സഞ്ജു സാംസൺ അടക്കം പണി കിട്ടിയത് മൂന്ന് പേർക്ക്; രാജസ്ഥാൻ റോയൽസിന് ഇത് വമ്പൻ തിരിച്ചടി ലഭിച്ച സീസൺ

Curated byഗോകുൽ എസ് | Samayam Malayalam | Updated: 9 May 2025, 3:53 am

2025 സീസൺ ഐപിഎല്ലിൽ രാജസ്ഥാൻ റോയൽസ് പ്ലേ ഓഫിലെത്താതെ പുറത്തായിക്കഴിഞ്ഞു. സീസണിന്റെ തുടക്കം മുതൽ ദയനീയ ഫോമിൽ കളിക്കുന്ന ടീം ഇതുവരെ കളിച്ച 12 മത്സരങ്ങളിൽ ആകെ മൂന്ന് കളികളിൽ മാത്രമാണ് വിജയം നേടിയത്‌‌. നിലവിൽ പോയിന്റ് പട്ടികയിൽ ഒൻപതാം സ്ഥാനത്താണ് സഞ്ജു സാംസണിന്റെ ടീം. സമീപ വർഷങ്ങളിൽ രാജസ്ഥാൻ റോയൽസിന്റെ ഏറ്റവും മോശം പ്രകടനമാണ് ഇത്തവണത്തേത്. മോശം സീസണിൽ ടീമിലെ ചില പ്രധാന കളിക്കാർക്ക് പരിക്കേൽക്കുക കൂടി ചെയ്തത് റോയൽസിന്റെ നില കൂടുതൽ പരുങ്ങലിലാക്കി. റോയൽസിന്റെ മൂന്ന് പ്രധാന താരങ്ങൾക്കാണ് ഇത്തവണ പരിക്ക് പണി കൊടുത്തത്. ക്യാപ്റ്റൻ സഞ്ജു സാംസണിന്റെ പരിക്കും ഫിറ്റ്നസ് പ്രശ്നങ്ങളുമാണ് ഇത്തവണ റോയൽസിന് ഏറ്റവും വലിയ പണി കൊടുത്തത്. ഫിറ്റ്നസ് പ്രശ്നങ്ങളെ തുടർന്ന് സീസണിലെ ആദ്യ മൂന്ന് കളികളിലും സ്പെഷ്യലിസ്റ്റ് ബാറ്റർ മാത്രമായിട്ടായിരുന്നു സഞ്ജു കളിച്ചത്. നായകനായി സഞ്ജുവിന്റെ സേവനം ലഭിക്കാത്തത് ഈ കളികളിൽ റോയൽസിനെ ശരിക്കും ബാധിച്ചു. സഞ്ജുവിന് പകരം റോയൽസിനെ നയിച്ച റിയാൻ പരാഗിന് ടീമിനെ പ്രചോദിപ്പിക്കാനായില്ല‌.


റോയൽസിന്റെ നാലാമത്തെ കളി മുതൽ സഞ്ജു ‌നായക സ്ഥാനത്തേക്ക് തിരിച്ചെത്തി. എന്നാൽ ഡെൽഹി ക്യാപിറ്റൽസിന് എതിരായ കളിക്കിടെ സഞ്ജുവിന് വീണ്ടും പരിക്കേറ്റു.‌ ഇതിന് ശേഷം ഇതുവരെ കളിക്കളത്തിലേക്ക് താരം തിരിച്ചെത്തിയിട്ടില്ല. സഞ്ജുവില്ലാതെയാണ് അവസാന അഞ്ച് മത്സരങ്ങളിലും റോയൽസ് ഇറങ്ങിയത്. 2025 സീസൺ ഐപിഎല്ലിൽ ആകെ ഏഴ് മത്സരങ്ങൾ മാത്രമാണ് സഞ്ജുവിന് കളിക്കാനായത്. ഇതിൽ 224 റൺസാണ് താരത്തിന്റെ സമ്പാദ്യം.

