സഞ്ജുവും ദ്രാവിഡും തമ്മിൽ ഭിന്നത? സഞ്ജുവിനെ സ്പെഷ്യലിസ്റ്റ് ബാറ്ററായി രാജസ്ഥാൻ റോയൽസിന് കളിപ്പിക്കാമെന്നും മുൻ ഓപ്പണർ

Curated by: ഗോകുൽ എസ്|Samayam Malayalam•10 Aug 2025, 4:03 pm

മലയാളി താരം സഞ്ജു സാംസൺ രാജസ്ഥാൻ റോയൽസ് വിടാനൊരുങ്ങുന്നതായാണ് റിപ്പോർട്ടുകൾ. ഇതുമായി ബന്ധപ്പെട്ട് ഒട്ടേറെ അഭ്യൂഹങ്ങൾ ഇപ്പോൾ പുറത്തുവരുന്നുണ്ട്. സഞ്ജു ടീം വിടാൻ തീരുമാനിച്ചെന്നും ഇത് രാജസ്ഥാൻ റോയൽസിനെ അറിയിച്ചെന്നും കഴിഞ്ഞ ‌ദിവസങ്ങളിൽ വാർത്തകൾ വന്നിരുന്നു. സഞ്ജു രാജസ്ഥാൻ റോയൽസ് വിടാൻ ഒരുങ്ങുന്നതിന് പിന്നിൽ പല കാരണങ്ങളാണ് പറഞ്ഞുകേൾക്കുന്നത്. ഇപ്പോളിതാ സഞ്ജുവും രാജസ്ഥാൻ റോയൽസിന്റെ മുഖ്യ പരിശീലകനായ രാഹുൽ ദ്രാവിഡും തമ്മിൽ അഭിപ്രായ ഭിന്നതയുണ്ടാകാമെന്ന് ചൂണ്ടിക്കാട്ടി രംഗത്ത് വന്നിരിക്കുകയാണ് മുൻ ഇന്ത്യൻ ഓപ്പണർ കൃഷ്ണമാചാരി ശ്രീകാന്ത്. സഞ്ജു രാജസ്ഥാൻ റോയൽസ് വിട്ടാൽ ടീം ബാലൻസിനെ അത് വല്ലാതെ ബാധിക്കുമെന്നും രാജസ്ഥാന് ഒരു ബാറ്ററായി സഞ്ജുവിനെ കളിപ്പിക്കാമെന്നും തന്റെ യൂടൂബ് ചാനലിൽ സംസാരിക്കവെ ശ്രീകാന്ത് പറഞ്ഞു.


"റിപ്പോർട്ടുകൾ നോക്കുമ്പോൾ അദ്ദേഹവും ( സഞ്ജു സാംസൺ ) രാഹുൽ ദ്രാവിഡും തമ്മിൽ ഭിന്നതയുണ്ടെന്ന്‌ തോന്നുന്നു, എന്നാൽ എനിക്ക് പൂർണമായും അതേക്കുറിച്ച് അറിയില്ല. ഫ്രാഞ്ചൈസിയുടെ വീക്ഷണത്തിൽ നിന്ന് നോക്കൂ, അവർ ഒരു നിശ്ചിത തുക നൽകി അവനെ നിലനിർത്തി. അവർ അവന് ചുറ്റും ഒരു ടീമിനെ രൂപീകരിച്ചു. പെട്ടെന്ന് അവനെ റിലീസ് ചെയ്യുകയാണെങ്കിൽ ടീം ബാലൻസിന് എന്താകും സംഭവിക്കുക? 2008 ന് ശേഷം അവർ ഐപിഎൽ നേടിയിട്ടില്ല."

"അതിന് ശേഷം 2022 ലാണ് അവർ ഫൈനലിൽ എത്തിയത്. ഞാനായിരുന്നെങ്കിൽ സഞ്ജുവിനെ ടീമിൽ നിന്ന്‌ വിടുമായിരുന്നില്ല. റിയാൻ പരാഗിന് ക്യാപ്റ്റനായി സ്ഥാനക്കയറ്റം നൽകുന്നത് അവരുടെ ചോയിസാണ്. എന്നാൽ ഒരു ബാറ്ററായി സഞ്ജുവിനെ അവർക്ക് കളിപ്പിക്കാം." ക്രിസ് ശ്രീകാന്ത് പറഞ്ഞു.

Also Read: സഞ്ജു പോയാല്‍ ആരാവും ക്യാപ്റ്റന്‍? പരാഗിനും ജയ്സ്വാളിനും പുറമേ ധ്രുവ് ജുറെല്‍ കൂടി

അതേ സമയം സഞ്ജു സാംസൺ ടീം വിടുകയാണെങ്കിൽ രാജസ്ഥാൻ റോയൽസിന് അത് കനത്ത തിരിച്ചടിയായിരിക്കും എന്നതിൽ സംശയമില്ല. 2013 ൽ രാജസ്ഥാൻ റോയൽസിൽ എത്തിയ സഞ്ജു 11 സീസണുകളിലാണ് അവർക്കായി കളിച്ചത്. ടീമിന്റെ എക്കാലത്തെയും ഉയർന്ന റൺ വേട്ടക്കാരനാണ് അദ്ദേഹം. 2021 ൽ രാജസ്ഥാൻ റോയൽസിന്റെ ക്യാപ്റ്റൻ സ്ഥാനം ഏറ്റെടുത്ത സഞ്ജു 2022 ൽ അവരെ ഐപിഎൽ ഫൈനലിലേക്കും 2024 ൽ പ്ലേ ഓഫിലേക്കും നയിച്ചു.

Also Read: സഞ്ജു രാജസ്ഥാൻ റോയൽസ് വിടാനുള്ള കാരണം വൈഭവ് സൂര്യവംശിയും? മുൻ ഇന്ത്യൻ ഓപ്പണർ പറയുന്നത് ഇങ്ങനെ

രാജസ്ഥാൻ റോയൽസ് വിടുകയാണെങ്കിൽ സഞ്ജുവിന്റെ അടുത്ത തട്ടകമായി പ്രധാനമായും പറഞ്ഞു കേൾക്കുന്നത് ചെന്നൈ‌ സൂപ്പർ കിങ്സും, കൊൽക്കത്ത നൈറ്റ് റൈഡേഴ്സുമാണ്. രണ്ട്‌ ടീമുകൾക്കും സഞ്ജുവിനെ ടീമിലെത്തിക്കാൻ താല്പര്യമുണ്ടെന്നാണ് പുറത്തുവരുന്ന റിപ്പോർട്ടുകൾ.