സമൂഹ മാധ്യമങ്ങളിൽ തിളങ്ങി സഞ്ജുവിൻ്റെയും വൈഭവിന്റെയും കൂട്ടുകെട്ട്; വീഡിയോ ഇതുവരെ കണ്ടത് 37 മില്യൺ ആളുകൾ

Authored by: അനുഷ ഗംഗാധരൻ|Samayam Malayalam•21 May 2025, 4:21 pm

മലയാളി താരം വിക്കറ്റ് കീപ്പർ ബാറ്റർ സഞ്ജു സാംസൺ നയിക്കുന്ന രാജസ്ഥാൻ റോയൽസ് ഐപിഎൽ 2025 ലെ തങ്ങളുടെ അവസാനകളിയിൽ ജയം സ്വന്തമാക്കി പടിയിറങ്ങിയിരിക്കുകയാണ്. ഒരുപക്ഷെ നായക സ്ഥാനത്ത് സഞ്ജു എത്തിയതിന് ശേഷം ആദ്യമായി ആയിരിക്കും റോയൽസ് ഇത്രയും ദയനീയമായി ഒരു സീസൺ നേരിടുന്നത്. സഞ്ജുവിന്റെ പരിക്ക് രാജസ്ഥാനെ വല്ലാതെ തളർത്തി എന്ന് പറയുന്നതിലും തെറ്റില്ല.
ധോണിക്ക് കൈകൊടുത്തില്ല, കാല്‍ തൊട്ട് വണങ്ങി വൈഭവ് സൂര്യവംശി; ഹൃദയങ്ങള്‍ കീഴടക്കിയ പ്രതികരണവുമായി സിഎസ്‌കെ ക്യാപ്റ്റനും
ഇന്നിപ്പോൾ രാജസ്ഥാൻ റോയൽസ് ആരാധകർ ആഘോഷമാക്കുകയാണ് റോയൽസിന്റെ കഴിഞ്ഞ ദിവസത്തെ ജയം. ചെന്നൈ സൂപ്പർ കിങ്സിനെ പരാജയപ്പെടുത്തി 8 പോയിന്റുമായി ഒൻപതാം സ്ഥാനത്താണ് രാജസ്ഥാൻ റോയൽസുള്ളത്. അതേസമയം കഴിഞ്ഞ ദിവസത്തെ ജയം വെറുമൊരു ജയം ആയിരുന്നില്ല. ഒരുപാടു റെക്കോഡുകൾ സ്വന്തമാക്കി റോയൽസ് താരങ്ങൾ നേടിയെടുത്ത ജയമാണ്. മാത്രവുമല്ല ഹെറ്റ്മയറും ധ്രുവ് ജൂറലും ഭംഗിയായി അവസാനിപ്പിച്ച ഈ സീസണിലെ ഒരേയൊരു മത്സരം കൂടിയാണ് ഇത്.

ഇപ്പോഴിതാ കഴിഞ്ഞ ദിവസത്തെ ജയത്തിനു ശേഷം രാജസ്ഥാൻ റോയൽസ് ഇൻസ്റ്റാഗ്രാമിൽ പങ്കുവെച്ച ഒരു വീഡിയോ ആരാധകർ ഏറ്റെടുത്തിരിക്കുകയാണ്. നിലവിൽ 37 മില്യൺ ആളുകൾ കണ്ട ഈ വീഡിയോ ഇപ്പോഴും ഓട്ടത്തിലാണ്. കഴിഞ്ഞ ദിവസത്തെ മത്സരത്തിൽ റെക്കോഡ് സ്വന്തമാക്കിയ കുട്ടി താരം വൈഭവ് സൂര്യവംശിയും സഞ്ജു സാംസണും ആണ് വീഡിയോയിലെ താരങ്ങൾ. 33 പന്തിൽ 57 റൺസ് നേടി റെക്കോഡ് ഇട്ട വൈഭവിന് തന്റെ കൂളിങ് ഗ്ലാസ് സമ്മാനിക്കുന്ന സഞ്ജുവിന്റെ വീഡിയോ ആണ് രാജസ്ഥാൻ റോയൽസ് ടീം പോസ്റ്റ് ചെയ്‌തിരിക്കുന്നത്‌. അതും മലയാളികൾ ഉൾപ്പടെ എല്ലാ സിനിമ പ്രേമികളും ഒരുപോലെ ഏറ്റെടുത്ത ആവേശം സിനിമയിലെ ഇല്ലുമിനാറ്റി എന്ന പാട്ടാണ് വീഡിയോയ്ക്ക് നൽകിയിരിക്കുന്നത്. ഇതുകൂടി ആയതോടെ വീഡിയോ പറ പറക്കുകയാണ്.
https://www.instagram.com/reel/DJ4jcSmsFs6/https://www.instagram.com/reel/DJ4jcSmsFs6/