സർപ്രൈസ് നീക്കം നടത്തി സഞ്ജുവിന്റെ രാജസ്ഥാൻ റോയൽസ്; ടീമിന്റെ തലവര മാറ്റാൻ പുതിയ വിദേശ താരമെത്തി
ഈ സീസണിൽ പരിക്ക് പണി കൊടുത്ത മറ്റൊരു രാജസ്ഥാൻ റോയൽസ് താരമാണ് സന്ദീപ് ശർമ. ഇത്തവണത്തെ മെഗാ ലേലത്തിന് മുൻപ് റോയൽസ് ടീമിൽ നിലനിർത്തിയ താരമായിരുന്നു വലം കൈയ്യൻ പേസറായ സന്ദീപ്. 10 കളികളിൽ ഒൻപത് വിക്കറ്റുകളാണ് ഈ സീസണിൽ ഈ സീനിയർ പേസർ നേടിയത്. സന്ദീപ് പരിക്കേറ്റ് പുറത്തായതോടെ പകരം ദക്ഷിണാഫ്രിക്കൻ പേസർ നാന്ദ്രെ ബർഗറിനെ റോയൽസ് സൈൻ ചെയ്തിട്ടുണ്ട്.

2025 സീസണ് മുന്നോടിയായുള്ള മെഗാ ലേലത്തിൽ വലിയ പ്രതീക്ഷകളോടെ രാജസ്ഥാൻ റോയൽസ് സ്വന്തമാക്കിയ താരമാണ് നിതീഷ് റാണ. എന്നാൽ താരവും ഇപ്പോൾ പരിക്കേറ്റ് സീസണിൽ നിന്ന് പുറത്തായിരിക്കുകയാണ്. 11 കളികളിൽ 217 റൺസായിരുന്നു ഈ സീസണിൽ നിതീഷ് റാണയുടെ സമ്പാദ്യം. നിതീഷ് റാണക്ക് പകരക്കാരനായി ദക്ഷിണാഫ്രിക്കൻ താരം ലുവാൻ ഡി പ്രിട്ടോറിയസിനെ റോയൽസ് സൈ‌ൻ ചെയ്തിട്ടുണ്ട്.

സഞ്ജുവിനും പന്തിനും തിരിച്ചടി? സീറ്റ് ഉറപ്പിച്ചത് ഈ താരം മാത്രമോ, മത്സരത്തിനുണ്ടായിരുന്നത് നാല് താരങ്ങൾ
നിലവിൽ 12 കളികളിൽ ഒൻപത് ജയവും മൂന്ന് തോൽവികളുമാണ് ടീമിന്റെ സമ്പാദ്യം. പോയിന്റ് പട്ടികയിൽ ഒൻപതാം സ്ഥാനത്താണ് അവർ‌. മെയ് 12 ന് ചെന്നൈ സൂപ്പർ കിങ്സിന് എതിരെയും മെയ് 16 ന് പഞ്ചാബ് കിങ്സിന് എതിരെയുമാണ് ടീമിന്റെ ശേഷിക്കുന്ന മത്സരങ്ങൾ.

നിലവിൽ രാജസ്ഥാൻ റോയൽസിന്റെ സ്ക്വാഡ്: സഞ്ജു സാംസൺ ( ക്യാപ്റ്റൻ ), വൈഭവ് സൂര്യവംശി, യശസ്വി ജയ്സ്വാൾ, ഷിംറോൺ ഹെറ്റ്മെയർ, ശുഭം ദുബെ, റിയാൻ പരാഗ്, വനിന്ദു ഹസരംഗ, ധ്രുവ് ജൂറൽ, കുനാൽ സിങ് റാത്തോർ, ലുവാൻ ഡി പ്രിട്ടോറിയസ്, യുധ്വീർ സിങ് ചരക്, തുഷാർ ദേഷ്പാണ്ടെ, കുമാർ കാർത്തികേയ, ആകാശ് മധ്വാൽ, ക്വനെ മഫാക്ക, മഹീഷ് തീക്ഷണ, ഫസൽഹഖ് ഫാറൂഖി, അശോക് ശർമ, ജോഫ്ര ആർച്ചർ, നാന്ദ്രെ ബർഗർ.