സഞ്ജുവിന്റെ രാജസ്ഥാൻ റോയൽസിന് ഇരട്ട തലവേദന നൽകി ഇക്കാര്യം; ഈ മൂന്ന് താരങ്ങൾ ഫോമിലേക്ക് വന്നില്ലെങ്കിൽ തിരിച്ചടി

Curated byഗോകുൽ എസ് | Samayam Malayalam | Updated: 27 Mar 2025, 1:00 am

Samayam Malayalamരാജസ്ഥാൻ റോയൽസ്

2025 സീസൺ ഇന്ത്യൻ പ്രീമിയർ ലീഗിൽ തുടർച്ചയായ രണ്ട് കളികളിൽ പരാജയം നേരിട്ടിരിക്കുകയാണ് രാജസ്ഥാൻ റോയൽസ്. ആദ്യ മത്സരത്തിൽ കരുത്തരായ സൺ റൈസേഴ്സ് ഹൈദരാബാദിനോട് 44 റൺസിന് പരാജയപ്പെട്ട രാജസ്ഥാൻ റോയൽസ്, രണ്ടാം മത്സരത്തിൽ കൊൽക്കത്ത നൈറ്റ് റൈഡേഴ്സിനോട് എട്ട് വിക്കറ്റിന്റെ പരാജയമാണ് ഏറ്റുവാങ്ങിയത്. അതേ സമയം സീസണിൽ തുടർ തോൽവികളോടെ തുടങ്ങേണ്ടി വന്നത് രാജസ്ഥാന് സമ്മാനിക്കുന്ന ആശങ്ക ചെറുതല്ല. അടുത്ത കളിയിലെങ്കിലും വിജയവഴിയിലേക്ക് തിരിച്ചെത്തിയില്ലെങ്കിൽ രാജസ്ഥാൻ റോയൽസിന്റെ കാര്യം കഷ്ടത്തിലാകുമെന്ന കാര്യം ഉറപ്പ്.അതേ സമയം കൊൽക്കത്ത നൈറ്റ് റൈഡേഴ്സിന് എതിരായ കളിക്ക് ശേഷം രാജസ്ഥാൻ റോയൽസിന് ഏറ്റവും വലിയ തലവേദന നൽകുന്നത് ടീമിലെ ചില പ്രധാന താരങ്ങളുടെ ഫോമൗട്ടാണ്. സൂപ്പർ താരങ്ങളായ യശസ്വി ജയ്സ്വാൾ, നിതീഷ് റാണ, ജോഫ്ര ആർച്ചർ എ‌ന്നിവർ തുടർച്ചയായ രണ്ടാമത്തെ കളിയിലും നിരാശപ്പെടുത്തി. സൺ റൈസേഴ്സ് ഹൈദരാബാദിന് എതിരായ ആദ്യ കളിയിൽ ഒരു റൺസിന് പുറത്തായ ഓപ്പണർ യശസ്വി ജയ്സ്വാൾ, കൊൽക്കത്ത നൈറ്റ് റൈഡേഴ്സിന് എതിരെ 29 റൺസ് മാത്രം നേടിയാണ് പുറത്തായത്. 24 പന്തിൽ നിന്നായിരുന്നു ജയ്സ്വാളിന്റെ ഈ ഇന്നിങ്സ്.

ഒട്ടും ടച്ചിലല്ല ജയ്സ്വാളെന്ന് തോന്നിപ്പിക്കുന്നതായിരുന്നു തുടക്കം മുതലുള്ള അദ്ദേഹത്തിന്റെ ബാറ്റിങ്. പന്ത് മിഡിൽ ചെയ്യാൻ ബുദ്ധിമുട്ടുന്ന യശസ്വിയെയാണ് ഗുവാഹത്തിയിൽ നടന്ന കളിയിൽ കണ്ടത്. അടുത്ത മത്സരത്തിൽ താരം ഫോമിലേക്ക് മടങ്ങിയെത്തിയില്ലെങ്കിൽ രാജസ്ഥാൻ റോയൽസിന് അത് കനത്ത തിരിച്ചടിയായിരിക്കുമെന്ന കാര്യം ഉറപ്പ്.

