010 ലെ മൂന്നാം സീസൺ ഐപിഎല്ലിൽ 618 റൺസ് നേടി സച്ചിൻ കുറിച്ച റെക്കോഡാണ് 15 വർഷങ്ങൾക്ക് ശേഷം സ്കൈ മറികടന്നിരിക്കുന്നത്.

പഞ്ചാബ് കിങ്സിന് കോളടിച്ചു, മുംബൈ ഇന്ത്യൻസിന് കനത്ത തിരിച്ചടി; പ്ലേ ഓഫിൽ ഈ ടീമുകളുടെ മത്സരങ്ങൾ ഇങ്ങനെ
മുംബൈ ഇന്ത്യൻസിനായി രണ്ട് സീസണുകളിൽ 600 റൺസിന് മുകളിൽ നേടുന്ന ആദ്യ താരമെന്ന റെക്കോഡും ഇപ്പോൾ സൂര്യകുമാർ യാദവിന്റെ പേരിലായി. നേരത്തെ 2023 സീസൺ ഐപിഎല്ലിലായിരുന്നു സ്കൈ ആദ്യമായി 600 റൺസ് നേടിയത്. 16 കളികളിൽ നിന്ന് 605 റൺസായിരുന്നു അന്ന് സ്കൈയുടെ സമ്പാദ്യം. സൂര്യകുമാർ യാദവും, സച്ചിൻ ടെണ്ടുൽക്കറും മാത്രമാണ് ഒരു ഐപിഎൽ സീസണിൽ 600 റൺസ് തികച്ച മുംബൈ ഇന്ത്യൻസ് താരങ്ങൾ.

ഒരു ഐപിഎൽ സീസണിൽ ഏറ്റവും കൂടുതൽ തവണ 25 റൺസിന് മുകളിൽ നേടുന്ന താരമെന്ന റെക്കോഡും പഞ്ചാബിന് എതിരായ കളിക്കിടെ സൂര്യകുമാർ യാദവ് സ്വന്തമാക്കി. ഈ സീസണിൽ കളിച്ച 14 ഇന്നിങ്സുകളിലും 25 റൺസിന് മുകളിൽ സ്കോർ ചെയ്താണ് സൂര്യകുമാർ യാദവിന്റെ കിടിലൻ നേട്ടം. കെയിൻ വില്ല്യംസണും, ശുഭ്മാൻ ഗില്ലുമായിരുന്നു ഈ നേട്ടത്തിൽ ഇത്രയും നാൾ ഒന്നാമതുണ്ടായിരുന്നത്. 2018 സീസണിൽ സൺ റൈസേഴ്സ് ഹൈദരാബാദിന് വേണ്ടി കളിക്കുമ്പോൾ വില്ല്യംസണും 2023 ൽ ഗുജറാത്ത് ടൈറ്റൻസ് ജേഴ്സിയിൽ ശുഭ്മാൻ ഗില്ലും 13 തവണ 25 ന് മുകളിൽ സ്കോർ ചെയ്തിരുന്നു.

ഒരേയൊരു സൂര്യകുമാർ; വീണ്ടും ചരിത്രം കുറിച്ച് ഇന്ത്യയുടെ ടി20 നായകൻ
ടി20 ക്രിക്കറ്റിൽ തുടർച്ചയായി ഏറ്റവും കൂടുതൽ മത്സരങ്ങളിൽ 25 റൺസിന് മുകളിൽ സ്കോർ ചെയ്യുന്ന താരമെന്ന ലോകറെക്കോഡും ഈ കളിക്കിടെ സൂര്യകുമാർ യാദവ് സ്വന്തമാക്കി.‌ 14 ടി20 ഇന്നിങ്സുകളിൽ തുടർച്ചയായി 25 റൺസോ അതിന് മുകളിലോ നേടിയാണ് സ്കൈയുടെ റെക്കോഡ്. തുടർച്ചയായി 13 ടി20 ഇന്നിങ്സുകളിൽ ഈ നേട്ടം കൈവരിച്ച ദക്ഷിണാഫ്രിക്കൻ താരം ടെംബ ബാവുമയുടെ പേരിലായിരുന്ന റെക്കോഡാണ് സ്കൈ മറികടന്നത്.