സഞ്ജു സാംസണ്‍ മല്‍സരത്തിനിടെ പരിക്കേറ്റ് പുറത്ത്; എന്താണ് റിട്ടയേര്‍ഡ് ഹര്‍ട്ടും റിട്ടയേര്‍ഡ് ഔട്ടും

Authored byനിഷാദ് അമീന്‍ | Samayam Malayalam | Updated: 17 Apr 2025, 2:26 am

ഐപിഎല്ലില്‍ (IPl 2025) ഡല്‍ഹി ക്യാപിറ്റല്‍സിനെതിരായ (Delhi Capitals) മല്‍സരത്തിനിടെ രാജസ്ഥാന്‍ റോയല്‍സ് (Rajasthan Royals) നായകന്‍ സഞ്ജു സാംസണ്‍ (Sanju Samson) പരിക്കേറ്റ് പുറത്തായി. 188 റണ്‍സ് വിജയലക്ഷ്യം പിന്തുടര്‍ന്ന് ബാറ്റ് ചെയ്യുന്നതിനിടെയാണ് സംഭവം. 19 പന്തില്‍ 31 റണ്‍സ് നേടി മികച്ച ഫോമില്‍ ബാറ്റ് വീശുകയായിരുന്നു സഞ്ജു.യശസ്വി ജയ്സ്വാളിനൊപ്പം സഞ്ജു മികച്ച ഓപണിങ് കൂട്ടുകെട്ടുണ്ടാക്കി മുന്നേറുന്നതിനിടെയാണ് കനത്ത തിരിച്ചടിയുണ്ടായത്. അതിവേഗം റണ്‍ ചേസിങ് നടത്തിയ സഖ്യം 33 പന്തുകളില്‍ 61 റണ്‍സ് നേടി. ഹോം ടീം ബൗളര്‍മാര്‍ ഇരുവരെയും നിയന്ത്രിക്കാന്‍ പാടുപെട്ടു. ഇന്നിങ്സിന്റെ ആറാം ഓവറിലാണ് സഞ്ജുവിന് പരിക്കേറ്റത്. വിപ്രജ് നിഗം എറിഞ്ഞ ഈ ഓവറിലെ ആദ്യ രണ്ട് പന്തുകളില്‍ ഒരു സിക്‌സറും ഒരു ഫോറും സഞ്ജു നേടിയിരുന്നു.


വിപ്രജ് നിഗത്തിന്റെ മൂന്നാം പന്ത് നോ ബോള്‍ ആയിരുന്നു. വേഗതയേറിയ ഗൂഗ്ലി സഞ്ജുവിനെ കബളിപ്പിച്ചു. ബാറ്റ് വീശുന്നതിനിടെ വാരിയെല്ലിന് വേദന അനുഭവപ്പെട്ട സഞ്ജുവിനെ പരിചരിക്കാന്‍ വൈദ്യസംഘമെത്തി. ഇന്നിങ്‌സ് തുടരാന്‍ ശ്രമിച്ച സഞ്ജു അടുത്ത ഫ്രീ ഹിറ്റ് ബോള്‍ ലോങ് ഓഫിലേക്ക് അടിച്ചെങ്കിലും വേദന കാരണം ഓടിയില്ല. തുടര്‍ന്ന് റിട്ടയേര്‍ഡ് ഹര്‍ട്ട് ആയി പുറത്തുപോയി.

