സഞ്ജുവിന്റെ കാര്യത്തിൽ സുപ്രധാന അപ്ഡേറ്റ് പുറത്തുവിട്ട് രാഹുൽ ദ്രാവിഡ്; രാജസ്ഥാൻ റോയൽസ് ആരാധകർക്ക് നിരാശ

Curated byഗോകുൽ എസ് | Samayam Malayalam | Updated: 1 May 2025, 1:08 am

മലയാളി വിക്കറ്റ് കീപ്പർ ബാറ്റർ സഞ്ജു സാംസണെ സംബന്ധിച്ച് തിരിച്ചടികളുടെ ഐപിഎൽ സീസണാണ് ഇത്തവണത്തേത്. ഫിറ്റ്നസ് പ്രശ്നങ്ങളെ തുടർന്ന് സീസണിലെ ആദ്യ മൂന്ന് കളികളിൽ സ്പെഷ്യലിസ്റ്റ് ബാറ്റർ മാത്രമായി കളിച്ച സഞ്ജുവിന് പരിക്ക് മൂലം അവസാന മൂന്ന് മത്സരങ്ങൾ നഷ്ടമാവുകയും ചെയ്തു. വ്യാഴാഴ്ച മുംബൈ ഇന്ത്യൻസിന് എതിരെയാണ് രാജസ്ഥാൻ റോയൽസിന്റെ അടുത്ത മത്സരം. ഈ മത്സരത്തിൽ സഞ്ജു സാംസൺ കളിക്കുമോ എന്ന ആകാംക്ഷയിലായിരുന്നു ആരാധകർ. എന്നാൽ മത്സരത്തലേന്ന് മാധ്യമങ്ങളോട് സംസാരിക്കവെ ആരാധകരെ നിരാശപ്പെടുത്തുന്ന അപ്ഡേറ്റാണ് രാജസ്ഥാൻ റോയൽസ് പരിശീലകൻ രാഹുൽ ദ്രാവിഡ് പങ്കുവെച്ചത്.


നിലവിൽ പരിക്കിന്റെ പിടിയിലുള്ള സഞ്ജുവിനെ ധൃതി പിടിച്ച് കളത്തിലേക്ക് തിരിച്ചു കൊണ്ടു വരാൻ രാജസ്ഥാൻ റോയൽസ് ആഗ്രഹിക്കു‌ന്നില്ലെന്നാണ് ദ്രാവിഡ് പറഞ്ഞത്. സഞ്ജുവിന്റെ പരിക്ക് വളരെ ശ്രദ്ധാപൂർവം കൈകാര്യം ചെയ്യേണ്ടതുണ്ടെന്നും കൂടുതൽ പ്രശ്നങ്ങൾ വരാതെയിരിക്കാൻ അത് അനിവാര്യമാണെന്നും ദ്രാവിഡ് പറയുന്നു. സഞ്ജു അതിവേഗം പരിക്കിൽ നിന്ന് സുഖം പ്രാപിക്കുന്നുണ്ടെന്നും ഇതിനൊപ്പം റോയൽസ് കോച്ച് വ്യക്തമാക്കി. മുംബൈ ഇന്ത്യൻസിന് എതിരായ മത്സരത്തിലും സഞ്ജുവിന് പുറത്തിരിക്കേണ്ടി വരുമെന്നാണ് ദ്രാവിഡിന്റെ വാക്കുകളിൽ നിന്ന് വ്യക്തമാകുന്നത്.