Also Read: രാജസ്ഥാ‌ൻ റോയൽസ് നടത്തിയ ആ പരീക്ഷണം വൻ ഫ്ലോപ്പായി; കട്ട കലിപ്പിൽ ആരാധകർ രംഗത്ത്, സഞ്ജുവിന്റെ ടീമിനെതിരെ വിമർശനം

ജയ്സ്വാളിനെപ്പോലെ നിതീഷ് റാണയും കൊൽക്കത്ത നൈറ്റ് റൈഡേഴ്സിന് എതിരെ നിരാശപ്പെടുത്തി. നാലാം നമ്പരിൽ ബാറ്റിങ്ങിന് ഇറങ്ങിയ ഈ താരം ഒൻപത് പന്തിൽ എട്ട് റൺസ് മാത്രം നേടി പുറത്താവുകയായിരുന്നു. നേരത്തെ ആദ്യ കളിയിലും നിതീഷ് റാണ ഫ്ലോപ്പായിരുന്നു. സൺ റൈസേഴ്സ് ഹൈദരാബാദിന് എതിരെയും നാലാം നമ്പരിൽ ബാറ്റ് ചെയ്ത നിതീഷ്, എട്ട് പന്തിൽ 11 റൺസുമായാണ് വീണത്. തുടർച്ചയായ രണ്ടാം കളിയിലും നിതീഷ് ബാറ്റിങ്ങിൽ നിരാശപ്പെടുത്തിയത് രാജസ്ഥാന് സമ്മാനിക്കുന്ന ആശങ്ക ചെറുതല്ല. ഇത്തവണത്തെ ഐപിഎൽ മെഗാ ലേലത്തിൽ 4.2 കോടി രൂപക്കായിരുന്നു നിതീഷ് റാണയെ രാജസ്ഥാൻ റോയൽസ് സ്വന്തമാക്കിയത്.

തുടർച്ചയായ രണ്ടാമത്തെ കളിയിലും ഫ്ലോപ്പായ മറ്റൊരു രാജസ്ഥാൻ റോയൽസ് താരം ജോഫ്ര ആർച്ചറാണ്. ഇക്കഴിഞ്ഞ ഐപിഎൽ മെഗാ ലേലത്തിൽ നി‌ന്ന് 12.5 കോടി രൂപക്ക് രാജസ്ഥാൻ റോയൽസ് വാങ്ങിയ ആർച്ചർക്ക് രണ്ട് കളിയിലും വിക്കറ്റ് വീഴ്ത്താനായില്ല. സൺ റൈസേഴ്സ് ഹൈദരാബാദിന് എതിരായ ആദ്യ മത്സരത്തിൽ നാല് ഓവറുകളിൽ 76 റൺസ് വഴങ്ങിയ ആർച്ചർ കെകെആറിന് എതിരെ 2.3 ഓവറിൽ 33 റൺസാണ് വിട്ടുകൊടുത്തത്. അടുത്ത കളിയിൽ ആർച്ചർ ഫോമിലേക്ക് മടങ്ങിയെത്തിയില്ലെങ്കിൽ രാജസ്ഥാൻ റോയൽസിന്റെ അവസ്ഥ ദയനീയമാകുമെന്ന് ഉറപ്പ്.

Also Read: രോഹിത് ശർമ രക്ഷപെട്ടു, ഐപിഎല്ലിലെ നാണം കെട്ട റെക്കോഡിൽ ഒന്നാമനായി ഗ്ലെൻ മാക്സ്‌വെൽ

കൊൽക്കത്തക്ക് എതിരായ മത്സരം ഇങ്ങനെ: അതേ സമയം കൊൽക്കത്ത നൈറ്റ് റൈഡേഴ്സിന് എതിരായ കളിയിൽ ആദ്യം ബാറ്റ് ചെയ്ത രാജസ്ഥാൻ റോയൽസ് നിശ്ചിത 20 ഓവറിൽ നേടിയത് 151/9 എന്ന സ്കോറാണ്. 33 റൺസ് നേടിയ ധ്രുവ് ജൂറലായിരുന്നു ടീമിന്റെ ടോപ് സ്കോറർ‌. 152 റൺസ് ലക്ഷ്യം പിന്തുടർന്ന കെകെആർ 17.3 ഓവറുകളിൽ വിജയത്തിലെത്തി. 61 പന്തുകളിൽ 97 റൺസുമായി പുറത്താകാതെ നിന്ന ക്വിന്റൺ ഡി കോക്കായിരുന്നു കെകെആറിന്റെ വിജയശില്പി.