കഴിഞ്ഞ ദിവസം നടന്ന മത്സരത്തിൽ ആരാധകരെ ആവേശത്തിലാഴ്ത്തിയ കൂട്ടുകെട്ടാണ് സഞ്ജുവിന്റേയും വൈഭവ് സൂര്യവംശിയുടെയും. ഈ കൂട്ടുകെട്ട് സീസണിന്റെ തുടക്കം മുതൽ അവസാനം വരെ ഉണ്ടായിരുന്നെങ്കിൽ ഇന്ന് റോയൽസ് പ്ലേ ഓഫ് ഉറപ്പിച്ചിട്ടുണ്ടാകും എന്നാണ് ആരാധകർ ഒന്നടക്കം മത്സര ശേഷം അഭിപ്രായപ്പെട്ടത്.

19 പന്തിൽ 36 റൺസ് നേടി 3.4 ഓവറിൽ രാജസ്ഥാൻ റോയൽസിന്റെ സ്റ്റാർ ഓപ്പണർ യശസ്വി ജയ്‌സ്വാൾ പുറത്തായപ്പോൾ വൺ ഡൗൺ റോളിൽ സഞ്ജു മൈതാനത്തെത്തി. അവിടെ നിന്ന് പതിനാലാമത്തെ ഓവർ വരെ സഞ്ജുവിന്റേയും വൈഭവിന്റെയും കൂട്ടുകെട്ടിൽ ആരാധകർ എല്ലാം മറന്ന് കളി കാണാൻ തുടങ്ങി. പക്ഷെ 13 . 2 ഓവറിൽ താരലേലത്തിനു മുന്നോടിയായി രാജസ്ഥാൻ വിട്ടുകളഞ്ഞ അശ്വിൻ സഞ്ജുവിനെ ഔട്ട് ആകിയതോടെ സഞ്ജു വൈഭവ് കൂട്ടുകെട്ടിന്റെ ഭംഗി അവസാനിച്ചു.

ഒട്ടും വൈകാതെ 13.6 ഓവറിൽ വൈഭവിനെയും അശ്വിൻ പവലിയനിലേക്ക് അയച്ചു. പക്ഷെ അതേസമയം ഇരുവരുടെയും കൂട്ടുകെട്ടാണ് റോയൽസിനെ റൺ വേട്ടയിൽ സഹായിച്ചത്. പിന്നീട് എത്തിയ താരങ്ങൾക്ക് മുന്നിൽ വലിയ ഒരു കടമ്പ ഇല്ലായിരുന്നു എന്ന് തന്നെ പറയാം.

സഞ്ജുവിന്റേയും വൈഭവന്റെയും മൈതാനത്തിലെ ഈ കൂട്ടുക്കെട്ടുപോലെ ദൃഢമാണ് മൈതാനത്തിന് പുറത്തും എന്ന് തെളിയിക്കുന്ന വീഡിയോ കൂടിയാണ് റോയൽസ് പുറത്ത് വിട്ടത്.

അതേസമയം കഴിഞ്ഞ ദിവസം നടന്ന ചെന്നൈ സൂപ്പർ കിങ്‌സ് - രാജസ്ഥാൻ റോയൽസ് മത്സരത്തിൽ ആദ്യം ബാറ്റ് ചെയ്‌ത ചെന്നൈ നിശ്ചിത 20 ഓവറിൽ 187 റൺസ് നേടി. എന്നാൽ മറുപടി ബാറ്റിങ്ങിന് ഇറങ്ങിയ രാജസ്ഥാൻ 17 പന്തുകൾ ബാക്കി നിൽക്കെ ചെന്നൈ മുന്നോട്ടുവെച്ച ലക്ഷ്യം മറികടന്നു.