സഞ്ജു വിഷുവിന് ക്രിസ്റ്റ്യാനോയെ ക്ഷണിച്ചിരുന്നോ? 'പപ്പടം കാച്ചിയും സദ്യ കഴിച്ചും കൈനീട്ടം കൊടുത്തും' ഫുട്ബോള്‍ ഇതിഹാസം
പന്ത് ദേഹത്ത് തട്ടാത്തതിനാല്‍ സഞ്ജുവിന്റെ പരിക്ക് വലിയ പ്രശ്‌നമല്ലെന്ന് പ്രതീക്ഷിക്കുന്നു. റിട്ടയേര്‍ഡ് ഹര്‍ട്ട് ആയി പ്രഖ്യാപിച്ചതിനാല്‍ ഏത് വിക്കറ്റ് വീണാലും ആവശ്യമുള്ള സമയത്ത് ബാറ്റിങിലേക്ക് തിരിച്ചെത്താന്‍ കഴിയും. മെഡിക്കല്‍ പ്രശ്‌നം കാരണം പുറത്തുപോവുമ്പോഴാണ് ഇത് അനുവദിക്കുക. ഇത് സ്ഥിരീകരിക്കാനുള്ള അധികാരം മാച്ച് ഒഫീഷ്യല്‍സിനാണ്.

സഞ്ജുവിന് ഒളിമ്പിക്‌സ് മെഡല്‍ നേടാന്‍ സുവര്‍ണാവസരം...! 2028 ഒളിമ്പിക്‌സില്‍ ടി20 ക്രിക്കറ്റും; ഉള്‍പ്പെടുത്തിയത് 128 വര്‍ഷങ്ങള്‍ക്ക് ശേഷം
എന്നാല്‍, റിട്ടയേര്‍ഡ് ഔട്ട് ആയാല്‍ ബാറ്റിങിലേക്ക് തിരിച്ചെത്താന്‍ കഴിയില്ല. തന്ത്രപരമായ കാരണങ്ങളാല്‍ ബാറ്റ്‌സ്മാന്‍ ഔട്ടാവാതെ തന്നെ പുറത്തുപോവുന്നതാണിത്. ഈ സീസണില്‍ തിലക് വര്‍മ, ഡെവണ്‍ കോണ്‍വേ എന്നിവരെ ടീം ബാറ്റിങിനിടെ ഇങ്ങനെ തിരിച്ചുവിളിച്ചിരുന്നു. വിജയത്തിനാവശ്യമായ റണ്‍റേറ്റ് കണ്ടെത്താന്‍ കഴിയാതെ വന്നപ്പോഴായിരുന്നു ഇത്. സാഹചര്യത്തിന് കൂടുതല്‍ അനുയോജ്യനായ മറ്റൊരു ബാറ്റ്‌സ്മാനെ ക്രീസിലേക്ക് അയക്കാന്‍ റിട്ടയേര്‍ഡ് ഔട്ട് നിയമത്തിലൂടെ സാധിക്കും.

https://www.instagram.com/reel/DIhEZjbyvhZ/https://www.instagram.com/reel/DIhEZjbyvhZ/
ജയ്‌സ്വാളും സഞ്ജുവും മികച്ച തുടക്കമിട്ടെങ്കിലും റോയല്‍സിന് നേരിയ മാര്‍ജിനില്‍ വിജയം നഷ്ടമായി. ഡിസി 20 ഓവറില്‍ നേടിയ അഞ്ചിന് 188 റണ്‍സിന് മറുപടിയായി റോയല്‍സ് 20 ഓവറില്‍ നാലിന് 188 റണ്‍സാണ് നേടിയത്. മല്‍സരം ടൈ ആയതോടെ സൂപ്പര്‍ ഓവര്‍ വേണ്ടിവന്നു.

മിച്ചല്‍ സ്റ്റാര്‍ക്ക് എറിഞ്ഞ സൂപ്പര്‍ ഓവറില്‍ റോയല്‍സ് 11 റണ്‍സെടുത്തപ്പോള്‍ രണ്ട് പന്ത് ശേഷിക്കെ ഡിസി വിജയലക്ഷ്യം മറികടന്നു. സന്ദീപ് ശര്‍മ എറിഞ്ഞ നാലാം പന്ത് സിക്‌സറിന് തൂക്കി ട്രിസ്റ്റണ്‍ സ്റ്റബ്‌സ് ഡിസിക്ക് സീസണിലെ അഞ്ചാം ജയമൊരുക്കി.