ശ്രേയസ് തിളങ്ങി, ചാഹലിന് ഹാട്രിക്; ആറാം ജയത്തോടെ പഞ്ചാബ് കിങ്‌സ് രണ്ടാം സ്ഥാനത്ത്
നേരത്തെ ഡെൽഹി ക്യാപിറ്റൽസിന് എതിരായ മത്സരത്തിൽ മികച്ച ഫോമിൽ ബാറ്റ് ചെയ്യുന്നതിനിടെയായിരുന്നു സഞ്ജുവിന് പരിക്കേറ്റത്. തുടർന്ന് താരം റിട്ടയേഡ് ഹർട്ടാവുകയായിരുന്നു. ഇതിന് ശേഷം രാജസ്ഥാൻ റോയൽസ് കളിച്ച മൂന്ന് മത്സരങ്ങളും സഞ്ജുവിന് നഷ്ടമായി. ഇതിൽ ലക്നൗ സൂപ്പർ ജയന്റ്സ്, റോയൽ ചലഞ്ചേഴ്സ് ബംഗളൂരു ടീമുകൾക്ക് എതിരെ രാജസ്ഥാൻ റോയൽസ് പരാജയപ്പെട്ടപ്പോൾ ഗുജറാത്ത് ടൈറ്റൻസിന് എതിരെ കിടിലൻ ജയം നേടി.

ഈ സീസണിൽ ഏഴ് മത്സരങ്ങളിലാണ് ഇതുവരെ സഞ്ജു സാംസണ് കളിക്കാനായത്. ഇതിൽ 37.33 ബാറ്റിങ് ശരാശരിയിൽ 224 റൺസാണ് താരത്തിന്റെ സമ്പാദ്യം. സഞ്ജുവിന്റെ അഭാവം രാജസ്ഥാൻ റോയൽസിൽ ശരിക്കും നിഴലിക്കുന്നുണ്ട്. സഞ്ജുവിന്റെ അഭാവത്തിൽ ടീമിന്റെ ക്യാപ്റ്റൻസി ഏറ്റെടുത്ത റിയാൻ പരാഗിന് പ്രതീക്ഷിച്ച മികവിലേക്ക് ടീമിനെ നയിക്കാൻ സാധിച്ചിട്ടില്ല.

സഞ്ജുവിന് പരിക്കേറ്റതോടെയാണ് കൗമാര ബാറ്റർ വൈഭവ് സൂര്യവംശി രാജസ്ഥാൻ റോയൽസിന്റെ പ്ലേയിങ് 12 ലേക്ക് വന്നത്. യശസ്വി ജയ്സ്വാളിനൊപ്പം ടീമിന്റെ ബാറ്റിങ് ഓപ്പൺ ചെയ്ത വൈഭവ് മികച്ച പ്രകടനമാണ് കാഴ്ച വെക്കുന്നത്. ഐപിഎല്ലിലെ അരങ്ങേറ്റ മത്സരത്തിൽ ലക്നൗ സൂപ്പർ ജയന്റ്സിന് എതിരെ 34 റൺസ് നേടിയ വൈഭവ്, ര‌ണ്ടാം മത്സരത്തിൽ ആർസിബിക്ക് എതിരെ 16 റൺസിൽ പുറത്തായി.

2026 ജപ്പാന്‍ ഏഷ്യന്‍ ഗെയിംസില്‍ ക്രിക്കറ്റ് ഉള്‍പ്പെടുത്തും; ഇന്ത്യന്‍ ടീമിന് സുവര്‍ണാവസരം
ഗുജറാത്ത് ടൈറ്റൻസിന് എതിരായ മൂന്നാം മത്സരത്തിൽ വൈഭവിന്റെ ബാറ്റിങ് വിസ്ഫോടനമാണ് ക്രിക്കറ്റ് ലോകം കണ്ടത്. വെറും 35 പന്തുകളിൽ സെഞ്ചുറി നേടിയ വൈഭവ് 38 പന്തിൽ 101 റൺസ് നേടിയാണ് പുറത്തായത്. സഞ്ജു കളിക്കാനില്ലാത്ത സാഹചര്യത്തിൽ മുംബൈ ഇന്ത്യൻസിന് എതിരെയും വൈഭവ് - ജയ്സ്വാൾ ജോഡി തന്നെ രാജസ്ഥാൻ റോയൽസിന്റെ ബാറ്റിങ് ഓപ്പൺ ചെയ്യും. ഒരിക്കൽക്കൂടി ഇവരിൽ നിന്ന് മികച്ചൊരു കൂട്ടുകെട്ട് റോയൽസ് പ്രതീക്ഷിക്കുന്നു.