സർപ്രൈസ് നീക്കം നടത്തി സഞ്ജുവിന്റെ രാജസ്ഥാൻ റോയൽസ്; ടീമിന്റെ തലവര മാറ്റാൻ പുതിയ വിദേശ താരമെത്തി

Curated byഗോകുൽ എസ് | Samayam Malayalam | Updated: 8 May 2025, 4:30 pm

2025 സീസൺ ഇന്ത്യൻ പ്രീമിയർ ലീഗിൽ ( IPL 2025 ) ആരാധകരെ പാടേ നിരാശപ്പെടുത്തിയ ടീമാണ് രാജസ്ഥാൻ റോയൽസ്‌. ആദ്യ 12 കളികളിൽ മൂന്നെണ്ണത്തിൽ മാത്രം വിജയിക്കാനായ അവർ പ്ലേ ഓഫിലെത്താതെ പുറത്തായിരുന്നു. ടീമിലെ ചില പ്രധാന കളിക്കാർക്ക് സംഭവിച്ച പരിക്കുകൾ റോയൽസിന്റെ പ്രകടനങ്ങളെ ബാധിച്ചിരുന്നു. ഇപ്പോളിതാ സീസണിൽ രണ്ട് മത്സരങ്ങൾ മാത്രം ബാക്കി നിൽക്കെ ഒരു പുതിയ വിദേശ താരത്തെ സൈൻ ചെയ്തിരിക്കുകയാണ് അവർ. പരിക്കിനെത്തുടർന്ന് ഈ സീസണിൽ നിന്ന് പുറത്തായ സ്റ്റാർ പേസർ സന്ദീപ് ശർമക്ക് പകരക്കാരനായി ദക്ഷിണാഫ്രിക്കൻ പേസർ നാന്ദ്രെ ബർഗറിനെയാണ് റോയൽസ് ടീമിലെത്തിച്ചിരിക്കുന്നത്.


2024 സീസൺ ഐപിഎല്ലിൽ രാജസ്ഥാൻ റോയൽസിന്റെ താരമായിരുന്നു ഇടം കൈയ്യൻ പേസറായ നാന്ദ്രെ ബർഗർ‌. ആറ് കളികളിൽ നിന്ന് ഏഴ് വിക്കറ്റുകളാണ് താരം കഴിഞ്ഞ സീസണിൽ വീഴ്ത്തിയത്. എന്നാൽ മെഗാ ലേലത്തിന് മുൻപ് അദ്ദേഹത്തെ റോയൽസ് ടീമിൽ നിന്ന് ഒഴിവാക്കുകയായിരുന്നു. മെഗാ ലേലത്തിൽ ആവശ്യക്കാരില്ലാതെ വന്നതോടെ താരം അൺസോൾഡാവുകയും ചെയ്തു.

ദക്ഷിണാഫ്രിക്കക്ക് വേണ്ടി മൂന്ന് ടെസ്റ്റുകളും, അഞ്ച് ഏകദിനങ്ങളും, രണ്ട് ടി20 മത്സരങ്ങളും കളിച്ചിട്ടുള്ള താരമാണ് അദ്ദേഹം. 21 വിക്കറ്റുകളാണ് അന്താരാഷ്ട്ര ക്രിക്കറ്റിൽ അദ്ദേഹം നേടിയിട്ടുള്ളത്. ടി20 യിൽ മൊത്തം 69 മത്സരങ്ങളുടെ പരിചയസമ്പത്തുള്ള ബർഗർ 77 വിക്കറ്റുകളും ഇതിൽ നേടിയിട്ടുണ്ട്.

റാണയ്ക്ക് പകരം രാജസ്ഥാനിലെത്തിയത് ഒരു സൂപ്പർ താരം; ഈ 19കാരൻ നിസ്സാരക്കാരനല്ല, ഇനി കളിമാറും
3.5 കോടി രൂപക്കാണ് നാന്ദ്രെ ബർഗർ രാജസ്ഥാൻ റോയൽസിൽ എത്തിയിരിക്കുന്നത്. താരത്തിന്റെ വരവ് റോയൽസിന്റെ ബൗളിങ് കരുത്ത് വർധിപ്പിക്കും. നിലവിൽ ജോഫ്ര ആർച്ചർ മാത്രമാണ് വിശ്വസിക്കാൻ കൊള്ളാവുന്ന പേസ് ബൗളറായി രാജസ്ഥാൻ റോയൽസിലുള്ളത്. ടീം അവരുടെ രണ്ടാമത്തെ വിദേശ പേസറായി കളിപ്പിച്ച അഫ്ഗാൻ താരം ഫസൽഹഖ് ഫാറൂഖി സീസണിൽ വൻ‌ ഫ്ലോപ്പായിരുന്നു‌.

അതേ സമയം വിരലിനേറ്റ പരിക്കാണ് സന്ദീപ് ശർമ ഈ സീസണിൽ നിന്ന് പുറത്താകാൻ കാരണം. ഐപിഎൽ മെഗാ ലേലത്തിന് മുൻപ് റോയൽസ് ടീമിൽ നിലനിർത്തിയ താരമായിരുന്നു സീനിയർ പേസറായ സന്ദീപ്. എന്നാൽ പ്രതീക്ഷിച്ച മികവിലേക്ക് ഉയരാൻ ഇക്കുറി താരത്തിന് കഴിഞ്ഞിരുന്നില്ല. 10 മത്സരങ്ങളിൽ നിന്ന് ഒൻപത് വിക്കറ്റുകളാണ് താരത്തിന് ആകെ നേടാനായത്. സന്ദീപിന് ഫോമിലേക്ക് ഉയരാൻ സാധിക്കാതിരുന്നത് റോയൽസിന്റെ പ്രകടനങ്ങളെയും ബാധിച്ചിരുന്നു.

സഞ്ജു സാംസണിന്റെ ബാറ്റിങ് പൊസിഷനിൽ നിർണായക മാറ്റം വരും? അടുത്ത കളിയിൽ തിരിച്ചെത്തുമ്പോൾ പുതിയ റോളിൽ കണ്ടേക്കാം
നിലവിൽ 12 കളികളിൽ ആറ് പോയിന്റ് മാത്രമുള്ള രാജസ്ഥാൻ റോയൽസ്, ഐപിഎൽ പോയിന്റ് പട്ടികയിൽ ഒൻപതാം സ്ഥാനത്താണ്. ശേഷിക്കുന്ന രണ്ട് കളികളിലും ജയം നേടി മികച്ച രീതിയിൽ സീസൺ അവസാനിപ്പിക്കുകയാവും ഇനി ടീമിന്റെ ലക്ഷ്യം. ഈ മാസം 12 ന് ചെന്നൈ സൂപ്പർ കിങ്സിന് എതിരയും 16 ന് പഞ്ചാബ് കിങ്സിന് എതിരെയുമാണ് റോയൽസിന്റെ ശേഷിക്കുന്ന കളികൾ.